Ideia mariadu: Tistimunhas di Jeová ka ta komemora Páskua pamodi es é ka kriston.

 Verdadi: Nu ta kridita ma Jizus Kristu é nos Salvador i nu ta faze nos midjór pa nu “sigi se pasu di manera fiel.” — 1 Pedru 2:21; Lukas 2:11.

Ideia mariadu: Nhos ka ta kridita ma Jizus resusitadu.

 Verdadi: Nu ta kridita na resureison di Jizus. Nu ta rekonhese ma kel-li é un kuza txeu inportanti pa fé di un kriston i nu ta pâpia txeu di kel-li na nos trabadju di pregason. — 1 Koríntius 15:3, 4, 12-15.

Ideia mariadu: Nhos fidju ta perde tudu kel alegria di dia di Páskua i nhos ka ta inporta ku kel-li.

 Verdadi: Nu ta ama nos fidju i nu ta faze tudu kel ki nu ta pode pa trena-s i djuda-s ser filís. — Titu 2:4.

•   Fésta di Páskua ka ten bazi na Bíblia.

•   Jizus manda-nu pa nu komemora se mórti, ka se resureison. Tudu anu na aniversáriu di mórti di Jizus, nu ta faze Komemorason sima kalendáriu ki ta parse na Bíblia. — Lukas 22:19, 20.

•   Nu ta kridita ma kes kustumu di Páskua kumesa ku un fésta antigu di fertilidadi ki ta poi Páskua ta ser un kuza ki Deus ka ta seta. Deus krê pa nu ‘adora sô el’ i el ta xinti ofendidu óras ki nos adorason ten kuzas ki el ka ta aprova. — Ézudu 20:5; 1 Reis 18:21.

 Nu ta kridita ma nos disizon di ka partisipa na fésta di Páskua ten un bazi firmi na Bíblia ki ta inkoraja-nu pa nu uza ‘sabedoria i kapasidadi di rasusina’ envês di sigi kes tradison di ómis. (Provérbios 3:21; Mateus 15:3) Enbóra nu ta pâpia ku otus algen kuzê ki nu ta kridita sobri Páskua óras ki es pergunta-nu, tanbê nu ta ruspeta direitu ki kada algen ten di disidi kuzê ki krê faze. — 1 Pedru 3:15.