N nase na sidadi di Calgary na Alberta, na Kanadá. Kantu mi éra pikinoti, nha pai ku nha mai divôrsia. Nton, mi ku nha mai nu ba mora na kaza di nhas avó. Nhas avó ta amaba mi ku nha mai, pur isu ami éra un mininu txeu filís. Inda N ten bons lenbransa di kes anu di pas kantu mi éra mininu.

 Ku 7 anu nha vida muda pa piór kantu nha mai torna kaza ku nha pai i nu muda pa St. Louis, Missouri, na Mérka. Lógu N diskubri ma alvês nha pai éra runhu dimás. Pur izénplu, kantu N txiga kaza dipôs di nha primeru dia di aula, na nha novu skóla, el fika ta sabe ma N sufri abuzu i ma N ka reaji. El fika xatiadu dimás i el sota-m más txeu ki kel ki minís di skóla sotaba mi! N prende lison i N kumesa ta briga ku otus mininu kantu N tinha sô 7 anu.

 Kel manera mariadu di nha pai ta disgostaba nha mai, i es ta staba sénpri ta diskuti. N kumesa ta uza dróga i álkuol kantu N tinha 11 anu. N bira kada bês más violéntu i N fika ta briga txeu na rua. Kantu N tirmina liseu N bira un algen txeu violéntu.

 Kantu N tinha 18 anu, N entra na trópa di Mérka. Kel trenu ki N resebe la pô-m ta prende mata algen. Dipôs di sinku anu, N dexa trópa pa N ba studa pisikolojia ku speransa di faze un karera na FBI (Departamento Federal de Investigações). N kumesa ta studa na universidadi na Mérka i dipôs N volta pa Kanadá undi N kontinua ta studa.

 Na universidadi N fika diziludidu ku pesoas i ku sosiadadi. Ta parseba ma kes algen pa pensaba sô na ses kabésa, tudu kuza na mundu ta parseba vaziu i kes prubléma na mundu ta parseba ma ka tinha soluson. N perde speransa ma pesoas ta konsigi poba mundu ta ser un lugar midjór.

 Dja ki N ka tinha ninhun obijetivu na vida, N kumesa ta uza álkuol, dróga, ta kóre tras di dinheru i séksu. N ta pensaba sô na kal ki éra kel prósimu fésta ki N ta baba i kal ki éra prósimu mudjer ki N ta fazeba séksu ku el. Kel trenu ki N resebe na trópa ta poba mi ta xintiba suguru, pur isu N ta staba sénpri ta briga. N ta atxaba ma N ta pode disidiba kuzê ki éra dretu i kuzê ki éra mariadu, i N ta infrentaba kalker algen ki N ta atxaba ma staba ta ser injustu ku otus algen. Má na verdadi, N bira un skravu di violénsia.

 Un dia mi ku nha amigu nu staba drogadu na kávi di nha kaza i ta pripara padjinha pa nu ba bende. Nha amigu pergunta-m si N ta kriditaba na Deus. N responde-l: “Si Deus é kulpadu pa sufrimentu ki ten na mundu, N ka krê sabe di el!” Na kel otu dia, na nha novu trabadju, un koléga di trabadju ki éra Tistimunha di Jeová, pergunta-m: “Bu ta atxa ma Deus é kulpadu pa sufrimentu ki ten na mundu?” N fika dimiradu pamodi kuzê ki N flaba un dia antis i N krê sabeba más. Duránti 6 mês nu pâpia txeu, i el mostra-m kes respósta di Bíblia pa alguns di kes pergunta más difísil ki N tinha sobri vida.

 Nha noiva, ki N staba ta vive ku el na kel ténpu, ka krê pa N kontaba el kes kuza ki N staba ta prende. Na un dumingu N fla-l ma N konvidaba Tistimunhas di Jeová pa baba nos kaza pa ba studa Bíblia ku nos. Na kel otu dia, kantu N volta di trabadju N odja ma dja el lebaba tudu kuza ki staba na kaza i el larga-m. N sai di kaza i N kumesa ta txora. Tanbê, N faze orason pa Deus i N pidi-l pa el djuda-m. Kel-la éra primeru bês ki N staba ta uza nómi di Deus, Jeová, na orason. — Salmo 83:18.

 Dôs dia dipôs N studa Bíblia pa primeru bês ku un kazal di Tistimunhas di Jeová. Dipôs ki es bai, N kontinua ta lé kel livru ki N staba ta studa, Poderá Viver Para Sempre no Paraíso na Terra. a N tirmina di le-l na kel mésmu noti. Kuzê ki N prende sobri Jeová Deus i se Fidju, Jizus Kristu, toka nha korason. N odja ma Jeová ten konpaxon i ma el ta sufri óras ki nu ta sufri. (Isaías 63:9) Kuza ki más toka-m é amor di Deus pa mi i sakrifisiu ki se Fidju faze pa djuda-m. (1 Juan 4:10) N txiga konkluzon ma Jeová ten txeu paxénxa ku mi “pamodi el ka krê pa ningen ser distruídu, má el krê pa tudu algen rapende.” (2 Pedru 3:9) N xinti ma Jeová krê pa N sérba se amigu. — Juan 6:44.

 N kumesa ta sisti runion na kel mésmu simana. N tinha kabélu kunpridu, N ta uzaba brinku i nha aparénsia ta daba algen medu. Má kes Tistimunha di Jeová trata-m sima si mi éra un família ki dja dura es ka odjaba. Es mostra ma es éra kristons verdaderu. N xinti sima si N voltaba pa kaza di nhas avó, má na un anbienti mutu más sábi.

 Na poku ténpu kes kuza ki N staba ta prende na Bíblia kumesa ta muda nha vida. N korta nha kabélu, N dexa di faze konportamentu seksual mariadu i N para di uza dróga i álkuol. (1 Koríntius 6:9, 10; 11:14) N krê agradaba Jeová. Nton, sima N ba ta prende ma el ka ta aprovaba un kuza ki N staba ta faze, nunka N ka ta ranjaba diskulpa pa kes kuza mariadu ki N staba ta faze. Envês di kel-li, N ta xintiba sima un fakada na korason. N ta flaba nha kabésa: ‘N ka pode konporta di kel manera la más’. I sen da vólta txeu, N ta tentaba muda nha manera di pensa i nha konportamentu. Pur isu, lógu N kumesa ta xinti kes vantajen di faze kuzas sima Jeová krê. Na dia 29 di julhu di 1989, 6 mês dipôs di nha primeru studu di Bíblia, N batiza i N bira un Tistimunha di Jeová.

 Bíblia djuda-m muda nha manera di ser. Antis si un algen mau provokaba mi N ta ajiba ku violénsia. Má gósi N ta sforsa pa N “vive na pas ku tudu algen.” (Romanus 12:18) N sabe ma N ka ta konsigi fazeba kes mudansa li mi sô. Pur isu, N ta agradese Jeová pa puder di se Palavra i di se spritu santu di muda vida di algen. — Gálatas 5:22, 23; Ebreus 4:12.

 Envês di ser skravu di dróga, violénsia i di dizeju mariadu, gósi N ta sforsa pa N agrada Jeová i da-l nha midjór. Kel-li ta djuda otus algen konxe-l. Alguns anu dipôs ki N batiza, N muda pa otu párti di mundu pa djuda prega na kes lugar ki meste di ajuda. Duránti anus, N tevi alegria di inxina txeu algen i di odja modi ki Bíblia midjora ses vida tanbê. N fika kontenti tanbê pamodi nha mai bira un Tistimunha di Jeová, i un di kes motivu é pamodi kes mudansa ki el odja na nha atitudi i na nha konportamentu.

 Na 1999, na El Salvador, N forma na kel skóla ki gósi ta txomadu di Skóla pa pregadoris di Reinu. Kel skóla trena-m i el pripara-m pa N toma kónta di trabadju di pregason i pa N inxina i kuida di kongregason. Dipôs na kel mésmu anu, N kaza ku Eugenia nha mudjer ki N krê txeu. Djuntu nu sta na sirvisu pa ténpu interu na Guatemala.

 Gósi, envês di sta diziludidu ku vida, ami é filís di verdadi. Aplika kes prinsípiu di Bíblia liberta-m di konportamentu seksual mariadu, di violénsia i da-m un vida xeiu di amor i pas di verdadi.