N nase na nórti di Méxiku, na Ciudad Obregón. N tinha dôs irman i dôs irmon más bédju ki mi i kuatu irmon más novu. Nu ta viveba fóra di sidadi i nha pai ta trabadjaba na agrikultura la. Éra un lugar sábi pa algen vive i nos família éra unidu i filís. Má kantu ki N tinha sô sinku anu, un furakon kaba ku kel lugar ki nu ta moraba i nu tevi ki ba mora na otu zóna.

 Nha pai kumesa ta ten prublémas di dinheru. Dipôs el kumesa ta bebe dimás. Kel-la afeta se kazamentu i se fidjus. Nu kumesa ta fuma sigaru, ki nu ta furtaba di nos pai. Kantu N tinha sô 6 anu, N fika moku pa primeru bês. Poku ténpu dipôs, nha mai ku nha pai sipara i kes vísiu ki N tinha bira más piór.

 Nha mai leba-nu ku el kantu ki el bai vive ku otu ómi. Kel ómi ka ta daba el dinheru i kel dinheru ki nha mai ta ganhaba, ka ta txigaba pa nu sustenta. Pur isu mi ku nhas irmon, nu ta trabadjaba na kalker kuza ki parse, má simé kel dinheru ka ta txigaba nen pa kes kuza ki nu ta mesteba más txeu. N ta graxaba sapatu i N ta bendeba pon, jornal, xíngua i otus kuza. I tanbê N ta andaba atoa na sidadi ta djobe kumida na undi ki kes algen riku ta poba lixu.

 Kantu ki N tinha 10 anu, un ómi fla-m pa N trabadja ku el na lixera di kel sidadi. N seta trabadja ku el, N dizisti di skóla i N sai di kaza. El ta pagaba mi ménus ki 100 skudu pa dia i el ta daba mi kumida ki el ta panhaba na lixera. N ta moraba na un kabana ki N faze ku kuzas ki N atxa na lixu. Kes algen di la ta flaba palavras mariadu i es tinha konportamentu seksual mariadu. Txeu di es éra visiadu na dróga i bebida. Kel-la foi piór ténpu di nha vida i N ta txoraba tudu dia di noti, ta treme di medu. Pamodi mi éra póbri i N ka tinha txeu skóla, N ta xintiba txeu vergónha di nha kabésa. N vive na kel lixera duránti uns três anu i dipôs N muda pa otu stadu di Méxiku. La N ta trabadjaba na kanpus ta panha floris, algudon, kana i batata.

 Dipôs di kuatu anu, N torna bai pa Ciudad Obregón. Un di nhas tia, ki éra kurandera, da-m un kuartu na se kaza. N kumesa ta ten pezadélu i ta xinti txeu diprimidu ki N ta pensaba na mata kabésa. Un dia di noti N faze orason pa Deus i N fla-l: “Sinhor, si nhu ta izisti mê, N krê konxe nho i N ta sirbi nho pa tudu ténpu. Si ten un relijion verdaderu, N krê konxe-l.”

 Sénpri N gosta di prende sobri Deus. Mésmu kantu mi éra pikinoti, N ta baba pa txeu igreja diferenti, má N fika diziludidu ku es. Ninhun di es ka ta papiaba mutu sobri Bíblia i es ka djuda-m prende más sobri Deus, sima N ta gostaba. Alguns di es ta daba txeu valor pa dinheru i na otus, kes pastor tinha konportamentu seksual mariadu.

 Kantu ki N tinha 19 anu, maridu di un di nhas irman fla-m ma Tistimunhas di Jeová mostra-l kuzê ki Bíblia ta fla sobri uza imajis na adorason. El lé Êxodo 20:4, 5. La ta fla ma nu ka debe nbaxa dianti di imajis. Versíklu 5 ta fla: ‘Ka bu nbaxa ses dianti nen ka bu sirbi-s, pamodi ami, Jeová, bu Deus, ami é un Deus ki ta iziji pa adora-m sô mi’. Dipôs nha kunhadu pergunta-m: “Si Deus ta faze milagri através di imajis ô si el krê pa nu faze adorason através di es, nton pamodi ki el ta proibi-s?” Kel kuza li pô-m ta pensa. Dipôs di kel-la, nu fika ta ten txeu konbérsu sobri asuntus di Bíblia. N ta gostaba tantu di kes konbérsu ki ta parseba ma ténpu ta buaba.

 Dipôs, el leba-m pa un runion di Tistimunhas di Jeová. N fika txeu dimiradu ku kuzas ki N odja i ki N obi la. Ti kes más jóven ta partisipaba na runion, ta pâpia dretu na palku! N pensa: ‘Fórti bon idukason ki pesoas ta resebe li!’ Tistimunhas di Jeová resebe-m di korason sikrê ku nha aparénsia dislexadu i nha kabélu kunpridu. Un família ti konvida-m pa N janta ku es dipôs di runion!

 Na nha studu di Bíblia ku Tistimunhas di Jeová, N prende ma Jeová Deus é un pai ki ta ama-nu txeu i ki ta preokupa ku nos ka ta nporta si nos é riku ô póbri, di undi ki nu ben, nos rasa ô kantu skóla ki nu ten. El ka ta faze diferénsa di ningen. (Atos 10:34, 35) Ti ki enfin, N staba ta prende más sobri Deus. N ka staba ta xinti tristi más i nen ma staba ta falta algun kuza inportanti na nha vida.

 Tudu kuza na nha vida kumesa ta midjora txeu! N para di fuma, di bebe dimás i di fla palavras mariadu. Kel rankor ki N ta xintiba désdi mininu i kes pezadélu kasábi ba ta kaba poku-poku. I N dexa di xinti ma N ka tinha valor pamodi kes difikuldadi ki N pasa kantu ki mi éra pikinoti i pamodi N ka tinha txeu skóla.

 N ten un bon mudjer ki ta ama Jeová i ki ta djuda-m txeu. Gósi mi é enkaregadu di grupu di kongregason i N ta nkoraja i inxina nhas kunpanheru di adorason ki é sima irmons i irmans pa mi. Bíblia i bon idukason ki Deus ta da, djuda-m para di xinti vergónha di nha kabésa.