N nase na un família póbri na sidadi di Tirana, kapital di Albánia. Nha pai éra un ómi onéstu ki ta trabadjaba txeu pa kuidaba di nos. Má simé, nu ka tinha txeu dinheru pa kunpraba kes kuza ki nu mesteba. Pur isu, désdi pikinoti N ta fikaba tristi pamodi nos éra póbri i txeu bês N ka tinha sapatu pa N uzaba i nen nu ka tinha kumida ki ta txigaba pa nu kumeba.

 N kumesa ta furta kantu mi éra mininu inda. N ta atxaba ma N staba ta ajuda nha família. Má dipôs di algun ténpu, pulísia pega-m. Nton na anu 1988, kantu N tinha 14 anu, nha pai manda-m pa un lugar ki ta podu kes adulesenti rebéldi. Na kes dôs anu ki N pasa la, N prende faze trabadju di soldador. Kantu N sai di la N krê atxaba un trabadju onéstu, má N ka konsigi. Txeu algen na Albánia ka ta konsigiba trabadju pamodi prublémas na pulítika. N xinti dizanimadu i N kumesa ta pasa ténpu ku kes amigu ki N tinha antis. Ku ténpu, nu podu prézu i nu dadu três anu di kadia.

 Kantu N sai di kadia N kontinua ta faze krimi. Albánia staba di kabésa pa baxu i ku txeu prubléma di dinheru. Duránti kel ténpu, N ganha txeu dinheru ta faze kuzas mariadu. Má un dia kantu mi ku nhas kunpanheru bai furta i nu staba armadu, dôs di nhas kunpanheru podu prézu. Pur isu, N fuji di país pa N ka ba kadia otu bês. Na kel ténpu dja N staba kazadu ku Julinda i dja nu tinha nos primeru fidju.

 Nu bai mora na Inglatéra i N staba disididu na kumesa un vida novu ku nha mudjer i nha fidju. Má éra difísil muda nha manera di ser i lógu N kumesa ta faze krimi otu bês. Má di es bês N kumesa ta bende dróga i pur isu N staba ta lida ku txeu dinheru.

 Má kuzê ki Julinda ta atxaba pamodi N staba ta bende dróga? N ta dexa-l konta nhos: “Désdi ki mi éra mininu na Albánia, nha sonhu éra un dia ka ser póbri más. Pur isu, N staba dispostu na faze kalker kuza pa N tinha un vida midjór. N ta atxaba ma dinheru ta midjoraba nos vida. Pur isu, N ta apoiaba Artan na tudu kuza ki el ta fazeba, sikrê éra konta mintira, furta i bende dróga.”

 Dipôs, na 2002, nos vida muda. Nos planu i nos sonhu kaba di un óra pa kel otu. N panhadu ku txeu dróga i N podu prézu otu bês.

 Bíblia kumesa ta muda nha vida antis di N da kónta. Na komésu di anu 2000, Julinda konxe Tistimunhas di Jeová i el kumesa ta studa Bíblia ku es. N ka tinha interesi na studa Bíblia pamodi N ta atxaba kes konbérsu di Bíblia sen piada. Má Julinda gostaba txeu di studa Bíblia. El fla: “N kria na un família relijiozu ki ta amaba i ta ruspetaba Bíblia. Sénpri N krê prendeba más sobri kuzê ki Bíblia ta inxina i N fika kontenti di studa Bíblia ku Tistimunhas di Jeová. Txeu di kes kuza ki Bíblia ta inxina éra klaru pa mi. I kes kuza ki N prende djuda-m faze alguns mudansa na nha vida. Má simé, N ta atxaba ma pa nu ser filís, nu mesteba di txeu dinheru. Nha manera di pensa muda kantu Artan podu prézu. Kel-li pô-m ta ben na mi. Dirapenti, N da kónta ma kuzê ki Bíblia ta fla sobri dinheru é verdadi. Nu fika sô ta kóre tras di dinheru, má nu ka éra filís. Nton, N odja ma N meste obiba ku tudu kel ki Deus ta fla.”

 Na 2004, N sai di kadia i lógu N tenta kumesa ta bende dróga otu bês. Má, Julinda dja ka staba ta pensa más sima mi i el fla-m un kuza ki pô-m ta pensa txeu na nha vida. El fla-m: “N ka krê bu dinheru más. N krê pa nha maridu sta li djuntu ku mi i pa pai di nhas fidju sta djuntu ku es.” N fika spantadu ku kuzê ki el fla, má el staba sértu. Dja N pasaba txeu anu lonji di nha família. I tanbê N para i N pensa sobri tudu kes prubléma ki N pasa pa el pamodi N staba ta tenta ganha dinheru di manera dizonéstu. Pur isu, N disidi muda nha vida i para di anda ku kes amigu ki N tinha.

 Un dia N ba sisti un runion di Tistimunhas di Jeová djuntu ku nha mudjer i nhas fidju. Kuzê ki N odja kel dia mexe txeu ku mi. N fika dimiradu di odja ma kes algen la éra sinseru i amigu di kunpanheru. Nton, dipôs di un ténpu, N kumesa ta studa Bíblia.

 N prende na Bíblia ma ‘amor pa dinheru é raís di tudu tipu di kuzas mariadu i alguns na buska es amor, poi ses kabésa na txeu sufrimentu.’ (1 Timóteo 6:9, 10) N ntende dretu ma kuzê ki Bíblia ta fla é verdadi! N ta rapende txeu di kes kuza mariadu ki N faze i di sufrimentu ki N traze pa mi i pa nha família. (Gálatas 6:7) Kantu N prende di amor ki Jeová i se Fidju, Jizus Kristu, ten pa nos, N kumesa ta muda nha manera di ser. N kumesa ta pensa ménus na nha kabésa, ta pensa más na otus algen i ta pasa más ténpu ku nha família.

 Un testu di Bíblia ki djuda-m txeu é Hebreus 13:5, ki ta fla: ‘Nhos manera di vive debe sta livri di amor pa dinheru, má nhos fika kontenti ku kes kuza ki nhos ten.’ Gósi, N ten pas i un konsénsia linpu. N ta xinti un alegria ki nunka N ka xintiba antis. Nha kazamentu sta más fórti i nha família sta mutu más unidu.

 Antis N ta atxaba ma pa nu sérba filís nu mesteba txeu dinheru. Má gósi, N ta odja ma krimi ku amor pa dinheru traze-m txeu sufrimentu. Anos é ka riku, má nu ten un kuza ki ten mutu más valor di ki dinheru, ki é nos amizadi ku Jeová. Nos é filís di verdadi pamodi nu sta unidu ta adora Jeová.