Nha família é di Tonga, un país ki ten uns 170 ilha, ki ta fika na Pasífiku. Nu tinha un vida sinplis na Tonga, sen lus i sen karu. Má nu tinha agu na nos kaza i nu tinha alguns galinha. Na férias di skóla, mi ku nhas dôs irmon, nu ta djudaba nos pai kuida di nos órta, ki tinha kuzas sima banana, inhami i mandióka. Nha pai ta bendeba kes verdura i el ta fazeba otus trabadju pa sustenta nos família. Sima txeu algen na kes ilha, nos família tinha grandi ruspetu pa Bíblia i nu ta baba igreja sénpri. Má simé, nu ta kriditaba ma úniku manera di nu ten un vida midjór éra mudaba pa un país más riku.

 Kantu N tinha 16 anu, nha tiu djuda nos família muda pa Kalifórnia, na Mérka. Foi txeu difísil nu kustuma ku kel kultura diferenti. Nbóra nos prubléma di dinheru midjora, nu ta moraba na un zóna póbri. La ta tinha krimis violéntu i txeu algen ta uzaba dróga. Txeu bês nu ta obiba tiru di noti i maioria di nos vizinhu tinha medu di kes grupu di bandidu. Txeu algen ta andaba ku pistóla pa es proteje ô pa es rezolve prublémas ku otus algen. Inda N ten un bala na petu pamodi un di kes géra.

 Na liseu, N kreba ser amigu di kes otu jóven. Poku-poku, N ba ta nvolve na féstas diskontroladu, na uza dróga ku bebida fórti i N bira violéntu. Sima ténpu ba ta pasa N fika visiadu na kokaína. N kumesa ta furta pa kunpra dróga. Nbóra nhas família ta baba sénpri pa igreja, nunka N ka resebe ninhun orientason ki pode djudaba mi aguenta preson di kolégas pa faze kuzas mariadu. Pulísia pega-m txeu bês pamodi nha konportamentu violéntu. Nha vida staba di kabésa pa baxu. N kaba pa bai pa kadia.

 Un dia, na anu di 1997, timenti N staba na kadia, otu prézu da kónta ma N tinha Bíblia na mô. Éra ténpu di Natal, ki é un ténpu sagradu pa maioria di gentis di Tonga. El pergunta-m si N sabia kuzê ki Bíblia ta fla sobri dia ki Jizus nase, má N ka sabia. El mostra-m un párti sinplis di Bíblia sobri dia ki Jizus nase i N da kónta ma Bíblia nen ka ta pâpia sobri txeu di kes kuza ki ta faze párti di kes kustumu di Natal. (Mateus 2:1-12; Lucas 2:5-14) N fika dimiradu i N fika ta pergunta sobri kuzê más ki Bíblia ta inxina. Kel otu prézu ta sistiba runions ki Tistimunhas di Jeová ta fazeba tudu simana na kadia, i N disidi bai sisti tanbê. Es staba ta studa livru di Apocalipse. Nbóra N ka ntende txeu kuza, N da kónta ma tudu kel ki es ta inxinaba staba na Bíblia.

 N fika kontenti kantu Tistimunhas di Jeová oferese-m un studu di Bíblia. Pa primeru bês, N prende sobri kel promésa di Bíblia di un paraízu li na Téra, ki ta ben ten na futuru. (Isaías 35:5-8) N ntende ma N tinha ki fazeba txeu mudansa na nha vida pa N pode agradaba Deus. N da kónta ma Jeová Deus ka ta dexaba mi entra na paraízu si N kontinuaba ku nhas vísiu. (1 Coríntios 6:9, 10) Nton, N disidi kontrola nha manera di ser violéntu, para di fuma i larga bebida ku dróga pa tudu ténpu.

 Na anu di 1999, antis di tirmina ténpu ki N dadu na kadia, autoridadis manda-m pa un kanpu ki imigrantis ta podu prézu. N ka odja Tistimunhas di Jeová pa más di un anu, má N staba disididu na kontinua ta faze mudansas. Na anu 2000, govérnu tra-m nha vistu pa sta na Mérka i N torna mandadu pa Tonga.

 Lógu dipôs ki N txiga na Tonga, N bai djobe Tistimunhas di Jeová i N kumesa ta studa Bíblia otu bês. N ta gostaba txeu di kuzas ki N staba ta prende i N fika dimiradu di odja ma kel ki Tistimunhas di Jeová na Tonga ta inxinaba tinha bazi na Bíblia sima kes ki Tistimunhas di Jeová na Mérka ta inxinaba.

 Nha pai éra konxedu na nos zóna pamodi el tinha un puzison di responsabilidadi na se igreja. Pur isu, na komésu nha família fika konfuzu i xatiadu pamodi N staba ta studa ku Tistimunhas di Jeová. Má dipôs, nha mai ku nha pai fika kontenti pamodi es odja ma kes prinsípiu di Bíblia staba ta djuda-m midjora nha vida.

 Pa mi, un di kes mudansa más difísil di faze tinha aver ku un bebida ki ta faze párti di nha kultura. Txeu ómi di Tonga ta gasta txeu óra tudu simana ta bebe kava, un bebida ki ta fazedu ku raís di pimenta, ki ta poi algen trankilu ti dimás. Nton, kantu N volta pa nha téra, N panha kustumu di bai pa un bar ki ta bendedu kava kuazi tudu dia di noti i bebe kava ti ki N ta fikaba moku. Un di kes prubléma éra amigus ki N tinha, ki ka ta daba valor pa kes prinsípiu di Bíblia. Dipôs, Tistimunhas di Jeová djuda-m odja ma kes kuza ki N staba ta faze ta ofendeba Deus. N faze mudansas pa N pode agradaba Deus i resebe se bensons.

 N kumesa ta sisti tudu runion di Tistimunhas di Jeová. Sta djuntu ku otus algen ki staba ta sforsa pa agrada Deus, djuda-m ka kai na tentason. Na anu di 2002, N batizadu kómu un Tistimunha di Jeová.

 N resebe txeu benson pamodi paxénxa ki Deus mostra-m, sima kel ki Bíblia ta fla: ‘Jeová ten paxénxa ku nhos, pamodi el ka krê pa ningen ser distruídu, má el krê pa tudu algen rapende.’ (2 Pedro 3:9) Dja dura ki el podia kaba ku es mundu mau i bédju, má el sta ta da ténpu pa algen sima mi ten un amizadi ku el. N gosta txeu di pensa ma el pode uza-m pa N djuda otus algen faze mudansas sima mi.

 Ku ajuda di Jeová, N pasa ta kontrola nha vida otu bês. N ka sta furta más pa sustenta un vísiu ki ta mata. Envês di kel-li, N ta tenta djuda otus bira amigu di Jeová. N konxe nha mudjer, Tea, na meiu di Tistimunhas di Jeová. Djuntu ku nos fidju, nu ten un família filís i nu ta inxina otus algen kuzê ki Bíblia ta fla sobri speransa di ben vive pa tudu ténpu na un paraízu di pas.