Txeu turista ki ta bai Filipinas, ta vizita kes kaxuera ki é txeu konxedu ki ta fika pértu di sidadi di Pagsanjan. É la ki nha pai, ki txoma Nardo Leron, kria. El éra póbri. Dipôs ki el odja txeu korupson na govérnu, na pulísia i na undi ki el ta trabadjaba, el bira runhu i txeu violéntu.

 Nha pai ku nha mai ta trabadjaba duru pa kria ses 8 fidju. Txeu bês, es ta fikaba fóra di kaza pa txeu ténpu, ta kuida di plantasons ki ta fikaba na montanhas. Nton, mi ku nha irmon Rodélio nu tinha ki tomaba kónta di nos kabésa i monti bês nu ta staba ku fómi. Kantu nos éra mininu nu tinha poku ténpu pa brinka. Nu kumesa ta trabadja na un plantason kantu nu tinha 7 anu di idadi. Nu ta karegaba kargas pizadu di koku na kaminhus txeu inklinadu i na montanhas. Óras ki un karga éra pizadu dimás pa nu karega-l, es ta obrigaba nos rasta-l.

 Nu tevi ki aguenta violénsia ki nos pai ta fazeba nos, má kuza ki más ta dueba nos éra odja-l ta sota nos mai. Nu ta tentaba inpidi-l, má nu ka ta konsigiba. Mi ku Rodélio nu faze planu di mata nos pai óras ki nu biraba más grandi. N tinha gana di ten un pai ki ta amaba nos!

 Pamodi violénsia ki nha pai ta fazeba, N fika dizanimadu i ku raiba, pur isu N sai di kaza kantu ki N tinha 14 anu di idadi. N vive un ténpu na rua i N kumesa ta uza padjinha. Dipôs N kumesa ta trabadja na boti pa leba turistas pa ba vizita kes kaxuera.

 Alguns anu dipôs, N kumesa ta studa na universidadi na Manila. Má, dja ki N tinha ki voltaba pa Pagsanjan pa bai trabadjaba na fins di simana, N tinha poku ténpu pa studa. Nha vida éra difísil i ka tinha obijetivu. Padjinha ka staba ta djuda-m más ku nhas preokupason. N kumesa ta uza otus drógas más fórti i tanbê kokaína i eroína. Kuazi sénpri drógas ta poba mi ta faze konportamentu seksual mariadu. N staba na meiu di pobréza, injustisa i sufrimentu. N ta odiaba govérnu, pur isu N ta kulpaba es pa tudu kuza ki staba ta kontise ku mi. N pergunta Deus: “Pamodi ki vida é si?” Má N ka atxa respósta na ninhun di kes relijion ki N bai. Pa N sukundi nha dizusperu, N kumesa ta uza dróga más txeu.

 Na anu di 1972, studantis di Filipinas organiza manifestasons kóntra govérnu. N partisipa na un di kes manifestason ki tevi txeu violénsia. Txeu algen podu prézu i alguns mês dipôs govérnu poi régras ki ta traba povu kuazi tudu liberdadi.

 N volta pa rua otu bês, má N staba ku medu di autoridadis pamodi N partisipa na kel manifestason. Pa sustenta nha vísiu na drógas, N kumesa ta furta i ta faze prostituison ku kes algen riku i ku stranjerus. N ka ta nportaba si N staba bibu ô si N moreba.

 Nha mai ku nha irmon más novu kumesa ta studa Bíblia ku Tistimunhas di Jeová. Nha pai fika ku txeu raiba i el kema tudu kes publikason di nha mai ku nha irmon. Má es ka para di studa Bíblia ti ki es batiza kómu Tistimunhas di Jeová.

 Un dia, un Tistimunha di Jeová pâpia ku nha pai sobri promésa ki sta na Bíblia sobri un futuru ki ta ben ten justisa di verdadi na mundu interu. (Salmo 72:12-14) Kel promésa la toka korason di nha pai txeu, ki el disidi kumesa ta studa Bíblia el sô. Na Bíblia, el ka atxa sô promésa di Deus di un govérnu justu, má tanbê kuzê ki Deus krê pa maridus i pa pai faze. (Efésios 5:28; 6:4) Poku ténpu dipôs, el bira Tistimunha di Jeová djuntu ku tudu nhas otu irmon. N staba lonji di kaza, pur isu N ka sabia di nada di kel-li.

 Na anu di 1978, N muda pa Austrália. Má mésmu na kel país la, ki éra kalmu i riku, N ka staba ta konsigi ten pas déntu mi. N kontinua ta bebe i ta uza drógas. Un ténpu dipôs na kel mésmu anu, Tistimunhas di Jeová vizita-m. N gosta di kel ki es mostra-m na Bíblia sobri un futuru di pas, má N ka sta mutu krê nvolveba ku es.

 Poku ténpu dipôs, N volta pa Filipinas pa alguns simana. Nhas irmon fla-m ma nos pai staba ta sforsa txeu pa el bira un algen midjór, má nha korason staba ku txeu ódiu pur isu N ivita pâpia ku el.

 Nha irman más pikinoti splika-m, através di Bíblia, pamodi ki vida é xeiu di sufrimentu i injustisa. N fika dimiradu di odja un adulesenti ku poku spiriénsa ta mostra-m respóstas pa nhas pergunta. Antis di N sai, nha pai da-m livru Poderá Viver Para Sempre no Paraíso na Terra. a El fla-m: “Para di fuji. Kel livru li ta ben djuda-u atxa kel ki bu sta ta buska.” Tanbê el fla-m pa N buska Tistimunhas di Jeová na Austrália.

 N obi konsedju di nha pai i N atxa un Salon di Reinu di Tistimunhas di Jeová pértu di nha kaza na Brisbane. N seta un studu di Bíblia. Profesias di Bíblia sima kes ki sta na Daniel kapítlu 7 i Isaías kapítlu 9 mostra-m ma govérnu di Deus, ki ka ten ninhun korupson, ta ben governa na futuru. N prende ma nu ta ben vive sábi na un paraízu na Téra. N kria faze vontadi di Deus, má N prende ma N tinha ki kontrola nhas sentimentus, para di uza drógas i di bebe i larga kel vida mariadu ki N tinha. N sipara di kel minina ki nu staba ta mora djuntu, i N larga nhas vísiu. Sima nha kunfiansa na Jeová ba ta fika más fórti, N ora pa el djuda-m faze otus mudansa.

 Poku-poku, N da kónta ma kel ki N staba ta prende podia transforma vida di algen. Bíblia ta fla ma ku sforsu, nu pode ‘bisti di kel manera di ser novu’. (Colossenses 3:9, 10) Sima N ba ta tenta faze kel-la, N da kónta ma kel ki N obi sobri mudansas ki nha pai staba ta faze podia ser verdadi. Envês di N xinti raiba ô di krê diskuti ku el, N kria faze pas ku el. Ti ki enfin N púrdua nha pai i N dexa pa tras kel ódiu ki N tinha désdi pikinoti.

 Kantu ki mi éra jóven, txeu bês N ta sigiba otus algen na ses konportamentu ki ta kaba ku algen ô ki ta prujudika algen. Má N odja ma konsedju ki Bíblia ta da é verdadi. Maus koléga ta straga bons ábitu mê. (1 Coríntios 15:33) N ranja amigus di kunfiansa entri Tistimunhas di Jeová i es djuda-m bira un algen midjór. Tanbê, entri es N konxe nha mudjer bunita ki txoma Loretta. Djuntu, nu ta inxina otus algen modi ki Bíblia pode djuda-s muda ses vida.

 Pamodi Bíblia, N odja nha pai ta bira un algen ki nunka N ka pensaba ma el ta biraba. El bira un maridu ki ta mostra amor pa nha mai, el bira umildi i un kriston ki ta ama vive na pas. Kantu ki nu nkontra dipôs ki N batiza kómu Tistimunha di Jeová na anu di 1987, nha pai brasa-m pa primeru bês na nha vida!

 Duránti más di 35 anu, nha pai kontinua ta trabadja djuntu ku nha mai na inxina otus algen speransa ki sta na Bíblia. El bira un algen trabadjador, ki ta mostra amor i el bira konxedu pamodi el ta djudaba otus. Duránti tudu kes anu, N prende ruspeta-l i ama-l. N ta xintiba orgulhu pamodi mi éra se fidju! El móre na anu di 2016, má N ta pensa na el ku amor. Mi ku el nu faze txeu mudansa na nos manera di ser timenti nu ba ta aplika kel ki Bíblia ta inxina. N ka sta xinti ninhun ódiu más. I N ta xinti gratidon di korason pamodi N atxa nha pai na Séu, ki é Jeová Deus, ki promete ma el ta ben kaba ku tudu prublémas ki famílias na mundu interu ta pasa pa el.