Madián i se mudjer Marcela tinha un vida sábi na Medellín, Kulónbia. Madián tinha un trabadju ki es ta pagaba el dretu, pur isu es ta moraba na un kaza bunitu. Dja ki es ta sirbiba Jeová, kontise un kuza ki pô-s ta pensa sobri kuzê ki éra más inportanti na ses vida. Es fla: “Na 2006 nu sisti asenbleia spesial ku téma ‘Mantenha seu olho singelo.’ Txeu di kes diskursu mostra ma é inportanti mante un vida sinplis pa pode faze más pa Jeová. Kantu asenbleia tirmina, nu da kónta ma nu ka staba ta faze si. Nu ta kunpraba kuzas dimás i nu tinha txeu dívida.”

 Kes diskursu ki Madián i Marcela obi na kel asenbleia djuda-s odja ma es meste fazeba mudansa pa es pode tinha un vida más sinplis. Es fla: “Nu kumesa ta gasta dinheru más poku. Nu muda pa un kaza más pikinoti, nu bende nos karu i nu kunpra un móta.” Es para di bai alguns lugar pa es ka fika ku gana di kunpra kuzas ki es ka mesteba. Es kumesa ta pasa más ténpu ta pâpia ku ses vizinhus sobri Bíblia. I es kumesa ta bira más amigu di kes algen ki éra pioneru spesial. a

 Poku ténpu dipôs, Madián i Marcela disidi faze mutu más pa Jeová, es muda pa un kongregason pikinoti fóra di sidadi ki mesteba di ajuda. Pa faze kel mudansa li Madián tevi ki larga se trabadju. Kel jerenti atxa ma el staba dodu. Nton Madián pergunta-l: “Bu ta ganha txeu dinheru, ka simé, má bo é filís?” Kel jerenti fla-l ma el ka éra filís, pamodi el tinha txeu prubléma ki el ka sta konsigi rezolveba. Nton Madián fla-l: “Más inportanti na vida é ka kantu dinheru ki bu ten, má é kuzê ki ta pô-u xinti filís di verdadi. Mi ku nha mudjer nos é filís óras ki nu ta inxina otus algen sobri Deus i nu ta xinti más kontenti inda pamodi nu krê faze más txeu na kel trabadju li.”

 Gósi Madián i Marcela sta kontenti di verdadi pamodi sirbi Deus é kuza más inportanti na ses vida. Na kes últimu 13 anu, es sta ta djuda na undi ki ten más nisisidadi ta apoia un kongregason na nórti di Kulónbia. Gósi es ten priviléjiu di ser pioneru spesial.