Dipôs ki Zarina batiza kómu Tistimunha di Jeová, el sai di Rúsia i el volta pa se país, ki ta fika na Ázia Sentral i el staba disididu na inxina se dôs fidju-fémia kes kuza ki el prendeba. Kómu el tinha poku dinheru, el ta moraba na un kaza, ki tinha sô un kuartu, djuntu ku se mai ku se pai, se irmon i mudjer di se irmon. Mai ku pai di Zarina fla-l pa el ka inxina se dôs fidju-fémia kes verdadi ki sta na Bíblia. Tanbê es fla fidjus di Zarina pa es ka pâpia ku ses mai sobri asuntus di Bíblia.

 Zarina pensa txeu sobri modi ki el podia djuda se dôs fidju-fémia prende sobri Jeová. (Provérbios 1:8) Nton el faze orason di korason pa Jeová, ta pidi-l pa el orienta-l i da-l sabedoria. Dipôs Zarina faze sima el pidi na se orason. El ta lebaba se dôs fidju-fémia pa pâsia i el ta pruvetaba pa pâpia ku es sobri kes kuza bunitu ki Jeová kria. Kel poku ténpu ki es ta baba pâsia, djuda se dôs fidju-fémia kria interesi na Kriador.

 Dipôs, Zarina pensa na un manera di inxina se fidjus más kuza através di livru O Que a Bíblia Realmente Ensina? a El ta kopiaba na un papel, kada parágrafu i kes pergunta, sima sta na livru. Tanbê el ta skrebeba otus frazi pa djuda se fidjus ntende kel asuntu midjór. Dipôs el ta sukundiba kes papel djuntu ku un lapis, dibaxu di mákina di laba ropa. Óras ki se fidjus tirminaba di lé kes parágrafu, es ta skrebeba ses respósta.

 Zarina konsigi studa dôs kapítlu di kel livru ku se fidjus di kel manera li. Dipôs es muda es três pa un otu lugar. La el fika livri pa kria se fidjus sen ten ningen pa inpidiba el. Na otubru di 2016, se dôs fidju-fémia batiza i es fika kontenti pamodi ses mai tevi sabedoria i ku kuidadu el inxina-s kes verdadi sobri Deus.