Artur, ki é un enkaregadu di grupu di kongregason na Ruménia, staba ta vizita un kongregason di Tistimunhas di Jeová. El da kónta ma irmons di kel kongregason ka staba ta partisipa na tistimunhu ku karinhu pa mostra kes publikason ku bazi na Bíblia. Pa insentiva kes irmon pa da tistimunha ku karinhu, Artur ku se mudjer Ana, djuntu ku un otu irmon ki txoma Jirair, bai da tistimunhu ku karinhu na un lugar ki tinha txeu algen na un sidadi pikinoti.

 Kes algen ki staba ta pasa kumesa ta mostra interesi i ta panha publikasons. Má lógu kes algen ki é kóntra Tistimunhas di Jeová kumesa ta repara na kel karinhu. Dôs padri txiga pértu di karinhu i un di es xuta kel karinhu. Dipôs, el da Artur un bafatada ki poi se óklus ta kai. Artur, Ana i Jirair tenta kalma kes padri, má es ka konsigi. Kes padri tenta kebra kel karinhu ku pé i es spadja kes publikason na txon. Dipôs di ofende kes Tistimunha di Jeová i di amiasa-s, kes padri ba ses kaminhu.

 Artur, Ana i Jirair bai pa skuadra di pulísia pa ba faze kexa. Dipôs di splika kes pulísia kuzê ki kontise, es pâpia un bokadinhu ku es i ku otus algen ki ta trabadja na skuadra sobri Bíblia. Kes três Tistimunha di Jeová lebadu pa skritóriu di kel xéfi di skuadra. Na komésu el krê sabeba sô kuzê ki kontise, má kantu kel xéfi di skuadra da kónta ma Artur é un ómi fórti i ma el ka briga kantu el dadu bafatada, el para di faze-l perguntas sobri kuzê ki kontise i el kumesa ta faze-l perguntas sobri kuzê ki Tistimunhas di Jeová ta kridita na el. Es tevi kuatu óra ta pâpia! Kel xéfi di skuadra fika txeu dimiradu ku kuzê ki el obi ki ti el fla: “Kel-li é un bon relijion! Talvês un dia N ta bira un Tistimunha di Jeová!”

 Na kel otu dia, kantu Artur volta pa tistimunhu ku karinhu, un ómi ki odja kuzê ki kontiseba na kel dia antis bai pâpia ku el. Kel ómi ilojia-l pamodi el kontinua kalmu i el ka briga ku kes padri. El fla ma kuzê ki el odja pô-l ta perde tudu ruspetu pa padris.

 Na kel noti, kel xéfi di skuadra torna txoma Artur pa bai skuadra. Má di es bês, envês di pâpia sobri kuzê ki kontise, el faze-l más pergunta sobri Bíblia. Más dôs pulísia ki staba la partisipa na kel konbérsu.

 Na kel otu dia, Artur torna vizita kel xéfi di skuadra i di es bês el mostra-l alguns vídiu ku bazi na Bíblia. Kel xéfi di skuadra txoma otus pulísia pa bai odja kes vídiu tanbê.

 Pamodi kes dôs padri staba xatiadu, txeu pulísia dadu un bon tistimunhu pa primeru bês, i kel-li pô-s ta ten un bon ideia sobri Tistimunhas di Jeová.