Bryn, ki ta vive na Karolina di Nórti, na Mérka, ta faze párti di un Kumison di ligason ku ospital. Kes kumison li ta trabadja djuntu ku kes ospital pa kuida di kes duenti ki é Tistimunha di Jeová.

 Pamodi COVID-19, txeu ospital ka sta dexa algen ba vizita duentis. Pur isu, Bryn txoma pa kel diretor ki ta organiza pa kes duenti i ses família resebe ajuda spritual pa odja modi ki el pode djudaba kes duenti ki éra Tistimunha di Jeová.

 Bryn konsigi pâpia ku sekretáriu di diretor. Dja ki el ka ta podia ba vizitaba kes duenti ki éra Tistimunha di Jeová, el pergunta si es podia daba kes duenti Tistimunha di Jeová se nunbru di tilifóni, asi pa el pode papiaba ku es. Es fla-l ma sin.

 El pensa tanbê na kes algen ki ta trabadja na ospital. El fla kel sekretáriu ma el ta daba txeu valor pa trabadju ki es staba ta faze i ma el ta speraba ma es staba dretu. Tanbê el fla ma dja el leba alguns informason ki ta mostra modi ki COVID-19 sta ta dexa pesoas txeu preokupadu, prinsipalmenti kes ki ta trabadja na ospital.

 Kel sekretáriu fla ma pamodi COVID-19 anbienti na ospital staba más difísil.

 Nton Bryn fla-l: “Nu ten un pájina na internet ki ten txeu informason ki pode djuda pesoas lida ku preokupason. Si bu bai na jw.org i bu skrebe ‘preokupason’ na kel párti di faze piskiza, bu ta atxa alguns artigu ki pode djuda nhos ki ta trabadja na ospital.”

 Timenti el staba ta pâpia, kel sekretáriu bai na jw.org, el skrebe palavra ‘preokupason’ na kel párti di faze piskiza i parse alguns artigu. Dipôs el fla: “Uau! N ta ba mostra diretor kel-li. Kel-li ta ben djuda-nu anos i otus algen. N ta ben inprimi alguns kópia i N ta da-s.”

 Alguns simana dipôs, Bryn pâpia ku kel diretor i el fla-l ma es vizita jw.org i es inprimi alguns artigu ki ta pâpia sobri preokupason i sobri otus asuntu. Es da kes artigu pa kes infermeru i otus algen ki ta trabadja na kel ospital.

 Bryn fla: “Kel diretor agradese-m pa nos bon trabadju i pa kes bon artigu. El fla ma es djuda-s txeu.”