Un Tistimunha di Jeová di Ázia, ki txoma Yanmei, djuda un mudjer ségu, ki txoma Mingjie, salta strada. a Mingjie fla-l: “Obrigadu. Deus ta abensua-u!” Yanmei pruveta pa pergunta-l si el ta gostaba di studa Bíblia. Mingjie seta i dipôs el fla Yanmei ma el ta oraba tudu dia ta pidi Deus pa djuda-l atxa relijion verdaderu. Má pamodi ki el sta ta oraba ta pidi kel-li?

 Mingjie splika Yanmei ma na anu 2008 el setaba un konviti di un se amiga, ki é ségu tanbê, pa bai pa un igreja ki ta djuda algen difisienti. Dipôs ki el obi un diskursu na kel igreja, Mingjie pergunta kel saserdóti di undi ki el tra kes frazi ki el pâpia di el na kel diskursu. Kel saserdóti fla-l ma el tra-s di Bíblia, ki é Palavra di Deus. Mingjie fika ku gana di lé Bíblia. Pur isu, el ranja un Bíblia interu na braili na xinês ki staba divididu na 32 párti i el le-l tudu na uns 6 mês. Timenti el staba ta lé Bíblia, Mingjie txiga konkluzon ma kel ensinu di Trindadi, ki kel igreja ta inxinaba é falsu i ma Deus ten un nómi, ki é Jeová.

 Má Mingjie kaba pa fika diziludidu ku konportamentu di kes algen di kel igreja. El da kónta ma es ka ta viveba di akordu ku kuzê ki el staba ta lé na Bíblia. Pur izénplu, es ta daba tudu algen kumida ki fazedu kel óra, má es ta daba réstu di kumida pa kes algen ségu. Mingjie fika txeu tristi ku kel injustisa li i el kumesa ta djobe otus igreja. É pur isu ki el staba ta faze orason ta pidi Deus pa djuda-l atxa relijion verdaderu.

 Mingjie seta studa Bíblia pamodi bondadi ki Yanmei mostra-l. Dipôs di un ténpu, el sisti un runion di Tistimunhas di Jeová pa primeru bês. El fla: “Nunka N ka ta skese di kel primeru runion ki N sisti. Irmons ku irmans resebe-m dretu. Kel-li toka nha korason. Es ta trata kunpanheru ku amor i é si ki es trata-m tanbê sikrê ami é ségu.”

 Mingjie kontinua ta faze prugrésu i el kumesa ta sisti tudu runion. Un di kes kuza ki más el gostaba éra kanta kántikus, má el ka ta konsigiba kanta dretu pamodi livru di kántiku ka staba na braili na xinês. Nton, el faze se própi livru di kántiku ku ajuda di irmons. El pasa 22 óra ta kôpia tudu kes 151 kántiku! Na mês di abril di anu 2018, Mingjie kumesa ta sai na pregason i el ta daba uns 30 óra pa mês.

 Pa djuda Mingjie pripara pa batiza, Yanmei grava perguntas i testus di Bíblia ki sta na livru Organizados para Fazer a Vontade de Jeová. Na mês di julhu di 2018, Mingjie batiza. El fla: “Amor ki irmons mostra-m na kel kongrésu toka nha korason. N staba uma kontenti ki N kumesa ta txora pamodi ti ki enfin N atxa relijion verdaderu.” (João 13:34, 35) Gósi, Mingjie sta disididu na mostra otus algen kel mésmu amor ki es mostra-l. Pa faze kel-li, el ta prega pa ténpu interu.