Saʼ li viernes 18 re agosto re li chihabʼ 2023, li hermaan José Luis Peña jun rehebʼ li wank saʼ li chʼuut li naril li qakʼanjel re Centroamérica kixkʼe chi naweʼk Li Santil Hu choʼq rehebʼ li Teʼwanq saʼ li Akʼ Ruuchichʼochʼ (Mateo toj Apocalipsis) saʼ qʼeqchiʼ. Kikʼemank chi naweʼk li Santil Hu saʼ li xbʼeen kutan re li nimla chʼutam «Chiwanq eekuyum!» li kiʼuxmank saʼ San Juan Chamelco, Alta Verapaz, Guatemala. Chixjunilebʼ li 590 chi qas qiitzʼin li xeʼwulak saʼ li nimla chʼutam xeʼxkʼul li Santil Hu aʼin. Kiʼelk saʼ jalan jalanq li kʼanjelobʼaal joʼ ajwiʼ saʼ yaabʼ kuxej ut chixjunilebʼ xeʼruuk xkubʼsinkil. Saʼ Guatemala ut saʼ Belice numenaq 1,300,000 nekeʼaatinak saʼ qʼeqchiʼ. Saʼebʼ li qakutan, saʼ li wiibʼ chi tenamit aʼin wank tana 520 aj puktesinel li nekeʼaatinak saʼ qʼeqchiʼ ut wankebʼ saʼ wuqlaju li chʼuut ut kaahibʼ li kokʼ chʼuut.

Wiibʼ oxibʼ li hermaan ixq ut winq xeʼxye naq li Santil Hu Mateo toj Apocalipsis tixtenqʼa ebʼ li qas qiitzʼin li nekeʼaatinak saʼ qʼeqchiʼ chi xtawbʼal chi tzʼaqal re ru li Raatin li Jehobʼa. Jun li hermaan ixq kixkʼe jun li eetalil chirix aʼin: «Saʼ Li Santil Hu choʼq rehebʼ li Teʼwanq saʼ li Akʼ Ruuchichʼochʼ li 1 Timoteo 1:11 naxchʼolobʼ naq li Jehobʼa aʼan «li Yos li sa saʼ xchʼool». Abʼanan saʼ wiibʼ oxibʼ li Santil Hu saʼ qʼeqchiʼ moko naxchʼolobʼ ta chi tzʼaqal re ru naq joʼkaʼin li xnaʼlebʼ li Jehobʼa. Anaqwan naru nawoksi li raqal aʼin re xjultikankil rehebʼ li qas qiitzʼin naq rikʼin xnawbʼal ru li Jehobʼa tqataw li sahil chʼoolejil usta wanko saʼ chʼaʼajkilal».

Chʼolchʼo chiqu naq li akʼ Santil Hu aʼin tixtenqʼa naabʼalebʼ laj qʼeqchiʼ li chaabʼilebʼ xchʼool chi xnawbʼal ru li Jehobʼa, chi xraabʼal ut chi roxloqʼinkil li Raatin (Proverbios 7:1, 2).