Li Santil Hu ak kixye chaq naq saʼebʼ li qakutan twanq ebʼ li yalok u, ninqi hiik, nimla yajel ut «xninqalebʼ eetalil» (Lucas 21:10, 11, Li Santil Hu, Sociedad Bíblica de Guatemala). Saʼ li qakʼanjel chiru li chihabʼ 2022 a xqakʼe reetal chi tzʼaqal re ru chanru li propesiiy aʼin yook chi tzʼaqlok ru. Joʼ eetalil, miyon chi poyanam kixchʼaʼajki li xwanjikebʼ xbʼaan li yalok u re Ucrania. Naabʼalebʼ li poyanam toj yookebʼ chaq chi elk saʼ li chʼaʼajkilal li kixkʼam chaq li nimla yajel COVID-19. Joʼkan ajwiʼ, naabʼalebʼ chik keʼxkʼul ebʼ li nimla rahilal, joʼ li nimla hiik aran Haití ut ebʼ li kaqsut-iqʼ aran Centroamérica, Filipinas ut sureste re África. Kʼaru keʼxbʼaanu ebʼ laj testiiw re li Jehobʼa re xtenqʼankilebʼ li keʼxkʼul li rahilal aʼin?

 Saʼ li qakʼanjel chiru li chihabʼ 2022, li qamolam kixbʼaanu naq teʼtenqʼaak li keʼxkʼul 200 chi ninqi rahilal. Kiʼoksimank 12 miyon chi dólar. b Qilaq chanru kiʼoksimank li tenqʼ re xtenqʼankilebʼ li poyanam li xeʼxkʼul wiibʼ li nimla rahilal.

 Saʼ 14 re agosto 2021, kikʼulmank jun li nimla hiik re 7,2 saʼ li sur re Haití. Ra xyeebʼal, naq wiibʼ li hermaan ixq ut jun li hermaan winq keʼkamk. Li nimla hiik aʼin kixkʼe saʼ chʼaʼajkilal li xjunxaqalilebʼ ut xkʼaʼuxebʼ. Jun laj Testiiw li naxkʼabʼai Stephane naxye: «Naabʼal li poyanam keʼkamk saʼ li tenamit, chiru wiibʼ po kiwank naabʼal muquk rajlal xamaan». Jun chik laj Testiiw, laj Éliézer, naxye: «Naabʼalebʼ laj Testiiw keʼkanaak chi maakʼaʼ rochochebʼ, xtʼikr, xxaabʼ ut jalan chik li kʼaʼaq re ru li naʼajmank chiruhebʼ. Ut, xbʼaan naq toj naʼekʼank bʼayaq li choch, naabʼalebʼ xeʼkanaak saʼ xxiw chiru naabʼal po».

 Saʼ junpaat, li qamolam kiʼok chi kʼanjelak. Li molam re Haití kixjekʼi ebʼ li kokʼ ochoch li yal kiyiibʼamank, loon, chʼaat, ebʼ li kargador re selular ut numenaq 53 toneladas chi tzekemq. Joʼkan ajwiʼ kiyiibʼamank ut kikabʼlamank numtajenaq 100 li ochoch. Kixkʼam naabʼal miyon chi dólar re xbʼaanunkil li kʼanjel aʼin.

 Ebʼ li qahermaan kʼajoʼ nekeʼbʼanyoxink. Li xLorette naxye: «Li nimla hiik kixsach chi junajwa li qochoch ut li qanaʼaj re kʼanjelak. Maakʼaʼ raj qatzemeq. Abʼan li xmolam li Jehobʼa junelik kiwank qikʼin re xkʼebʼal li kʼaru naʼajmank chiqu». Li xMicheline naxjultika: «Rikʼinebʼ li wiibʼ inkokʼal xoowank saʼ jun li ochoch li jwal qʼumet chik, joʼkan naq li nimla hiik kirekʼasi chiʼus. Li inkʼaʼ xinkanabʼ xbʼaanunkil aʼan tijok, ut xinkʼe reetal naq li Jehobʼa xinxsume rikʼin li xmolam. Saʼ xkʼabʼaʼ li tenqʼ ebʼ li hermaan, anaqwan wank jun li qochoch li jwal chaabʼil li inkʼaʼ chik naxkʼe qaxiw. Li Jehobʼa naabʼal naxbʼaanu chiwix, ut laaʼin nawaj xkʼutbʼesinkil junelik chiru naq kʼajoʼ ninbʼanyoxi».

 Ebʼ li nekʼejolomink re li tenamit nekeʼxkʼe reetal li tenqʼ li naqabʼaanu. Li najolomink re li poopol kabʼl re LʼAsile naxye: «Nawaj xkʼebʼal xsahil leechʼool xbʼaan naq saʼ junpaat xeʼxchalk chi tenqʼank. Ut moko kaʼaj tawiʼ aʼin!, junelik nekeʼroxloqʼi ebʼ laj jolominel. Kʼajoʼ nawulak chiwu rilbʼal naq nekeekʼe eechʼool chirixebʼ li poyanam ut maawaʼ chirix li tumin. Nakʼutunk naq nekeebʼaanu chixjunil aʼin xbʼaan li rahok».

 Saʼ li 24 re enero 2022, li kaqsut-iqʼ Ana kiwulak saʼ Mozambique ut moqon saʼ Malaui. Li kaqsut-iqʼ kixkʼam chaq kawil habʼ ut iqʼ chiru 100 kilómetros (62 millas) rajlal hoor. Kixchup li kaxlan xaml, kixjukʼ ebʼ li qʼa ut naabʼal li bʼutʼ.

 Numenaq 30.000 testiiw re li Jehobʼa re Malaui ut Mozambique keʼtochʼeʼk ajwiʼ xbʼaan li kaqsut-iqʼ. Laj Charles, jun li hermaan li natenqʼank naq wank li rahilal naxye: «Ra kiwekʼa. Naq kiwil li rahilal li xeʼxkʼul ebʼ li hermaan ut chixjunil li kisachʼeʼk re, kʼajoʼ naq kixtochʼ inchʼool». Joʼkan ajwiʼ, li xtzekemqebʼ ut li xʼawimq kixsach xbʼaan li kaqsut-iqʼ. Naabʼalebʼ ajwiʼ keʼkanaak chi maakʼaʼ rochochebʼ. Ut, ra ajwiʼ xyeebʼal naq kikamk li rixaqil jun li hermaan ut li xwiibʼ chi rabʼin; naq li jukubʼ bʼarwiʼ yookebʼ chi xik kixkʼe bʼueelt saʼ haʼ.

 Li kaqsut-iqʼ jwal yiibʼ tzʼaqal ru. Tuqtuuq qʼoqyink saʼ Nchalo, Malaui, li junkabʼal Sengeredo keʼrabʼi ut keʼxxuwak naq yook chaq chi nachʼok chi kaw li haʼ chire li rochoch. Ut wiibʼ li nimaʼ kibʼutʼunk! Li hermaan Sengeredo kixye naq li xjunkabʼal tento teʼxkanabʼ li rochoch. Jwal chaabʼil kinaʼlebʼak xbʼaan naq tojeʼaq relikebʼ, li haʼ kixtʼan li rochoch ut chixjunil li wank chisaʼ kixkʼam li nimaʼ. Li junkabʼal keʼxik saʼ li Chʼutlebʼaal Kabʼl li moko najt ta wank chixkʼatq li rochoch, abʼan anaqwan wiibʼ hoor keʼbʼayq re wulak. Jwal juntzʼuqebʼ ut lubʼlukebʼ naq xeʼwulak, abʼan maakʼaʼ xeʼxkʼul.

 Ebʼ li molam re Malaui ut Mozambique saʼ junpaat keʼxkʼubʼ re xtenqʼankilebʼ. Keʼxpatzʼ rehebʼ li cheekel winqʼ li nekeʼulaʼanink chʼuut ut ebʼ li cheekel winq naq teʼril kʼaru naʼajmank chiruhebʼ li hermaan li xeʼxkʼul li rahilal ut xkawresinkil li xchʼoolebʼ ut li xpaabʼal. Xeʼxchʼutubʼ ribʼ ebʼ li jalan jalanq chi chʼuut re tenqʼank re rilbʼal ebʼ li kʼanjel. Saʼ xkʼabʼaʼ aʼin, chiru bʼabʼay hoonal ebʼ li hermaan xeʼxtikibʼ xkʼulbʼal li xtzekemqebʼ ut naabʼal chik li kʼaʼaq re ru li naʼajmank chiruheb. Kiʼoksimank numenaq 33,000 chi dólar re xtenqʼankilebʼ li poyanam ut numenaq 300,000 chi dólar re xyiibʼankil malaj xkabʼlankil ebʼ li ochoch.

 Ebʼ li chʼuut re tenqʼank keʼroksi li tenqʼ tumin chiʼus, xbʼaan naq chixjunil kiterqʼuuk. Joʼ eetalil, chiru ebʼ li wuqubʼ po chalen naq kitiklaak li kʼanjel re tenqʼank, li xtzʼaq li hariin, li jwal aajel ru rajlal kutan aran Malaui kitaqeʼk 70%. Joʼkan ajwiʼ kitaqeʼk xtzʼaq li gasoliin. Re xkʼulankil bʼayaq li tumin, ebʼ li hermaan xeʼxloqʼ chi naabʼal li tzekemq rehebʼ laj kʼayinel re li teep. Joʼkan naq, kiʼkubʼeq bʼayaq xtzʼaq ut inkʼaʼ keʼxtoj re xkʼambʼal chaq.

 Chixjunil aʼin naxtochʼebʼ xchʼool ebʼ li hermaan. Laj Felisberto, jun li hermaan re Mozambique, naxye: «Maajunwa wilom junaq li molam li jwal naʼsiʼok: teexkʼe aakʼanjelobʼaal re kabʼlak, aabʼelebʼaal chʼiichʼ, aj kʼanjelebʼ, tzekemqebʼ ut teexkʼut chaawu rikʼin rahok». Jun tzʼaqal eetalil chirix li rahok li kiʼaatinak wiʼ li Jesús saʼ Juan 13:34, 35». Li xʼEster, jun li malkaʼan re Malaui ut kixtzʼeq li rochoch, naxseeraqʼi: «Yook raj inkʼaʼuxl! Maakʼaʼ raj intumin re xyiibʼankil jun chik li wochoch. Naq keʼwulak ebʼ li hermaan ut keʼxyiibʼ jun li wochoch, chanchan tawiʼ naq ak wankin saʼ li Akʼ Ruuchichʼochʼ».

 Naq toj maajiʼ nawulak li Akʼ Ruuchichʼochʼ, tnumtaaq ebʼ li nimla rahilal (Mateo 24:7, 8). Abʼan, bʼanyox re li tenqʼ li nekeʼxkʼe, chʼolchʼo chiqu naq li xtenamit li Jehobʼa junelik tixkʼul li tenqʼ li naʼajmank. Saʼ donate.pr418.com teʼril chanru teʼruuq xkʼebʼal li tenqʼ. Qʼaxal naqabʼanyoxi leetenqʼ tumin li nekeekʼe!