Li Santil Hu kixye chi rubʼelaj naq saʼ «xraqik li ruuchichʼochʼ», teʼyaloq «tenamit rikʼin jalan chik tenamit» ut twanq jalanq jalanq li rahilal saʼ li qasutam (Mateo 24:3, 7). Ut li propesiiy aʼin xtzʼaqlok ru saʼ li chihabʼ 2023. a Saʼ numenaq jun siʼeent chi tenamit xwank li yalok u ut jalan jalanq li rahilal saʼ li qasutam, usta joʼkan ebʼ laj testiiw re li Jehobʼa xeʼxkʼutbʼesi li xrahom li Yos. Chanru xeʼxbʼaanu?

 Saʼ li chihabʼ 2023, ebʼ li qahermaan ra xeʼxkʼul xbʼaan numenaq wiibʼ siʼeent li rahilal li kichalk saʼ xkʼabʼaʼ li habʼ, li iqʼ, li xaml malaj saʼ xkʼabʼaʼ li winq. Joʼkan naq li xmolam ebʼ laj testiiw re li Jehobʼa xeʼroksi li tenqʼ tumin ut xeʼxsach numenaq lajeebʼ miyon chi dolar b re xtenqʼankilebʼ li xeʼxkʼul li rahilal. Saʼ xyanq aʼin moko wank ta saʼ ajl li tumin li xeʼxkʼe li hermaan re xtenqʼankilebʼ li rechtenamitul. Kʼe reetal chanru xʼoksimank li tumin li xaakʼe re xtenqʼankilebʼ li hermaan li ra xeʼxkʼul saʼ wiibʼ li nimla rahilal li tojeʼ xnumeʼk.

 Saʼ wiibʼ oxibʼ li teep re Nigeria ak re, naq nawank li bʼutʼ chiru li habʼalqʼe. Abʼanan, li bʼutʼ li xeʼnumeʼk saʼ octubre 2022 qʼaxal kaw wiʼ chik kixkʼe chiru li xeʼnumeʼk lajeebʼ chihabʼ rubʼelaj aʼin. Numenaq 946,400 manzaan (676,000 hectáreas) chi awimq kisachk ut numenaq wiibʼ miyon li qas qiitzʼin xeʼxkanabʼ li rochoch. Saʼ junpaat, li qamolam re Nigeria kixxaqabʼ wiibʼ oxibʼ li chʼuut re xtenqʼankilebʼ li hermaan rikʼin li naʼajmank chiruhebʼ joʼ ajwiʼ re xkawresinkilebʼ xpaabʼal.

•   7,505 aj puktesinel xeʼxkanabʼ li rochoch.

•   860 li ochoch xeʼpoʼeʼk malaj xeʼtʼaneʼk.

•   90 li Chʼutlebʼaal Kabʼl ut jun li naʼaj bʼarwiʼ naʼuxk li nimla chʼutam xeʼbʼutʼunk.

 Xqasach numenaq 250,000 dólar re xtenqʼankilebʼ li xeʼxkʼul li rahilal. Li tumin aʼin kikʼanjelak:

•   Re xloqʼbʼal li tzekemq joʼ li aroz, li kenqʼ ut li fideey.

•   Re xloqʼbʼal li naʼajmank saʼ ochoch joʼ li kolchon malaj li pabʼeyon.

•   Re xyiibʼankil malaj xxaqabʼankil ebʼ li ochoch li xeʼtʼaneʼk.

 Kʼaru nekeʼxbʼaanu ebʼ li hermaan re roksinkil chiʼus li tenqʼ tumin? Xbʼeenwa, nekeʼril chiʼus li junjunq chi ochoch re rilbʼal ma kaʼajwiʼ naʼajmank xyiibʼankil li xpoʼeʼk malaj xkabʼlankil junaq chik. Wi naʼajmank xkabʼlankil junaq chik li ochoch, nabʼaanumank joʼ chanru nekeʼxkabʼla li rochoch ebʼ li qas qiitzʼin saʼ li teep.

 Ebʼ li hermaan li xeʼtenqʼaak qʼaxal xeʼxbʼanyoxi li xbʼaanumank chirixebʼ. Jun li hermaan ixq naxye: «Li bʼutʼ kixjal li qawanjik xbʼaan naq chixjunil li qawimq, ebʼ li qaketomq ut li qochoch kisachk. Abʼan, kʼajoʼ naq xsahoʼk saʼ qachʼool naq xeʼwulak ebʼ li hermaan re qatenqʼankil chiru ajwiʼ li kutan aʼan ut xeʼxkʼe qanaʼaj bʼarwiʼ tookanaaq. Ut xsahoʼk ajwiʼ saʼ qachʼool naq xqakʼul li tzekemq li kixtaqla chaq li qamolam. Xqil chi kutankil saʼ li qayuʼam chanru natzʼaqlok ru Juan 13:34 ut 35. Nasach qachʼool rilbʼal chixjunil aʼin ut chʼolchʼo chiqu naq wank li tzʼaqal rahok. Linjunkabʼal ut laaʼin naqaj xyeebʼal eere chi anchal qachʼool: bʼanyox eere naq xeʼxkʼulunk chi qatenqʼankil tzʼaqal saʼ xhoonalil».

 Ebʼ li qas qiitzʼin nekeʼxkʼe ajwiʼ reetal li nabʼanumank chirixebʼ li ra xeʼxkʼul. Aran Sabagreia (xteepal Bayelsa), jun li qawaʼchin li nataqlank saʼ li kʼalebʼaal kixye: «Saʼ li ruuchichʼochʼ wank naabʼal li molam ut li paabʼal, abʼan kaʼajwiʼ ebʼ laj testiiw re li Jehobʼa nekeʼxbʼaanu li kʼanjel aʼin. Leemolam aʼan jun rehebʼ li qʼaxal chaabʼil saʼ chixjunil li ruuchichʼochʼ».

 Saʼ febrero 2023 kikʼat numenaq 400 li naʼajej saʼ li tenamit Chile. Li xnimal li naʼajej li kikʼat naxqʼax 602,000 manzaan (430,000 hectáreas) ut xjukʼeʼk ajwiʼ wiibʼ oxibʼ xninqal ru ochoch. Ut 8,000 tana li qas qiitzʼin xeʼxkanabʼ li rochoch. Naq ak xnumeʼk chixjunil, li qamolam kixtaqla li tenqʼ saʼ li tenamit aʼan.

•   222 aj puktesinel xeʼxkanabʼ li rochoch.

•   20 li ochoch xeʼjukʼeʼk chi junajwa.

 Xqasach numenaq 200,000 dólar re xtenqʼankilebʼ li xeʼxkʼul li rahilal. Li tumin aʼin kikʼanjelak:

•   Re xloqʼbʼal li tzekemq ut li haʼ.

•   Re xloqʼbʼal li gasoliin, li kʼaʼaq re ru re chʼajok ut mesok joʼ ajwiʼ li bʼan.

•   Re xyiibʼankil ebʼ li ochoch li xeʼpoʼeʼk.

 Naq jun li junkabʼal kixnaw naq kikʼat li xkʼay ut li rochoch, mem xeʼkanaak. Xeʼkanaak saʼ nebʼaʼil ut saʼ xnumikebʼ li kutan, kichʼaʼajkoʼk chiruhebʼ rilbʼal naq saʼ li xparseel maakʼaʼ chik nayoʼlaak. Abʼan, naq xeʼok xkabʼlankil wiʼ chik li rochoch, sa chik xeʼrekʼa ribʼ. Li rahok li xeʼxkʼutbʼesi ebʼ li hermaan li xeʼwulak chi tenqʼank qʼaxal kixtenqʼahebʼ chi xnumsinkil li rahilal li xeʼxkʼul. Ut aʼin xʼekʼasink rehebʼ chi okenk saʼ xyanqebʼ re xkabʼlankil li rochoch jalanebʼ chik ebʼ li hermaan.

 Naabʼalebʼ li hermaan nekeʼsach xchʼool chi rilbʼal chanru natenqʼank li qamolam naq nawank junaq li rahilal. Jun li hermaan kixye: «Li chʼuut li natenqʼank naq nawank junaq li rahilal aʼan jun li maatan li naxkʼe qe li Jehobʼa. Saʼ xkutankil li rahilal ak wankebʼ aran re qatenqʼankil rikʼin li naʼajmank chiqu. Yaal naq nasahoʼk qachʼool rabʼinkil chanru nekeʼtenqʼank ebʼ li hermaan saʼ jalan chik tenamit naq nawank junaq rahilal. Abʼan naq laaʼat yookebʼ aatenqʼankil; qʼaxal nakaawoxloqʼi li xmolam li Jehobʼa. Nakaabʼanyoxi ajwiʼ naq ebʼ li hermaan nekeʼxkʼam re rikʼin li Jehobʼa ut nekeʼxkʼe xchʼool chaawix re naq kawaq laajunkabʼal, laapaabʼal ut laachʼool. Naqil chi kutankil li xrahom li Jehobʼa».

 Tnumtaaq ebʼ li rahilal naq yooq chi nachʼok li xraqik ebʼ li kutan aʼin (Lucas 21:10, 11). Abʼanan, li Jesukriist li qaʼawabʼej twanq qikʼin «wulaj wulaj toj reetal twulaq ebʼ li kutan li tixkʼutbʼesi naq nachʼ wank li xraqik li ruuchichʼochʼ», ut tixbʼaanu aʼin rikʼin li chʼuut (Mateo 28:20). Naq rajlal nakaakʼe laatenqʼ tumin choʼq re li xkʼanjel li Yos saʼ donate.pr418.com malaj saʼ jalan chik li kʼanjelobʼal ut nakaakʼe laahoonal ut laametzʼew, yookat chi okenk chirix li Awabʼej ut li Xʼawabʼejilal. Bʼanyox eere ex qechpaabʼanel xbʼaan naq nekexkʼehok chi yoʼon!