«Chiru bʼeleelaju chihabʼ yookin roybʼeninkil!». Kʼaru yook roybʼeninkil li qahermaan? Li Santil Hu Traducción del Nuevo Mundo de las Escrituras Griegas Cristianas saʼ li raatinobʼaal, bengalí. Naabʼalebʼ nekeʼxye aʼin naq naʼelk li Santil Hu Traducción del Nuevo saʼebʼ li raatinobʼaal. Abʼan, ma xaakʼoxla junsutaq joʼkʼihal li kʼanjel naʼajmank re xbʼaanunkil aʼin?

 Xbʼeen, naxaqabʼamank jun li chʼuut bʼeresinbʼil xbʼaan li chʼuut li naril li naxkawresi li qapaabʼal re li Nekeʼjolomink re Xmolam li Jehobʼa. Joʼkʼihal li hoonal naʼajmank re xjalbʼal li Santil Hu saʼ jalan chik aatinobʼaal? Laj Nicholas Ahladis li nakʼanjelak rikʼinebʼ li nekeʼxkʼanjela li jalok aatin aran Warwick (Nueva York), naxye: «Naʼok jalan jalanq li naʼlebʼ. Jun rehebʼ, jarubʼ ebʼ laj jalol aatin teʼokenq saʼ li kʼanjel, li xchʼaʼajkil ru li aatinobʼaal ut ma li teʼiloq re li Santil Hu nekeʼxnaw chanru li yuʼam junxilaj. Joʼkan ajwiʼ ma najalaak li aatinobʼaal saʼ junjunq ebʼ li naʼajej. Wank sut, chiru jun chʼuut aj jalol aatin naʼajmank jun malaj oxibʼ chihabʼ re xjalbʼal li Santil Hu Escrituras Griegas Cristianas ut numenaq kaahibʼ chihabʼ xjalbʼal chixjunil li Santil Hu. Ut choʼq re li inkʼaʼ nekeʼabʼink ut li inkʼaʼ nekeʼaatinak naxkʼam naabʼal chik li hoonal re xjalbʼal li Santil Hu».

 Re xjalbʼal li Santil Hu moko kaʼaj tawiʼ naʼajmank ebʼ laj jalol aatin, naʼajmank ajwiʼ jun chʼuut ebʼ li hermaan li teʼxyaabʼasi re naq teʼril ma natawmank ru. Ebʼ li hermaan aʼin jalan jalanq xtenamitebʼ ut xwanjikebʼ. Li nekeʼxye nakʼanjelak re rilbʼal ma natawmank ru ut tzʼaqal re ru li tzʼiibʼanbʼil. Jun li hermaan li naxkawresi ebʼ laj jalol aatin aran Sudáfrica, naxye: «Ebʼ laj jalol aatin nekeʼxnaw naq tento teʼxbʼaanu jun chaabʼil kʼanjel choʼq re li Jehobʼa ut choʼq rehebʼ li nekeʼilok re li Santil Hu».

 Naq naraqmank li kʼanjel re xjalbʼal li Santil Hu aajel ru risinkil chi huhil. Re xbʼaanunkil aʼin naʼajmank lajeebʼ li kʼaʼaq re ru: hu, bʼon, xlanbʼal rix, li naletzʼok, xkawubʼresinkil li xlanbʼal rix, li xbʼonol plaat, li kokʼ kʼaam, li nachapok re, li karton re xyi rix ut li xkawresinkil re naq najt tixkuy. Saʼ li chihabʼ 2019 xsachmank numenaq 20 miyon re dólar re xloqʼbʼal chixjunil aʼin. Ut saʼ ajwiʼ li chihabʼ aʼan ebʼ li hermaan xeʼkʼanjelak numenaq 300,000 hoonal re risinkil chi huhil ut xtaqlankil ebʼ li Santil Hu.

 Kʼaʼut naqasach naabʼal li hoonal ut tumin saʼ li kʼanjel aʼin? Laj Joel Blue li nakʼanjelak rikʼin li nekeʼril li naʼlebʼ li naʼelk chi huhil, naxye: «Xbʼaan naq li hu li qʼaxal wank xwankil choʼq qe aʼan li Santil Hu». Ut naxye ajwiʼ: «Naqaj naq tkʼemanq xloqʼal li Yos ut li esil li naqapuktesi».

 Ut naqayiibʼ ajwiʼ ebʼ li Santil Hu Traducción del Nuevo Mundo choʼq rehebʼ li inkʼaʼ nekeʼilok. Joʼ li Traducción del Nuevo Mundo saʼ braille li natawmank saʼ lajeebʼ chi aatinobʼaal. Re xyiibʼankil jun li Santil Hu saʼ braille naʼajmank 8 hoonal ut wi naqatus chixjunil li xhu 2.3 meetr (7.5 ft) li xnimal. Xqakʼubʼ ajwiʼ jun li Santil Hu choʼq rehebʼ li preex li wankebʼ bʼarwiʼ kaʼajwiʼ naru roksinkil ebʼ li hu li inkʼaʼ kaw li rix.

 Li Santil Hu Traducción del Nuevo Mundo nawulak toj saʼ xchamal xchʼool ebʼ li nekeʼilok re. Qilaq li kikʼulmank saʼ li chʼuut li naʼaatinak kiluba li wank saʼ li teep La Tombe (República Demócratica del Congo). Xnajtil li teep aʼin 1,700 kilómetros (1,000 millas) rikʼin li tenamit. Jun ajwiʼ li Xsantil Hu ebʼ li hermaan saʼ kiluba ut moko natawmank ta ru ut ebʼ li hermaan re xkawresinkil junaq li kʼanjel re li chʼutam nekeʼxtoʼoni chiribʼilebʼ ribʼ li Santil Hu. Abʼan, chalen li po agosto 2018, chixjunilebʼ wank rikʼinebʼ li Santil Hu Traducción del Nuevo Mundo saʼ li aatinobʼaal kiluba, li natawmank ru.

 Jun li hermaan ixq li naʼaatinak saʼ alemán naxye chirix li Santil Hu Traducción del Nuevo Mundo, li kiʼakʼobʼresimank saʼ li raatinobʼaal: «Moko ninye ta chik naq tento tinyaabʼasi li Santil Hu. Anaqwan ninkʼoxla: “Joqʼe chik tintaw linhoonal re xyaabʼasinkil wiʼ chik?”». Jun li preex kixtzʼiibʼa: «Xeʼxkʼe we jun li Santil Hu Traducción del Nuevo Mundo ut yook xjalbʼal linyuʼam. Naq xinyaabʼasi li Santil Hu aʼin, xintaw ru chiʼus li Raatin li Yos. Nawaj raj xnawbʼal ruhebʼ laj testiiw re li Jehobʼa ut kʼaru tento tinbʼaanu re naq tinwanq joʼ jun rehebʼ».

 Ebʼ li nekeʼxyaabʼasi li Santil Hu Traducción del Nuevo Mundo nekeʼxbʼanyoxi li tenqʼ tumin li nakʼemank re xkʼubʼankil li tasal hu aʼin. Li tenqʼ aʼin nekeʼxkʼe ebʼ li hermaan saʼ chixjunil li ruuchichʼochʼ. Nabʼaanumank rikʼin ebʼ li naʼlebʼ li wank saʼ donate.pr418.com. Bʼanyox li tenqʼ li nekeekʼe chi anchal eechʼool.