JUNELIK AJʼAJAQ QU!

2022: Li chihab’ b’arwi’ xnumtaak li ch’a’ajkilal | K’aru naxye li Santil Hu?

XKʼEBʼAL CHI EKʼANK RIKʼIN

Sa’ li chihab’ 2022, rajlal xqab’i resil chirix li yalok u, li ch’a’ajkilal rik’in li tumin ut eb’ li nimla rahilal. Ab’anan, ka’ajwi’ li Santil Hu naxch’olob’ k’aru tz’aqal xyaalal li yook chi k’ulmank.

Li xyaalalil li xk’ulmank chaq sa’ li chihab’ 2022

Jo’ naxye li Santil Hu, li xk’ulmank chaq sa’ li chihab’ xnume’k, naxk’ut chiqu naq wanko sa’ «rosoʼjikebʼ li kutan» (2 Timoteo 3:1, Li Santil Hu, Sociedad Bíblica de Guatemala, SBG). Li kutan a’in kitiklaak sa’ li chihab’ 1914. K’e reetal chanru li toje’ xk’ulmank, naxchap rib’ rik’in li kixye li Santil Hu naq tk’ulmanq sa’eb’ li qakutan:

«Teerab’ihatq [...] resil li yalok» (Mateo 24:6).

«Sa’ li chihab’ 2022, Europa xril wi’ chik li rahilal li naxk’am chaq li yalok u». a

Chaawil li na’leb’ «Li tenamit Rusia naʼok chi pleetik rikʼin li tenamit Ucrania».

«Taawanjeʼq weʼej» (Mateo 24:7).

«2022: Li chihab’ b’arwi’ xnumtaak li we’ej». b

Chaawil li na’leb’ «Li yalok u saʼ Ucrania kixbʼaanu naq qʼaxal tnumtaaq li weʼej».

«Taawanjeʼq [...] yajel» (Lucas 21:11).

«Eb’ li yajel jo’ li poliomielitis, li xyajel li max ut li COVID-19 toj yookeb’ chi qarahob’tesinkil. A’an reetalil naq xiwxiw ru eb’ li letz’b’il yajel a’in ut naq maak’a’ qawankil re xq’axb’al ruheb’». c

Chaawil li na’leb’ «Xeʼkamk 6 miyon li kristiʼaan xbʼaan li COVID-19».

«Saʼ li choxa teʼwanjeʼq xninqalebʼ eetalil» (Lucas 21:11).

«Li kawil saq’ehil, li chaqi’el, li xk’atik li k’iche’ ut li nimla b’ut’. Li chihab’ 2022 tjultikamanq sa’ xk’ab’a’ naq q’axal xjalaak li qasutam ut a’in kixk’am chaq li sachk xb’aan naq sa’ chixjunil li Ruuchich’och’ ke’kamk chi naab’al mil eb’ li poyanam ut chi miyon ke’sachk eb’ li rochoch». d

Chaawil li na’leb’ «Qʼaxal tiq wiʼ chik ru li kutan saʼ chixjunil li Ruuchichʼochʼ».

«Teerab’ihatq resil [...] li mululij ib’» (Lucas 21:9).

«Li xmaak’a’il li tumin ut naq xterq’u li k’a’aq re ru sa’ li chihab’ 2022, kixb’aanu naq eb’ li poyanam te’po’q rik’ineb’ li awab’ej ut naq te’oq xmululinkil rib’eb’». e

Chaawil li na’leb’ «Chixjunil xterqʼu xtzʼaq saʼ ruuchichʼochʼ».

K’aru tk’ulmanq sa’ li jun chik chihab’?

Maa’ani nanawok re li tk’ulmanq sa’ li chihab’ 2023. Ab’an naqanaw naq chi seeb’ li X’awab’ejilal li Yos tixchaab’ilob’resi li Ruuchich’och’ (Daniel 2:44). Li awab’ejilal a’in tixrisi li rahilal ut tixb’aanu naq t-uxq li rajom li Yos sa’ li Ruuchich’och’ (Mateo 6:9, 10).

Naqawaklesi aach’ool naq taapaab’ li na’leb’ li kixk’e li Jesús chi xk’eb’al reetal li xtz’aqlojik eb’ li propesiiy li wank sa’ li Santil Hu (Marcos 13:37). B’aanu usilal, choo’aab’oq re xtzolb’al chanru li Santil Hu naru tatxtenq’a anaqwan ut chanru naxk’e aawe ut re laajunkab’al li tz’aqal oyb’enihom cho’q re li kutan chalkeb’ re.

a Jill Lawless: “2022 Was Year the Horror of War Returned to Europe”, AP News, 8 re diciembre 2022.

b “Una crisis alimentaria mundial”, Programa Mundial de Alimentos.

c Lawrence O. Gostin, JD: “Living in an Age of Pandemics—From COVID-19 to Monkeypox, Polio, and Disease X”, JAMA Health Forum, 22 re septiembre 2022.

d Martina Igini: “What’s Behind the Record-Breaking Extreme Weather Events of Summer 2022?”, Earth.Org, 24 re octubre 2022.

e Thomas Carothers y Benjamin Feldman: “Economic Anger Dominated Global Protests in 2022”, Carnegie Endowment for International Peace, 8 re diciembre 2022.