Saʼ junio 2022 li najolomink re li molam li naril li tumin saʼ ruuchichʼochʼ (Grupo del Banco Mundial) kixye: «Saʼ chixjunil li ruuchichʼochʼ wank chʼaʼajkilal rikʼin li tumin». «Saʼ junpaat yook chi terqʼuuk xtzʼaq li junkabʼlal ut chixjunil li naʼajmank, li qas qiitzʼin maakʼaʼebʼ chik xtumin».

 Li Fondo Monetario Internacional kixye: «Xterqʼuuk xtzʼaq li gasoliin ut li tzekemq ut aʼin qʼaxal naxchʼaʼajki ebʼ li tenamit li nebʼaʼebʼ».

 Li Santil Hu naxkʼut kʼaʼut naq yooko xnumsinkil li chʼaʼajkilal aʼin saʼebʼ li qakutan, chanru tooruuq xnumsinkil ut chanru ttuqubʼaaq ru chi junajwa aʼin.

•    Li Santil Hu naxkʼabʼaʼi li qakutan joʼ «rosoʼjikebʼ li kutan» (2 Timoteo 3:1, Li Santil Hu, Sociedad Bíblica de Guatemala, SBG).

•    Li Jesús kixye naq «xiwajelaq rilbʼal li taakʼulmanq» saʼebʼ li qakutan (Lucas 21:11, SBG). Naabʼalebʼ li qas qiitzʼin nekeʼxuwak naq nekeʼril naq yook chi terqʼuuk chixjunil xbʼaan naq inkʼaʼ nekeʼxnaw li kʼaru tkʼulmanq ut ma teʼruuq tawiʼ xchʼolaninkil li xjunkabʼal.

•    Saʼ li hu Apocalipsis ak kiyeemank chanru tterqʼuuq chixjunil saʼebʼ li qakutan. «Kiwabʼi jun xyaabʼ kux [...] kixye: —Naru xloqʼbʼal wiibʼ liibʼr li triiw chiru li tojlebʼ li re jun kutan ut naru xloqʼbʼal waqibʼ liibʼr li sebʼaad chiru li tojlebʼ li re jun kutan» (Apocalipsis 6:6, Li Santil Hu, Wycliffe Bible Translators. Akʼ tzʼiibʼ).

 Re xtawbʼal xkomon li naʼlebʼ chirixebʼ li «rosoʼjikebʼ li kutan» ut li propesiiy li wank saʼ li hu Apocalipsis chaawil li bʼideo Chalen li chihabʼ 1914 kijalaak xwanjik li Ruuchichʼochʼ ut chaawil ajwiʼ li naʼlebʼ «Kʼaru xyaalal li kaahibʼ li wankebʼ saʼ xbʼeen li kawaay li naʼaatinak wiʼ li hu Apocalipsis?».

•    «Ebʼ li poyanam teʼkabʼlaq ut teʼwanq chisaʼ; teʼawq uubʼ ut teʼxtzeka li ru. Moko teʼkabʼlaq ta ut jalan ta chik taawanq chisaʼ, chi moko teʼawq ut jalan chik taayaloq xsahil li ru» (Isaías 65:21, 22, SBG).

•    «Numtajenaqaq li awimq saʼ ruuchichʼochʼ, heetanqebʼ saʼ xbʼeenebʼ li loqʼlaj tzuul» (Salmo 72:16, SBG).

•    «Saʼ xkʼabʼaʼ naq rahobʼtesinbʼil li toqʼobʼ ru, saʼ xkʼabʼaʼ naq yo chi yaabʼak li nebʼaʼ, laaʼin tinwakliiq» chan li Jehobʼa a (Salmo 12:6, SBG).

 Chi seebʼ li Yos trisi chixjunil li rahilal li nachalk chirix li tumin, moko kaʼaj tawiʼ saʼ laatenamit saʼ chixjunil bʼan li ruuchichʼochʼ. Re xnawbʼal chanru tixbʼaanu, chaawil li naʼlebʼ «Ma juntaqʼeetaq li xwanjikebʼ li kristiʼaan saʼ junaq kutan?».

 Li Santil Hu naru nakatxtenqʼa ajwiʼ anaqwan chi xnumsinkil li kutan usta chixjunil terto. Chanru naxbʼaanu? Naxkʼe aanaʼlebʼ chirix kʼaru tatruuq xbʼaanunkil re roksinkil chiʼus laatumin (Proverbios 23:4, 5; Eclesiastés 7:12). Re xnawbʼal xkomon chirix aʼin, chaawil li naʼlebʼ «Kol rix laatumin» ut «Kʼaru taabʼaanu re xkubʼsinkil laasachomq».