Na’oyb’enimank naq 5,000 miyon eb’ li poyanam te’ril li Copa Mundial re li FIFA, li tb’aanumanq sa’ li 20 re noviembre toj sa’ li 18 re diciembre 2022. Naab’aleb’ neke’xk’oxla naq li b’atz’unk jo’ a’in moko ka’aj tawi’ tixjunaji li poyanam li neke’xik chi ilok.

•   «Li b’atz’unk wank xwankil re xjalb’al li Ruuchich’och’, naxjunaji eb’ li poyanam ut narek’asiheb’ chi xb’aanunkil li chaab’il na’leb’» (Nelson Mandela, li kiwank cho’q awab’ej re Sudáfrica).

•   «Li fútbol [...] najunajink sa’ li oyb’enihom; sa’ li sahil ch’oolejil, sa’ li rahok ut naq juntaq’eet naril chixjunileb’» (Gianni Infantino, li najolomink re li FIFA). a

 Ma naru li Copa Mundial malaj jalan chik b’atz’unk xtawb’al li chaab’il na’leb a’in? Ma relik chi yaal naru xtawb’al li tuqtuukilal ut li junajil?

 Li Copa Mundial re li chihab’ a’in, moko ka’aj tawi’ b’atz’unk fútbol. Xk’am chaq li wech’ij ib’ sa’eb’ li awab’ejilal chirix li xk’ulub’eb’ li poyanam, li sik’ok u ut xtz’eqtaanankileb’ li maak’a’eb’ xtumin.

 Usta jo’kan, naab’aleb’ neke’xk’oxla naq li b’atz’unk li na’uxmank sa’ chixjunil li Ruuchich’och’ jo’ li Copa Mundial, naxb’aanu naq li poyanam te’rajsi ruheb’. Usta a’an li neke’raj, eb’ li b’atz’unk a’in moko naxjunaji ta eb’ li poyanam chi junelik. Naxb’aanu b’an naq rajlal te’risi chi kutankil chanru li xk’a’uxeb’ ut xna’leb’eb’ li naxk’am chaq jachok ib’ sa’ xyanqeb’. Ak yeeb’il chaq sa’ li Santil Hu chirix a’in ut a’an reetalil naq wanko «sa’ roso’jikeb’ li kutan» (2 Timoteo 3:1-5, Li Santil Hu, Sociedad Bíblica de Guatemala, SBG).

 Li Santil Hu na’aatinak chirix chanru xtawb’al li junajil sa’ li Ruuchich’och’. Naxyeechi’i naq chixjunileb’ li poyanam te’wanq sa’ junajil rub’el xwankil jun li awab’ejilal li naxk’ab’a’i «li xnimajwal awab’ejihom li Yos» (Lucas 4:43, SBG; Mateo 6:10).

 Li awab’ej re li awab’ejilal a’an, a’ li Jesús, tixb’aanu naq twanq tuqtuukilal sa’ chixjunil li Ruuchich’och’. Li Santil Hu naxye:

•   «Chi’atz’umaq li tiikil ch’oolej naq wanq chi awab’ejil; k’ajo’aq li tuqtuukilal» (Salmo 72:7, SBG).

•   «Xb’aan naq a’an taakoloq re li neb’a’ li yo chi tz’aamank [...]. A’an taa’isinq reheb’ sa’ li raasa ut li rahob’tesiik» (Salmo 72:12, 14, SBG).

 Toj sa’ li qakutan, li xk’utum li Jesús ak xjunaji chi miyon eb’ li poyanam sa’ 239 chi tenamit ut teep, ut yook xtenq’ankileb’ chi risinkil sa’ xch’ooleb’ li xik’ ilok. Re xnawb’al xkomon, tz’il rix eb’ li jalan jalanq chi na’leb’ «Qamich’aq sa’ qach’ool li xik’ ilok».