Joʼ kixye li nimla molam chirix li kawilal (OMS) saʼ li 23 re mayo 2022, 6.27 miyon chi qas qiitzʼin keʼkamk xbʼaan li COVID-19. Abʼanan, saʼ jun li esil li kiʼisimank saʼ li 5 re mayo 2022, li nimla molam chirix li kawilal kixye naq qʼaxal naabʼal wiʼ chik li kristiʼaan li keʼkamk. Kixye naq chiru li chihabʼ 2020 ut 2021 «li xkʼihalil li kristiʼaan li keʼkamk xbʼaan li COVID-19 [...] kachʼin chik ma 14.9 miyon». Ma wank kʼaru naxye li Santil Hu chirix aʼin?

•    Li Jesús kixye naq twanq ebʼ li nimla «yajel» saʼ li qʼehil li nakʼabʼaʼiik «rosoʼjikebʼ li kutan» (Lucas 21:11, Li Santil Hu, Sociedad Bíblica de Guatemala, SBG; 2 Timoteo 3:1, SBG).

 Li propesiiy li kixye li Jesús yook chi tzʼaqlok ru saʼebʼ li qakutan. Re xnawbʼal xkomon chirix aʼin, chaawil li naʼlebʼ «Kʼaru reetalil naq wanko “saʼ rosoʼjikebʼ li kutan”?».

•    «Li Yos qʼaxal aj kʼojobʼanel chʼoolej. Aʼan nakʼojobʼank qachʼool saʼ chixjunil li qarahilal» (2 Corintios 1:3, 4, SBG).

 Naabʼalebʼ li qas qiitzʼin li ak xeʼkamk xkomon xeʼxtaw xkʼojobʼankil xchʼool saʼ li Santil Hu. Re xnawbʼal xkomon chirix aʼin, chaawil li naʼlebʼ «Kʼaru xbʼaanunkil re xqʼaxbʼal ru li rahil chʼoolej: Li naʼlebʼ li tatxtenqʼa» ut «Li tenqʼ choʼq rehebʼ li rahebʼ saʼ xchʼool».

•    «Chichalq ta laanimajwal awabʼejihom, chiʼuxq ta laawajom arin saʼ ruuchichʼochʼ joʼ saʼ choxa» (Mateo 6:10, SBG).

 Chi seebʼ «li xnimajwal awabʼejihom li Yos» tixbʼaanu naq ttzʼaqloq ru ebʼ li aatin aʼin: «Maajun chik saʼ qayanq tixye: “Yajin”» (Marcos 1:14, 15, SBG; Isaías 33:24, SBG). Re xnawbʼal xkomon chirix li awabʼejilal aʼin ut li tixbʼaanu, chaawil li bʼideo Kʼaru tzʼaqal Xnimajwal Awabʼejilal li Yos?

 Naqaj naq taatzol li Santil Hu re naq laaʼat ut laajunkabʼal teetaw rusilal li chaabʼil naʼlebʼ li wank chisaʼ ut li xyeechiʼom li Yos.