Li Santil Hu moko naxye ta naq li Armagedón a’an jun li pleet li tk’ulmanq sa’ junaq li na’ajej. Naxye b’an naq a’an li hoonal naq li Yos tyaloq u rik’ineb’ li awab’ej sa’ chixjunil li ruuchich’och’.

•   «Ebʼ li propesiiy aʼin chalenaq rikʼinebʼ li maaʼus aj musiqʼej […] nekeʼxbʼaanu sachbʼachʼoolej re xchʼutubʼankil ebʼ li awabʼej choʼq re li yalok li twanq saʼ xnimal xkutankil li Nimajwal Yos […]. Ut xeʼchʼutubʼaak ebʼ li awabʼej saʼ li naʼaj li naxkʼabʼaʼi saʼ hebreo Armagedón» (Apocalipsis 16:14, 16).

 Li aatin Armagedón chalenaq sa’ li aatinob’aal hebreo Har Meghiddóhn li naraj xyeeb’al «tzuul re Meguidó». Meguidó a’an jun li tenamit li kiwank sa’ li najter Israel. Jo’kan naq naab’aleb’ li kristi’aan neke’xk’oxla naq li Armagedón twanq aran Israel. Ab’anan, li na’ajej Meguidó chi moko chixjunileb’ li teep li wankeb’ b’arwi’ na’ok li saq’e aran Asia (Oriente Próximo), te’tz’aqloq raj re xch’utub’ankil «ebʼ li awabʼej re chixjunil li ruuchichʼochʼ» ut eb’ laj puub’ li neke’okenk chirixeb’.

 Li hu Apocalipsis kitz’iib’amank sa’ eetalil malaj rik’in k’utb’esink (Apocalipsis 1:1). Li Armagedón moko a’an ta jun na’ajej arin sa’ Ruuchich’och’, a’an b’an li hoonal naq eb’ li awab’ej re chixjunil li ruuchich’och’ neke’xch’utub’ rib’ re xq’etb’al rib’ chiru li X’awab’ejilal li Yos (Apocalipsis 19:11-16, 19-21).