Naab’aleb’ li poyanam, usta neke’xye naq aj paab’aneleb’, neke’xk’oxla naq maak’a’ chik xwankil eb’ li na’leb’ li wank sa’ li Santil Hu chirix li muxuk ib’ ut li sumlaak. Re xk’ulub’ankil li neke’xpaab’ anaqwan li poyanam, junjunq eb’ li iklees xe’xjal eb’ li na’leb’ ut ink’a’ chik neke’xk’ut li neke’xk’ut chaq junxil chirix b’ar wank li us ut li ink’a’ us. Jo’kan naq, ma toj wank xwankil eb’ li na’leb’ li wank sa’ li Santil Hu? Wank. Qilaq k’a’ut. 

 Re xnawb’al b’ar wank li us ut li ink’a’ us, na’ajmank chiqu jo’ poyanam naq li Yos tooxb’eeresi. Jo’kan tz’aqal xooxyob’tesi. Li Santil Hu naxye: «Ninnaw naq li winq […] moko sa’ ruq’ wank li xb’eenik» (Jeremías 10:23, Li Santil Hu, Sociedad Bíblica de Guatemala, SBG). Yaal naq li Jehob’a a xooxyob’tesi re naq tqasik’ k’aru xb’aanunkil, ab’an ink’a’ kixk’e qe li seeb’al chi moko li wankilal re xsik’b’al qajunes qib’ b’ar wank li us ut li ink’a’ us. Li Yos naraj naq tqak’ojob’ qach’ool rik’in (Proverbios 3:5).

 Eb’ li xchaab’il na’leb’ li Yos wank sa’ li Santil Hu. Qilaq wiib’ xyaalal k’a’ut naq wankeb’ tz’aqal xwankil.

•   Li Yos kiyob’tesink qe. (Salmo 100:3) A’an naxnaw chi tz’aqal re ru li na’ajmank chiqu re naq sahaq sa’ qach’ool, ut re naq us wanq li qajunxaqalil li qak’a’uxl ut li naqek’a. Ut jo’kan ajwi’ naxnaw li k’aru tqak’ul wi ink’a’ nokoo’ab’ink chiru (Gálatas 6:7). Li Jehob’a naraj li us cho’q qe. Jo’kan naq sa’ li Santil Hu naxye: «Nink’ut chawu li k’aru us cho’q aawe, ut nakatinb’eres sa’ li b’e tento taak’am» (Isaías 48:17, SBG).

•   Li qach’ool naru nokooxb’alaq’i. Naab’aleb’ li poyanam neke’xk’oxla naq re xnawb’al b’ar wank li us ut li ink’a’ us ka’ajwi’ te’xpaab’ li naxye li xch’ooleb’, naraj xyeeb’al, li neke’rataw ut li neke’rek’a. Ab’an, li Santil Hu naxye naq «q’axal aj b’alaq’ li xch’ool li poyanam, k’ajo’ xyib’al ru chiru chixjunil li k’a’aq re ru» (Jeremías 17:9, SBG). Wi li qach’ool ink’a’ naxb’eeresi rib’ rik’in li xna’leb’ li Yos, tooxk’am chi xb’aanunkil li yib’ru aj na’leb’ li tooxrahob’tesi (Proverbios 28:26; Eclesiastés 10:2).

 Ink’a’, moko us ta. Li Santil Hu naxk’ut chiqu li yaal chirix li Yos ut naxye chanru naraj naq toona’leb’aq (1 Corintios 6:9-11; Gálatas 5:19-23). A’an naraj naq eb’ li poyanam te’xnaw chirix li yaal (1 Timoteo 2:3, 4). Jo’kan naq eb’ li neke’k’amok b’e, tento naq te’xk’ut li naxk’ut tz’aqal li Raatin li Yos (Tito 1:7-9).

 Naab’aleb’ li poyanam ink’a’ neke’raj xb’eeresinkil rib’ rik’in eb’ li na’leb’ li wank sa’ li Santil Hu, jo’kan naq neke’xsik’ jun li paab’al b’arwi’ «te’xye reheb’ li neke’raj rab’inkil» (2 Timoteo 4:3). Ab’an, li Santil Hu naxye chi ch’olch’o ru li na’leb’ a’in: «Ra chaalel sa’ eeb’een li nekexyehok us re li ink’a’ us» (Isaías 5:20, SBG). Li Yos traqoq aatin sa’ xb’eeneb’ li neke’k’amok b’e sa’eb’ li paab’al li ink’a’ neke’xk’ut chiruheb’ li poyanam li naxye li Yos chirix b’ar wank li us ut li ink’a’ us.

 Ink’a’. Eb’ li poyanam li neke’raj xb’aanunkil li nawulak chiru li Yos, neke’xk’am re rik’in li Jesús ut rik’in li xk’utum. Ut li Jesús kixk’ut chiruheb’ li xtzolom naq ink’a’ te’raqoq aatin sa’ xb’eeneb’ li junch’ol, naq te’xra ut te’roxloq’i chixjunileb’ li poyanam (Mateo 5:43, 44; 7:1).

 Eb’ li xtzolom li Jesús tento naq te’xyu’ami eb’ li xchaab’il na’leb’ li Yos li wank sa’ li Santil Hu. Ab’anan tento ajwi’ naq te’xk’ulub’a naq eb’ li poyanam naru te’xsik’ li b’e li neke’raj xk’amb’al (Mateo 10:14). Li Jesús moko kixk’e ta xwankileb’ re roksinkil li xna’leb’eb’ li awab’ej malaj junaq chik na’leb’ re xminb’aleb’ li poyanam re naq te’xyu’ami li xchaq’rab’ li Yos (Juan 17:14, 16; 18:36).

 Naqataw rusilal anaqwan ut sa’eb’ li kutan chalkeb’ re naq naqak’e qaq’e chi xb’eeresinkil qib’ jo’ naxye li Yos (Salmo 19:8, 11). A’in junjunq reheb’ li rusilal:

•   Sahaq tz’aqal sa’ qach’ool (Proverbios 29:6).

•   Wank sa’ amiiwil rik’in li Yos (Proverbios 3:32).

•   Li Yos tooxtenq’a sa’ eb’ li ch’a’ajkilal (Proverbios 11:8).

•   Naru toowanq chi junelik sa’ li Ruuchich’och’ (Salmo 37:29).