Naab’aleb’ neke’xye naq xk’oxlankil naq junaj ru te’ile’q li kristi’aan, a’in yal matk’enb’il.

•   «Li tz’eqtaanank kaw nak’utunk sa’eb’ li molam, sa’ xwanjikeb’ li tenamit, ut yalaq b’ar sa’ xyu’ameb’ li qas qiitz’in. Aʼin tzʼaqal naxbʼaanu naq maakʼaʼaq li junaqik saʼ xyanqebʼ li tenamit» (António Guterres, li nataqlank saʼ li molam Naciones Unidas).

 Ma ttawmanq saʼ junaq kutan li junaqik saʼ xyanqebʼ li kristiʼaan? Kʼaru naxye li Santil Hu?

 Li Santil Hu naxchʼolobʼ chanru narilebʼ li Yos li kristiʼaan li jalan jalanq xtenamitebʼ.

•   «Rikʼin jun chi winq [li Yos] kixyoobʼtesi chixjunilebʼ li tenamit re naq teʼwanq junsut junrubʼel choxa» (Hechos 17:26, Li Santil Hu, Sociedad Bíblica de Guatemala, SBG).

•   «Li Yos juntaqʼeet narilebʼ chixjunil ut sa naxkʼul chixjunilebʼ li nekeʼpaabʼank re ut nekeʼxbʼaanu li tiikilal, aʼ yaal kʼaʼ chi tenamitul yoʼlajenaqebʼ wiʼ» (Hechos 10:34, 35, SBG).

 Li Santil Hu naxye naq chixjunileb’ li poyanam yob’tesinb’ileb’ xb’aan li Yos ut a’an naxk’ulub’a chixjunileb’ li poyanam a’ yaal k’a’ xtenamitul li junjunq.

 Li X’awab’ejilal li Yos, a’an jun choxahil awab’ejilal, li tixk’am chaq li junaqik. Li awab’ejilal a’in tixk’ut chiruheb’ li poyanam chanru te’xk’am rib’ sa’ usilal. Eb’ li poyanam te’xtzol chanru te’risi sa’ xch’ool li tz’eqtaanank.

•   Sa’ li Ruuchich’och’ «ebʼ li poyanam [te]ʼxtzol wank saʼ tiikilal» (Isaías 26:9, SBG).

•   «Li xkʼanjel li tiikilal aʼan li wank saʼ tuqtuukilal, ut li naruuchin li kʼulubʼej aʼan li sahil wank ut li kawil chʼoolej chi junajwa» (Isaías 32:17, SBG).

 Sa’eb’ li qakutan, chi miyon eb’ li kristi’aan ak yookeb’ xtzolb’al sa’ li Santil Hu chanru xk’amb’al rib’eb’ sa’ usilal ut roxloq’inkileb’ li junch’ol.

•   Wi taawaj xnawb’al xkomon li na’leb’, chaawil li hu Ajsi aawu!, li naxk’ab’a’i «Ma wank xb’anol li tz’eqtaanank?».

•   Re xnawb’al chanru eb’ li na’bej yuwa’bej te’ruuq aatinak rik’ineb’ li xkok’al chirix li na’leb’ a’in, chaawil li na’leb’ «Chanru tat-aatinaq rik’ineb’ laakok’al chirix li tz’eqtaanank?».