Li xyib’aleb’ ru xna’leb’ li qas qiitz’in rajlal yook chi numtaak: eb’ li yaj neke’xchaj re sa’ xb’een laj b’anonel, eb’ li neke’wulak sa’eb’ li na’aj b’arwi’ neke’k’ayin tib’elwa neke’xwech’ rix eb’ laj k’ay, eb’ li neke’b’i’ajiik sa’ avión q’axal josq’eb’ ut neke’xsak’ eb’ li neke’k’anjelak aran, ut eb’ li kok’al li yib’eb’ ru xna’leb’ neke’xse’e eb’ laj k’utunel ut neke’xyeechi’i xkamsinkileb’. Wankeb’ ajwi’ li neke’awab’ejink li k’ajo’ xyib’al ru li neke’xb’aanu ut wankeb’ junch’ol chik li junelik neke’xye naq chaab’ileb’ xna’leb’.

 Li Santil Hu naxch’olob’ k’aru tz’aqal naraj xyeeb’al na’leb’ak chi’us, ut naxk’utb’esi ajwi’ k’a’ut naq maak’a’ chik neke’roxloq’i eb’ li kristi’aan.

 Sa’ chixjunil li ruuchich’och’, li xyib’aleb’ ru xna’leb’ li qas qiitz’in rajlal yook chi numtaak, ink’a’ chik na’oxloq’iik li us ut li chaab’il na’leb’.

•   Naq xe’patz’e’k reheb’ li qas qiitz’in aran Estados Unidos chirix li chaab’il na’leb’ xe’xye naq maa’ani chik naroxloq’i li chaab’il na’leb’ jo’ nab’aanumank chaq 22 chihab’ anaqwan.

•   Sa’ 28 chi tenamit kipatz’mank ajwi’ re 32.000 chi poyanam ut numenaq xyiijachil ke’xye naq anaqwan maab’ar na’ilmank li oxloq’ink.

 Li Santil Hu ak kixye chaq naq sa’ li qakutan yib’aqeb’ ru xna’leb’ eb’ li qas qiitz’in.

•   «Sa’ xraqik eb’ li kutan kawaq li wank ut qʼaxal chʼaʼajkaq xnumsinkil. Xbʼaan naq ebʼ li qas qiitzʼin kaʼajwiʼ aʼanebʼ teʼxra ribʼ; teʼxrahi ru li tumin, teʼxnima ribʼ, [...] inkʼaʼ chik teʼabʼinq chiru li xnaʼ xyuwaʼ, inkʼaʼ chik teʼbʼanyoxinq ut teʼxtzʼeqtaana li ras riitzʼin. Inkʼaʼ chik teʼxra ribʼ chiribʼilebʼ ribʼ joʼ junkabʼal, inkʼaʼ chik teʼxkʼe ribʼ saʼ aatin, teʼyoobʼanq aatin chirixebʼ li junchʼol, inkʼaʼ chik teʼxkuy ribʼ, chanchanaqebʼ li xul li qʼaxal josqʼebʼ, teʼxtzʼeqtaana li us» (2 Timoteo 3:1-3).

 Wi nakaawaj xnawb’al chanru yook chi tz’aqlok ru li propesiiy a’in, chaawil li tzolom «Ma kixye chaq li Santil Hu chanru te’na’leb’aq eb’ li qas qiitz’in sa’ li qakutan?».

 Usta k’ajo’ xyib’al ru xna’leb’eb’ li qas qiitz’in sa’ chixjunil li ruuchich’och’, chi miyon eb’ li poyanam ak xe’xtzol sa’ li Santil Hu chanru xchaab’ilob’resinkil li xna’leb’. Li chaab’il na’leb’ li naxk’ut chiqu paab’ajel anaqwan ut chi junelik (Salmo 111:8). Qilaq wiib’ oxib’ li eetalil:

•   Xraqal li Santil Hu: «Bʼaanumaq rehebʼ li junchʼol li teeraj naq tbʼaanumanq eere» (Mateo 7:12).

   Xyaalal: Tento raj tqileb’ li junch’ol sa’ xyaalal ut tqoxloq’iheb’ jo’ naqaj raj naq te’xb’aanu qe.

•   Xraqal li Santil Hu: «Anaqwan naq xeekanabʼ li bʼalaqʼik, li junjunq tixye li yaal re li ras riitzʼin» (Efesios 4:25).

   Xyaalal: Tento naq paab’ajelaq li qaatin ut li qab’aanuhom. 

 Taataw xkomon li na’leb’ chirix a’in sa’:

•   Laj K’aak’alehom «K’aru tooxtenq’a re xb’aanunkil li us?».

•   Sa’ li tzolom «Ma nokooxtenq’a li Santil Hu chi xkuyb’al chanru neke’na’leb’ak eb’ li junch’ol?».