Ma nakaakʼos laasachomq xbʼaan naq maakʼaʼ aatumin? Li nimla yajel, li rahilal, ebʼ li awabʼej ut li yalok u maare tixbʼaanu naq saʼ junpaat tmaakʼaʼoq li tumin. Aʼin naru naxkʼe qakʼaʼuxl abʼan li xnaʼlebʼ li Santil Hu tooxtenqʼa.

 Li Santil Hu naxye: «Xintzol jun li naʼlebʼ [...] aʼ yaal ma kachʼin malaj naabʼal wank we» (Filipenses 4:12).

 Usta anaqwan yal kachʼin ajwiʼ laatumin tzol xkʼulubʼankil naq xjalaak laawanjik. Us raj naq taakʼulubʼa ut taajal laanaʼlebʼ re naq chi joʼkan joʼ junkabʼal texruuq xqʼaxbʼal ru aʼin.

 Ma wank junaq li tenqʼ li naxkʼe li awabʼej malaj jalan chik li molam? Wi wank us raj naq saʼ junpaat taapatzʼ xbʼaan naq moko junelik ta nawank aʼin.

 Li Santil Hu naxye: «Maajun kʼanjel nachʼolaak naq maakʼaʼ kʼuubʼank. Us naʼelk li kʼaru kʼuubʼkʼu xbʼaan naabʼalebʼ aj kʼehol naʼlebʼ» (Proverbios 15:22, Li Santil Hu, Sociedad Bíblica de Guatemala, SBG).

 Aatinan chirix li naʼlebʼ aʼin rikʼin laasumʼaatin ut rikʼinebʼ laakokʼal. Aʼin naru teʼxtenqʼa saʼ li naʼajmank cheeru. Wi teekʼe eechʼool chi xkʼosbʼal leesachomq wanq chik bʼayaq leetumin.

 Li Santil Hu naxye: Bʼir rix laasachomq (Lucas 14:28).

 Naq junaq naxkʼos li xsachomq aajel ru naq tixnaw chanru tixsach li xtumin. Joʼkan naq aajel ru naq tixbʼir rix. Xbʼeenwa tixtzʼiibʼa li naxkʼul chiru li po moqon tixtzʼiibʼa li xsachomq chiru li po ut chanru naxsach li xtumin. Saʼ xyanq li xsachomq tixkʼe li tumin li t-ajmanq wi tkʼulmanq junaq li rahilal.

 Li tatruuq xbʼaanunkil: Naq taatzʼiibʼa laasachomq us raj naq taakʼe saʼ ajl ebʼ li kokʼ loqʼom. Maare tsachq aachʼool rilbʼal li nasachmank saʼebʼ li kʼaʼaq re ru aʼin. Jun eetalil, naq ak kixtzʼil rix li sachomq jun li winq kixkʼe reetal naq naxsach naabʼal li tumin chi xloqʼbʼal li toqʼ.

 Li Santil Hu naxye: «Chʼolchʼooq cheeru kʼaru qʼaxal wank xwankil» (Filipenses 1:10).

 Juntaqʼeeta laatojbʼal rikʼin laasachomq ut kʼe reetal kʼaru moko aajel ta ru. Qatzʼilaq rix ebʼ li naʼlebʼ aʼin:

•   Li bʼelebʼaal. Wi naabʼal laakaar, ma naru taakʼayi junaq? Wi mas terto ma naru taajal rikʼin li kubʼenaq xtzʼaq? Malaj tatruuq xchapbʼal aabus malaj xik saʼ bʼisikleet?

•   Li ilok. Ma naru taakanabʼ xtojbʼal li cable re tele, li satélite malaj li internet chiru wiibʼ oxibʼ po? Ma wank junaq chik li kubʼenaq xtzʼaq?

•   Li natojmank. Aatinan joʼ junkabʼal chirix li xtzʼaq li haʼ, li lus ut li gasoliin. Xchupbʼal li lus ut atink saʼ junpaat naru nakatxtenqʼa re naq wank bʼayaq chik laatumin.

•   Li tzekemq. Us raj naq taakʼubʼ laatzekemq ut inkʼaʼ yal taaloqʼ. Tzʼiibʼa li taakʼubʼ ut loqʼ chi naabʼal re naq tatruuq roksinkil li relaʼ. Tzʼiibʼa li taaloqʼ ut loqʼ li tzekemq naq kubʼenaq xtzʼaq ut maaloqʼ li tzekemq li naru tatxkʼe chi yajerk. Ma naru tat-awq?

•   Li tʼikr. Loqʼ reqaj laatʼikr naq ak xqʼeloʼk li nakaawoksi. Loqʼ li kubʼenaq xtzʼaq, li ak oksinbʼil chik (paca). Hel laatʼikr chiru saqʼe wi chaabʼil li kutan chi joʼkan moko naʼajmank ta junaq li secadora.

•   Li tloqʼmanq. Naq toj maajiʼ nakatloqʼok, kʼoxla aʼin: «Ma wank xtzʼaq? Ma naʼajmank chiwu?». Ma toj naru nawoksi li nawaj xjalbʼal? Ma naru ninkʼayi li inkʼaʼ chik nawoksi? Xbʼaanunkil aʼin naru nakatxtenqʼa re naq wank chik bʼayaq laatumin.

 Li tatruuq xbʼaanunkil: Wi saʼ junpaat nekeʼxkʼos laatojbʼal, maare aʼan li hoonal bʼarwiʼ tatruuq xkanabʼankil xloqʼbʼal ebʼ li kʼaʼaq re ru li terto xtzʼaq joʼ li may, li haʼ li nakaltesink malaj xbʼatzʼunlenkil rix li tumin. Xbʼaanunkil aʼin tatxtenqʼa ut chaabʼilaq chik laayuʼam.

 Li Santil Hu naxye: «Sahebʼ saʼ xchʼool li nekeʼxkʼe reetal naq naʼajmank li Yos saʼebʼ li xyuʼam» (Mateo 5:3).

 Saʼ Eclesiastés 7:12, SBG, naxye: «Li chaabʼil naʼlebʼ natenqʼank qe; joʼkan ajwiʼ li tumin. Abʼanan najtaq roq li qayuʼam wi wank qachoxahil naʼlebʼ». Kaʼajwiʼ saʼ li Santil Hu naqataw li naʼlebʼ aʼin. Naabʼal li kristiʼaan xeʼxkʼe reetal naq xyuʼaminkil li naxye li Santil Hu kixtenqʼahebʼ re naq moko yooqebʼ ta xkʼaʼuxl naq kaʼajwiʼ ruskʼul li xtuminebʼ (Mateo 6:31, 32).