Ma xatyajerk chi maakʼaʼ saʼ laachʼool? Aʼin naru tixbʼaanu naq lubʼluqat ut taasach naabʼal li tumin. Ma wank junaq li naʼlebʼ li tatxtenqʼa? Malaj chanru tatruuq xtenqʼankil junaq laakomon malaj laawamiiw li yaj? Saʼ li Santil Hu naqataw li chaabʼil naʼlebʼ usta moko aʼan ta jun li hu re bʼanok.

•   Sikʼ junaq aj bʼanonel.

   Li naxye li Santil Hu: «Li kawebʼ inkʼaʼ nekeʼraj aj bʼanonel abʼan ebʼ li yaj nekeʼajok re» (Mateo 9:12).

   Kʼaru naraj xyeebʼal: Sikʼ junaq aj bʼanonel naq naʼajmank chaawu.

   Yal xbʼaanunkil aʼin: Sikʼ li bʼanlebʼaal li tatxtenqʼa li nachʼ wank aawikʼin. Wank sut us raj naq taawabʼi kʼaru naxye junaq chik aj bʼanonel (Proverbios 14:15). Ut wanqat saʼ aatin rikʼinebʼ. Taw ru chiʼus li nekeʼxye aawe ut naq aʼanebʼ teʼxnaw kʼaru nakaawekʼa (Proverbios 15:22). Wi nakaanaw kʼaru laayajel ut kʼaru li bʼan wank aʼin tatxtenqʼa re xqʼaxbʼal ru ut naʼlebʼak chiʼus saʼ laayuʼam.

•   Il laajunxaqalil chiʼus.

   Li naxye li Santil Hu: «Qʼaxal us li hilank junpaataq chiru li kawil kʼanjelak» (Eclesiastés 4:6, Li Santil Hu, Sociedad Bíblica de Guatemala, SBG).

   Kʼaru naraj xyeebʼal: Wank rusilal naq tqil li qajunxaqalil joʼ wark chiʼus.

   Yal xbʼaanunkil aʼin: Kawresi laajunxaqalil, tatwarq ut tatwaʼaq chiʼus. Li wankebʼ xnaʼlebʼ nekeʼxye naq us xbʼaanunkil aʼin usta kijalaak laawanjik. Abʼan kʼe reetal naq chixjunil li nakaabʼaanu re xkawresinkil laajunxaqalil inkʼaʼ tixchʼaʼajki li bʼan li yookat rukʼbʼal.

•   Patzʼ laatenqʼ rikʼinebʼ laawamiiw.

   Li naxye li Santil Hu: «Li tzʼaqal amiiw junelik narahok; saʼ xqʼehil junaq rahilal tatxtenqʼa joʼ junaq tzʼaqal asbʼej» (Proverbios 17:17, SBG).

   Kʼaru naraj xyeebʼal: Ebʼ laawamiiw naru tateʼxtenqʼa naq yookat xnumsinkil junaq li chʼaʼajkilal.

   Yal xbʼaanunkil aʼin: Aatinan rikʼin junaq laawamiiw. Aʼin tatxtenqʼa re naq moko yooq ta laakʼaʼuxl ut sahaq saʼ laachʼool. Ebʼ laajunkabʼal ut ebʼ laawamiiw junelik teʼraj aatenqʼankil usta inkʼaʼ nekeʼxnaw chanru xbʼaanunkil. Bʼanyoxi naq nekeʼraj aatenqʼankil ut ye rehebʼ chanru teʼruuq xbʼaanunkil. Usta teʼraj wank aawikʼin wank sut aʼin naru naxbʼaanu naq tatlubʼ joʼkan naq ye rehebʼ jarubʼ hoor ut joqʼe teʼruuq aawulaʼaninkil.

•   Chaabʼil tatnaʼlebʼaq.

   Li naxye li Santil Hu: «Li sahil chʼoolej aʼan chanchan li bʼan nakʼehok kawilal; abʼan li rahil chʼoolej naʼoksink yajel» (Proverbios 17:22, SBG).

   Kʼaru naraj xyeebʼal: Wi chaabʼil nakatnaʼlebʼak aʼin tatxtenqʼa re naq tatruuq xkuybʼal laayajel.

   Yal xbʼaanunkil aʼin: Kʼulubʼa laawanjik, kʼe aachʼool chirix kʼaru tatruuq xbʼaanunkil. Maajuntaqʼeeta aawibʼ rikʼinebʼ li junchʼol chi moko chan chaq ru laayuʼam (Gálatas 6:4). Sikʼ kʼaru tatruuq xbʼaanunkil, aʼin tatxtenqʼa re naq chaabʼil tatnaʼlebʼaq (Proverbios 24:10). Bʼaanu li tatruuq xbʼaanunkil re xtenqʼankilebʼ li junchʼol, aʼin tatxtenqʼa re naq sahaq saʼ laachʼool ut inkʼaʼ taaxik aachʼool chirix laayajel (Hechos 20:35).

 Li Yos inkʼaʼ troksi junaq li sachbʼachʼoolej re qatenqʼankil abʼan saʼ li Santil Hu naqataw li naʼajmank chiqu. Chanru nokooxtenqʼa?

 Naxkʼe li tuqtuukilal. Filipenses 4:6, 7 naxye «li Yos tixkʼe eere li tuqtuukilal li maaʼani naxtaw ru». Aʼin tooxtenqʼa re naq moko yooq ta qakʼaʼuxl. Li Yos naxkʼe li tuqtuukilal aʼin choʼq rehebʼ li nekeʼtijok chiru ut nekeʼxye re li xkʼaʼuxebʼ wiʼ xchʼool (1 Pedro 5:7).

 Naxkʼe qanaʼlebʼ. Li Jehobʼa a nokooxtenqʼa re naq tqasikʼ xbʼaanunkil li us saʼ li qayuʼam (Santiago 1:5). Naq naqatzol ut naqayuʼami li naxye li Santil Hu chaabʼil nokoonaʼlebʼak.

 Li naxyeechiʼi qe. Li Jehobʼa naxye qe saʼ Isaías 33:24, SBG, naq saʼ jun kutan maaʼani chik tixye: «Yajin». Aʼin ak kixtenqʼa naabʼal li kristiʼaan re naq chaabʼil teʼnaʼlebʼaq usta nim ru xyajelebʼ (Jeremías 29:11, 12).