Sa’ chixjunil li ruuchich’och’ xik’ yookeb’ rilb’al rib’eb’ li neke’awab’ejink.

•   Sa’ li tenamit México xe’kamsiik 39 li poyanam li te’raj awab’ejinq, maajunwa x’ilmank chaq a’in. Ut sa’ li chihab’ a’in, naq okeb’ re xxaqab’ankil ani t-awab’ejinq wank naab’al li xik’ ilok sa’ xyanqeb’.

•   Sa’ Europa nak’ulmank jalan jalanq li xik’ ile’k sa’ xyanqeb’ li neke’awab’ejink. Sa’ li 15 re Mayo 2024 xe’xyal xkamsinkil jun reheb’ xjolomil li neke’awab’ejink aran Eslovaquia.

•   Sa’ Estados Unidos eb’ li poyanam sachso xch’ool xe’kanaak naq sa’ li 13 re Julio 2024 xe’xyal xkamsinkil qawa’ Donald Trump li kiwank chaq cho’q awab’ej.

 K’a’ut naq wank naab’al li kamsink sa’ xyanqeb’ li awab’ej? Ma tqakanab’ rilb’al a’in sa’ junaq kutan? K’aru naxye li Santil Hu?

 Li Santil hu ak kixye chaq naq sa’atqeb’ li qakutan, li nak’ab’aiik «xraqik ebʼ li kutan», li xna’leb’eb’ li kristi’aan tixk’am chaq li xik’ ilok ut li pleet.

•   «Abʼan tento taanaw naq saʼ xraqik ebʼ li kutan kawaq li wank ut qʼaxal chʼaʼajkaq xnumsinkil. Xbʼaan naq ebʼ li qas qiitzʼin kaʼajwiʼ aʼanebʼ teʼxra ribʼ; […] inkʼaʼ chik teʼbʼanyoxinq ut teʼxtzʼeqtaana li ras riitzʼin, inkʼaʼ chik teʼxkʼe ribʼ saʼ aatin, […] chanchanaqebʼ li xul li qʼaxal josqʼebʼ, […] teʼxbʼaanu li maaʼusilal rehebʼ li ramiiw ut kawaqebʼ xjolom, qʼaxal qʼetqʼetaqebʼ» (2 Timoteo 3:1-4).

 Li Santil Hu ak kixye chaq naq sa’eb’ li qakutan eb’ li poyanam yalaq b’ar te’xmululi rib’ ut te’pleetiq rik’in li awab’ej (Lucas 21:9, xtz’aqob’ li esil). Ab’an li xik’ ilok ut li jachok ib’ sa’ xyanqeb’ li neke’awab’ejink moko junelik ta twanq.

 Li Santil Hu naxye naq li Yos trisi li x’awab’ejilal li winq ut cho’q reqaj tixk’e li xchoxahil Awab’ejilal.

•   «Li xYos li choxa tixwaklesi chaq jun awab’ejihom […] tixjuk’i ut tixputz’iheb’ li awab’ejihom junch’ol, ut a’an wanq xwankil chi junelik» (Daniel 2:44, Li Santil Hu, Sociedad Bíblica de Guatemala, SBG).

 Li X’awab’ejilal li Yos tixk’am chaq li tuqtuukilal ut li junajil sa’ chixjunil li ruuchich’och’.

•   Li awab’ej sa’ li X’awab’ejilal li Yos a’an li Jesukriist ut nak’ab’aiik «Xnimal ru aj k’ehol tuqtuukil usilal». Rub’el li X’awab’ejilal junelik twanq li tuqtuukilal (Isaías 9:6, 7, SBG).

•   Sa’eb’ li qakutan, li neke’oken chirix li awab’ejilal a’in ak yookeb’ xtzolb’al wank sa’ tuqtuukilal. Li Santil Hu naxye chirixeb’ li poyanam a’in: «Te’xsutq’isi eb’ li q’esnal ch’iich’ cho’q pikleb’ ch’och’, ut li xjutz’ ch’iich’eb’ te’kanaaq cho’q setleb’ k’im. Eb’ li tenamit ink’a’ chik te’yaloq chirib’ileb’ rib’ chi moko te’xkawresi rib’ re yalok» (Isaías 2:3, 4, SBG).

 Wi taawaj xnawb’al xkomon li na’leb’ chaawil li tzolom «Kʼaru truuq xbʼaanunkil li Xnimajwal Awabʼejilal li Yos» ut chaawil li b’ideo K’aru li X’awab’ejilal li Yos?