Saʼ li folleto Chaapaabʼ li Yos wank ebʼ li jalam u ut kʼubʼanbʼil re xkʼutbʼal li yaal li wank saʼ li Santil Hu choʼq rehebʼ li chʼaʼaj chiruhebʼ xtawbʼal ru li nekeʼril saʼebʼ li hu. Saʼebʼ li junjunq chi tzolom wank wiibʼ li perel ut ebʼ li jalam u li wank chisaʼ kʼoxlanbʼil chiʼus ut wank reetalil ebʼ li jalam u re xnawbʼal bʼar wank li jun chik li jalam u li ttzʼilmanq rix.

Li folleto Chaapaabʼ li Yos re naq Twanq Aayuʼam chi Junelik naroksi ajwiʼ ebʼ li jalam u li naxkʼam chaq li folleto Chaapaabʼ li Yos, abʼan wank naabʼal li aatin chisaʼ. Li nekeʼxnaw ilok ru hu naru nekeʼtzolok rikʼin li hu Chaapaabʼ li Yos re naq Twanq Aayuʼam chi Junelik. Aʼin ajwiʼ nekeʼroksi ebʼ laj puktesinel usta li tzolom naroksi li folleto Chaapaabʼ li Yos. Wankebʼ li perel nekeʼxkʼam chaq jun li kaaxukuut li naxkʼe xkomon li naʼlebʼ re xtzʼilbʼal rikʼin li poyanam wi naʼajmank.

Junelik tooruuq xyeechiʼinkil jun rehebʼ li folleto, usta maawaʼ aʼan li yooko xyeechiʼinkil chiru li po. Naq yooqat xtzolbʼal junaq li poyanam, oksi ebʼ li jalam u re xchʼolobʼankil li naxye li Santil Hu. Bʼaanu ebʼ li patzʼom re naq ttzʼaqonq ut re xnawbʼal ma yook xtawbʼal ru li yookat xyeebʼal. Taayaabʼasi ut taachʼolobʼ ebʼ li raqal li Santil Hu saʼ raqik li junjunq chi perel. Naq tixchoy chixjunil li folleto, taatikibʼ xtzolbʼal rikʼin li hu Kʼaru tzʼaqal naxchʼolobʼ li Santil Hu? re naq tkʼiiq saʼ xpaabʼal toj reetal naq tixsubʼ ribʼ saʼ haʼ.