Usta moko tenebʼanbʼil ta saʼ qabʼeen joʼ aj paabʼanel xyuʼaminkil li Xchaqʼrabʼ laj Moises, li wiibʼ li taqlankil li jwal wank xwankil (xraabʼal li Yos ut li naqanawebʼ ru) aʼin tzʼaqal naraj li Yos naq teʼxbʼaanu li nekeʼloqʼonink re (Mt 22:37-39). Li rahok aʼin moko nachalk ta yal chi joʼkan, tento bʼan tqatzol xyuʼaminkil. Chanru? Jun rehebʼ li xnimal ru naʼlebʼ li ttenqʼanq qe aʼan xyaabʼasinkil li Santil Hu wulaj wulaj. Naq naqakʼe qachʼool chi xkʼoxlankil li naqatzol, naqataw xchʼinaʼusal li xnaʼlebʼ li Jehobʼa ut naqakʼe reetal naq jwal chaabʼil (Sl 27:4). Rikʼin aʼin, naqatzol xraabʼal chiʼus ut naqatzol kʼoxlak joʼ aʼan. Aʼin nokoorekʼasi chi xpaabʼankil li xtaqlahom, joʼ xraabʼal ebʼ li junchʼol chi anchal qachʼool (Jn 13:34, 35; 1Jn 5:3). Qilaq oxibʼ li naʼlebʼ li tooxtenqʼa re naq twulaq chiqu xyaabʼasinkil li Santil Hu.

• Qoksihaq li qakʼaʼuxl re xkʼoxlankil naq yook chi kʼulmank ut li oobʼ xchaʼal li qajunxaqalil. Qakʼoxlaq naq wanko aran. Qayalaq xkʼoxlankil li yook chi kʼulmank, qabʼihaq li xyaabʼ ut qekʼaq ebʼ li bʼook. Qakʼoxlaq kʼaru keʼrekʼa chaq ebʼ li poyanam aʼin chirixebʼ li yooko wiʼ chi tzolok.

• Qajalaq bʼayaq. Naru naqayaabʼasi saʼ kawil kuxej malaj tqabʼi jun li chapbʼil kuxej naq yooqo rilbʼal chi tzʼiibʼanbʼil. Tooruuq ajwiʼ xtzolbʼal chirix junaq rehebʼ li winq malaj ixq li wank saʼ li Santil Hu malaj junaq chik li naʼlebʼ chiru xyaabʼasinkil li Santil Hu chalen saʼ xtiklajik toj saʼ raqik. Jun li eetalil, tooruuq roksinkil ebʼ li tasal 4 ut 16 re li hu Li tooxtenqʼa chi xtzolbʼal Raatin li Yos re xyaabʼasinkil chirix li Jesus. Joʼkan ajwiʼ tooruuq xyaabʼasinkil li xtasal li Santil Hu bʼarwiʼ xʼelk chaq li raqal li naqil rajlal kutan malaj xyaabʼasinkil xhuhil li Santil Hu chi tustu joʼ chanru xtzʼiibʼamank chaq.

• Qayaabʼasihaq re xtawbʼal ru. Jwal us xyaabʼasinkil jun tasal rajlal kutan ut xtawbʼal ru li yooko xtzolbʼal ut xkʼoxlankil rix chiru xyaabʼasinkil naabʼal li tasal yal re xchoybʼal. Qakʼoxlaq kʼaru li aatin wank chiru ut chirix, qatzʼilaq rix li junjunq chi naʼlebʼ, qoksihaq ebʼ li reetalil li tenamit ut ebʼ li raqal bʼarwiʼ wank xkomon li naʼlebʼ, ut qasikʼaq xkomon li naʼlebʼ usta jun ajwiʼ li inkʼaʼ xqataw ru. Wi naruhank, qoksihaq ajwiʼ li hoonal aʼin re xkʼoxlankil li yooko xtzolbʼal chiru xyaabʼasinkil.