CHOʼQ REHEBʼ LI NAʼBʼEJ YUWAʼBʼEJ
5. Aajel ru seeraqʼik
KʼARU NARAJ XYEEBʼAL?
Seeraqʼik rikʼinebʼ leeralal eekʼajol aʼan xyeebʼal li nekeerekʼa ut nekeekʼoxla.
KʼAʼUT WANK XWANKIL?
Jwal chʼaʼaj seeraqʼik rikʼinebʼ li saaj. Naq kachʼinebʼ chaq laakokʼal chixjunil nekeʼxye aawe abʼan naq nekeʼsaajoʼk inkʼaʼ chik nekeʼraj aatinak chi moko nekeʼxye aawe li nekeʼrekʼa malaj nekeʼxkʼoxla. Chanchan tawiʼ naq jun li nimaʼ najachok eere. Aʼan tzʼaqal li hoonal naq aajel ru seeraqʼik rikʼinebʼ leeralal leekʼajol.
KʼARU TATRUUQ XBʼAANUNKIL?
Aatinan saʼ li hoonal li nekeʼraj laakokʼal. Chaabʼaanu aʼin usta najt qʼoqyink tatkanaaq chi aatinak rikʼinebʼ.
«Maare wank sut taawaj xyeebʼal: “Ma toj anaqwan taawaj aatinak? Ma inkʼaʼ ta bʼiʼ wotz xoowank chiru chixjunil li kutan?”. Abʼan chanru tatwechʼoq wi laawalal aakʼajol naraj xyeebʼal aawe li kʼaru wank saʼ xchʼool? Ma inkʼaʼ ta bʼiʼ aʼan nekeʼraj chixjunil ebʼ li naʼbʼej yuwaʼbʼej?» (Lisa).
«Kooko nawulak chiwu xik chi wark abʼan li hoonal li sa nokooseeraqʼik rikʼin li qakokʼal aʼan naq tuqtu chik ru li qʼoqyink» (Herbert).
LI NAʼLEBʼ LI NAXKʼE LI SANTIL HU: «Maaʼani chixsikʼ li kʼaru us choʼq re xjunes, aʼaq bʼan li us choʼq re li ras riitzʼin chixsikʼ» (1 Corintios 10:24).
Ke aachʼool chi rabʼinkilebʼ. Jun li yuwaʼbʼej naxye: «Wank sut naq ebʼ linkokʼal yookebʼ chi aatinak wikʼin naxik inchʼool chi xkʼoxlankil jalan chik li naʼlebʼ ut ebʼ aʼan nekeʼxkʼe reetal».
Wi joʼkan nakaakʼul chup laatele ut laaselular. Ke aachʼool chi rabʼinkil li nekeʼxseeraqʼi aawe laakokʼal chi joʼkan taakʼutbʼesi naq oxloqʼ chaawu li nekeʼxye usta choʼq aawe maakʼaʼ xwankil.
«Aajel ru naq ebʼ li qakokʼal teʼxnaw naq oxloqʼ chiqu li nekeʼrekʼa. Wi inkʼaʼ moko teʼaatinaq ta chik qikʼin malaj teʼxsikʼ xtenqʼ rikʼin jalan chik kristiʼaan» (Maranda).
«Misach aachʼool wi naxye aawe junaq li naʼlebʼ li maakʼaʼ xyaalal» (Anthony).
LI NAʼLEBʼ LI NAXKʼE LI SANTIL HU: «Chekʼe bʼiʼ reetal chanru nekexʼabʼink» (Lucas 8:18).
Yalaq joqʼe chexʼaatinaq rikʼinebʼ. Wank sut ebʼ li saaj nekeʼxye li wank saʼ xchʼoolebʼ re li xnaʼ xyuwaʼ naq sa nekeʼrekʼa ribʼ.
«Naq nokoobʼihajik sa nokooʼaatinak. Moko chʼaʼaj ta seeraqʼik naq moko yooko ta xkaʼyankil qibʼ» (Nicole).
Us ajwiʼ seeraqʼik saʼ li xhoonal li waʼak.
«Naq nokoowaʼak ewu naqaye chixjunil li xqakʼul chiru li kutan. Xbʼaanunkil aʼin nokooxtenqʼa chi xnawbʼal naq moko qajunes ta wanko re xtuqubʼankil li qachʼaʼajkilal» (Robin).
LI NAʼLEBʼ LI NAXKʼE LI SANTIL HU: «Li junjunq seebʼaq xchʼool chi abʼink, chixkuyaq ribʼ chi aatinak» (Santiago 1:19).
Maare twulaq ajwiʼ chaawu
LI NAXKʼUT LI SANTIL HU
Li tenqʼ choʼq re li yookebʼ chi elk saʼ xkachʼinal ut ebʼ li saaj li xeʼtzʼaqlok xchihabʼ
Li yookebʼ chi elk saʼ xkachʼinal ut ebʼ li saaj li xeʼtzʼaqlok xchihabʼ rajlal nekeʼxnumsi li chʼaʼajkilal, abʼan tzʼil rix chanru naxtenqʼahebʼ li Santil Hu.
