CHOʼQ REHEBʼ LI NAʼBʼEJ YUWAʼBʼEJ
8. Kʼe jun chaabʼil eetalil
KʼARU NARAJ XYEEBʼAL?
Xkʼebʼal jun chaabʼil eetalil naraj xyeebʼal xbʼaanunkil li nakaaye. Maawoybʼeni naq laakokʼal junelik teʼxye li yaal wi laaʼat nakaaye rehebʼ naq teʼxye naq maaʼanihat naq nekeʼchalk aasikʼbʼal.
«Wankebʼ nekeʼxye: “Bʼaanu li ninye ut maawaʼ li ninbʼaanu”, abʼan li naʼlebʼ aʼin inkʼaʼ nakʼanjelak rikʼinebʼ li kokʼal. Chanchanebʼ li tʼikr li naxtzʼubʼ li haʼ li nekeʼxkʼula li naqaye ut li naqabʼaanu. Wi naqakʼut jun li naʼlebʼ ut jalan chik naqabʼaanu aʼanebʼ teʼxkʼe reetal ut teʼxye qe» (David).
LI NAʼLEBʼ LI NAXKʼE LI SANTIL HU: «Nakachʼolobʼ xyaalal naq inkʼaʼ us li elqʼak, abʼanan nakat-elqʼak ajwiʼ laaʼat» (Romanos 2:21).
KʼAʼUT WANK XWANKIL?
Ebʼ li alal kʼajolbʼej nekeʼxkʼam re rikʼinebʼ li xnaʼ xyuwaʼ ut maawaʼ rikʼinebʼ li rechtzolom. Aʼin naraj xyeebʼal naq aʼanebʼ li teʼbʼeresinq rehebʼ li ralal xkʼajol saʼ li chaabʼil bʼe wi nekeʼxbʼaanu li nekeʼxye.
«Naru tqaye naabʼal sut junaq li naʼlebʼ ut chanchan tawiʼ naq inkʼaʼ yookebʼ qabʼinkil ut naq inkʼaʼ naqabʼaanu li naqaye saʼ junpaat nekeʼxkut saʼ xnaqʼ qu. Aʼanebʼ nekeʼxkʼe reetal li naqabʼaanu» (Nicole).
LI NAʼLEBʼ LI NAXKʼE LI SANTIL HU: Li choxahil naʼlebʼ maawaʼ aj kaʼpakʼal u (Santiago 3:17).
KʼARU TATRUUQ XBʼAANUNKIL?
Kʼoxla aʼin: «Chanru nawaatina linsumʼaatin ut ebʼ li walal inkʼajol? Kʼaru nawil saʼ li tele? Chanru xnaʼlebʼebʼ li wamiiw? Ma ninkʼoxla ebʼ li junchʼol?». Ma twulaq raj chiwu naq ebʼ linkokʼal teʼxkʼam re wikʼin?
«Joʼ naʼbʼej yuwaʼbʼej inkʼaʼ naqaminebʼ ru li qakokʼal re naq teʼxbʼaanu junaq li naʼlebʼ wi laaʼo inkʼaʼ naqabʼaanu» (Christine).
Chaapatzʼ xkuybʼal aamaak. Chʼolchʼo chiruhebʼ li alal kʼajolbʼej naq ebʼ li xnaʼ xyuwaʼ moko tzʼaqal ta re ru li xyuʼamebʼ. Joʼkan naq, wi nakatpaltoʼk ut nakaapatzʼ xkuybʼal aamaak re laasumʼaatin malaj re laawalal aakʼajol yookat xkʼutbʼal chiruhebʼ naq chaabʼil aanaʼlebʼ ut naq nakaakubʼsi aawibʼ.
«Tento tqakʼulubʼa naq nokoopaltoʼk ut tqapatzʼ xkuybʼal qamaak, wi inkʼaʼ naqabʼaanu ebʼ li qakokʼal inkʼaʼ teʼxtzol xbʼaanunkil ajwiʼ aʼin» (Robin).
«Ebʼ li qakokʼal nekeʼxtzol xnaʼlebʼ qikʼin. Jwal wank xwankil li eetalil li naqakʼut chiruhebʼ xbʼaan naq qʼes qʼes ruhebʼ chi rilbʼal chixjunil li naqabʼaanu. Chanchan jun li tasal hu li junelik teeto bʼarwiʼ naru teʼxtzol xnaʼlebʼebʼ maakʼaʼ naxye ma chiru li kutan malaj chiru li qʼoqyink» (Wendell).
