CHOʼQ REHEBʼ LI NAʼBʼEJ YUWAʼBʼEJ
6. Li qʼusuk
KʼARU NARAJ XYEEBʼAL?
Kehoʼk naʼlebʼ naraj xyeebʼal xbʼeresinkilebʼ, xtzolbʼalebʼ ut xqʼusbʼalebʼ li kokʼal naq nekeʼpaltoʼk. Naʼokenk ajwiʼ xkʼebʼal li xnaʼlebʼebʼ re naq us teʼelq saʼ li xyuʼam.
KʼAʼUT WANK XWANKIL?
Saʼebʼ li qakutan ebʼ li naʼbʼej yuwaʼbʼej inkʼaʼ chik nekeʼxqʼus ebʼ li ralal xkʼajol. Xbʼaan naq inkʼaʼ nekeʼraj naq li xkokʼal teʼxkʼoxla naq maakʼaʼ nekeʼok wiʼ. Abʼanan, ebʼ li naʼbʼej yuwaʼbʼej li chaabʼilebʼ xnaʼlebʼ nekeʼxtenebʼ saʼ xbʼeenebʼ li xkokʼal wiibʼ oxibʼ li naʼlebʼ ut nekeʼxkʼut chiruhebʼ naq teʼabʼinq.
«Aajel ru xyeebʼal rehebʼ li kokʼal chi chʼolchʼo ru kʼaru teʼxbʼaanu ut kʼaru inkʼaʼ teʼxbʼaanu. Chi joʼkan naq teʼwinqiloʼq malaj teʼixqiloʼq teʼxnaw kʼaru xbʼaanunkil ut tuqtuuq ru xyuʼamebʼ. Wi inkʼaʼ nekeʼqʼuseʼk li kokʼal naq teʼnimanq teʼxchʼik ribʼ saʼ chʼaʼajkilal ut rahilal teʼxkʼam chaq saʼ xbʼeenebʼ» (Pamela).
KʼARU TATRUUQ XBʼAANUNKIL?
Bʼaanu li xaaye. Ye rehebʼ laawalal aakʼajol naq wi inkʼaʼ nekeʼabʼink ra teʼxkʼul. Abʼanan, kʼe xsahil xchʼoolebʼ naq t-abʼinq chaawu.
«Saʼ xkʼabʼaʼ naq anaqwan maaʼani chik naraj abʼink, ninkʼehebʼ xsahil xchʼool linkokʼal naq nekeʼabʼink chiwu. Chi joʼkan moko nachʼaʼajkoʼk ta chiruhebʼ xkʼulubʼankil xqʼusbʼal» (Christine).
LI NAʼLEBʼ LI NAXKʼE LI SANTIL HU: «Li kʼaru naraw li winq, aʼan ajwiʼ li tixqʼol» (Gálatas 6:7).
Chi wanq aanaʼlebʼ. Naq taaqʼusebʼ laakokʼal kʼoxla li xchihabʼebʼ, li xseebʼalebʼ xchʼool ut li paltil li keʼxbʼaanu. Us naʼelk li qʼusuk wi naxchap ribʼ rikʼin li paltil li kixbʼaanu. Jun eetalil, wi jun rehebʼ laakokʼal inkʼaʼ naʼabʼink naq xaaye re naq tixkanabʼ junpaataq li selular naru taamaqʼ chiru re naq inkʼaʼ troksi chiru wiibʼ oxibʼaq kutan. Abʼanan, maakʼe xbʼeen li chʼaʼajkilal wi moko nim ta.
«Junelik ninyal inqʼe chi xtawbʼal ru ma yal xraj xchʼool naq inkʼaʼ kiʼabʼink chiwu malaj yal xpaltoʼk. Moko juntaqʼeet ta xqʼusbʼal wi yibʼru xnaʼlebʼ chiru xqʼusbʼal wi yal xpaltoʼk» (laj Wendell).
LI NAʼLEBʼ LI NAXKʼE LI SANTIL HU: «Ex yuwaʼbʼej, meeyoobʼ xjosqʼil ebʼ leeralal eekʼajol re naq meʼxchʼina xchʼoolebʼ» (Colosenses 3:21).
Kʼutbʼesi naq nakaarahebʼ. Wi nakaaqʼus ebʼ laakokʼal rikʼin rahok moko tchʼaʼajkoʼq ta chiruhebʼ xkʼulubʼankil ut xyuʼaminkil.
«Naq napaltoʼk li qayum naqajultika chiru li chaabʼilal li kixbʼaanu chaq junxil. Naqachʼolobʼ chiru wi anaqwan naxtuqubʼ ru li xpaltil inkʼaʼ tixkʼe ribʼ saʼ chʼaʼajkilal moqon ut laaʼo naru naqatenqʼa» (Daniel).
LI NAʼLEBʼ LI NAXKʼE LI SANTIL HU: «Li rahok wank xkuyum saʼ chixjunil; aʼan chaabʼil» (1 Corintios 13:4).
