Ebʼ li wankebʼ xnawom chirix aʼin nekeʼxyal xyeebʼal li narekʼa junaq li kristiʼaan naq nakamk li xkomon, abʼan moko juntaqʼeet ta li rahil chʼoolej li nekeʼrekʼa li kristiʼaan. Ma naraj xyeebʼal aʼin naq wankebʼ li kristiʼaan li nekeʼxkʼut naq yal kachʼin ajwiʼ li xrahilalebʼ xchʼool malaj inkʼaʼ nekeʼxkʼut li nekeʼrekʼa? Inkʼaʼ, moko joʼkan ta. Xkʼutbʼesinkil ut xyeebʼal naq ra aachʼool truuq aatenqʼankil, abʼan maakʼaʼ junaq li naʼlebʼ li tixkʼutbʼesi chi tzʼaqal chan raj ru junaq li kristiʼaan tixkʼutbʼesi naq ra xchʼool. Junaq li kristiʼaan naxkʼut li xrahil xchʼool aʼ yaal chanru li xtenamit, li xnaʼlebʼ, li kixkʼul saʼ li xyuʼam ut chanru kikamk li kristiʼaan.

Li ak xeʼkamk junaq xkomon malaj ramiiw inkʼaʼ nekeʼxnaw li chʼaʼajkilal li tixkʼam chaq aʼin. Abʼanan, wank ebʼ li naʼlebʼ li junelik nakʼulmank. Qilaq wiibʼ oxibʼ rehebʼ:

Inkʼaʼ nakaanaw kʼaru xbʼaanunkil. Maare nakatyaabʼak, nakaawaj rilbʼal wiʼ chik li kristiʼaan li ak xkamk ut maare wank sut sa aachʼool abʼan, saʼ junpaat najalaak chanru nakaawekʼa aawibʼ. Kʼajoʼ narahoʼk aachʼool naq nakaajultika malaj nakaamatkʼe. Maare saʼ li hoonal aʼan nakaakʼoxla naq moko yaal ta li yookat xkʼulbʼal. Li xTina naxye kʼaru kirekʼa naq kikamk li xbʼeelom chi maakʼaʼ saʼ xchʼool: «Sachso inchʼool xinkanaak, inkʼaʼ xinruuk chi yaabʼak ut xchʼaʼajkoʼk chiwu musiqʼak. Inkʼaʼ xinruuk xpaabʼankil li yook chi kʼulmank saʼ li hoonal aʼan».

Nanumtaak aakʼaʼuxl, nakatjosqʼoʼk ut nakaawekʼa naq laaʼat wank aawe. Laj Iván naxye: «Chalen naq kikamk laj Eric, li qayum li wank 24 chihabʼ re, li xYolanda ut laaʼin junelik yook qajosqʼil. Maajunwa xqakʼoxla naq joʼkaʼin peʼ li qanaʼlebʼ. Joʼkan ajwiʼ, xqekʼa naq laaʼo wank qe ut naqakʼoxla naq maare wank raj kʼaru xqabʼaanu re xkolbʼal li qayum». Laj Alejandro, li kikamk li rixaqil xbʼaan jun li nimla yajel, xrekʼa naq aʼan wank re naq kikamk. Aʼan naxye: «Xinkʼoxla naq li Yos yook xbʼaanunkil naq tinkʼul li rahilal aʼin xbʼaan naq moko chaabʼil ta innaʼlebʼ. Moqon, inkʼaʼ sa xwekʼa wibʼ xbʼaan naq yookin xqʼabʼankil li Yos rikʼin li xkʼulmank». Laj Kostas li xooʼaatinak wiʼ saʼ li xbʼeen tzolom, naxye: «Wank sut ninpoʼk rikʼin li xSofía xbʼaan naq kikamk. Abʼan, moqon moko sa ta nawekʼa wibʼ xbʼaan li ninkʼoxla. Xbʼaan naq moko yal kiraj ta naq kikamk».

Inkʼaʼ nakatruuk kʼoxlak chiʼus. Wank sut maare inkʼaʼ tatruuq xjalbʼal li nakaakʼoxla. Jun eetalil, wank sut maare nakaakʼoxla naq nakaawabʼi, nakaawil malaj nakaawekʼa naq li kristiʼaan li ak kamenaq chik wank chaakʼatq. Maare nachʼaʼajkoʼk chaawu xkʼebʼal aachʼool chirix junaq li naʼlebʼ malaj xjultikankil. Li xTina naxye: «Wank sut naq yookin chi aatinak rikʼin junaq li kristiʼaan, jalan chik naʼlebʼ yookin xkʼoxlankil. Ninkʼoxla chixjunil li kikʼulmank naq kikamk laj Timo. Inkʼaʼ ninruuk xkʼebʼal inchʼool chirix junaq li naʼlebʼ ut aʼin naxbʼaanu naq tnumtaaq inkʼaʼuxl».

Nakaawaj wank aajunes. Li xkamk junaq li xkomon malaj li ramiiw moko sa ta narekʼa ribʼ wank rikʼinebʼ li junchʼol. Laj Kostas naxye: «Naq wankin saʼ xyanqebʼ li sumsukebʼ nawekʼa naq moko inkʼulubʼ ta wank aran. Abʼan, joʼkan ajwiʼ nawekʼa wibʼ naq wankin rikʼinebʼ li moko sumsukebʼ ta». Li xYolanda, li rixaqil laj Iván, naxye: «Jwal nachʼaʼajkoʼk chiqu wank rikʼinebʼ li kristiʼaan li junelik nekeʼaatinak chirixebʼ li xchʼaʼajkilal, abʼan choʼq qe moko jwal nim ta chiru li yooko xnumsinkil laaʼo. Junchʼol chik nekeʼxye qe chanru wankebʼ li ralal xkʼajol. Nasahoʼk qachʼool xbʼaanebʼ, abʼan narahoʼk ajwiʼ qachʼool xbʼaan naq naqajultika li qayum. Chʼolchʼo chiqu naq ebʼ li junchʼol wankebʼ li xyuʼam, abʼanan toj maajiʼ sa naqekʼa qibʼ chi rabʼinkil li nekeʼxkʼul».

Naru tatyajerq. Aʼin naru naxchʼaʼajki chanru nakatwaʼak, laajunxaqalil ut li hoonal li nakaanumsi re  wark. Laj Aarón naxye li kixkʼul naq ak jun chihabʼ chik xkamik li xyuwaʼ: «Nachʼaʼajkoʼk chiwu wark. Rajlal qʼoqyink naʼaj wu xbʼaan naq ninjultika li xkamik linyuwaʼ».

Laj Alejandro naxye naq inkʼaʼ sa narekʼa ribʼ saʼ li xjunxaqalil, abʼan inkʼaʼ naxnaw kʼaʼut. Aʼan naxye: «Naabʼal sut xinwulak rikʼin laj bʼanonel, abʼan aʼan kixye we naq maakʼaʼ weekʼ. Joʼkan naq xinkʼoxla naq xinyajerk xbʼaan li xrahil inchʼool». Usta saʼ xnumikebʼ li kutan sa kirekʼa ribʼ, us kixbʼaanu laj Alejandro naq kixsikʼ xtenqʼ rikʼin laj bʼanonel. Naq ra aachʼool, naru nakatyajerk malaj nanimank laayajel.

Tchʼaʼajkoʼq chaawu xbʼaanunkil li aajel ru. Laj Iván naxye: «Naq kikamk laj Eric, xqaye rehebʼ li qakomon ut ebʼ li qamiiw, joʼkan ajwiʼ xqaye re jalan chik ebʼ li kristiʼaan, joʼ li xpatron ut laj echal re li ochoch bʼarwiʼ natoʼonink. Xʼajmank ajwiʼ xnujtesinkil wiibʼ oxibʼ li hu. Joʼkan ajwiʼ xʼajmank rilbʼal kʼaru tqabʼaanu rikʼin li kʼaʼaq re ru li wank re laj Eric. Naʼajmank naq tqakʼe qachʼool re xbʼaanunkil aʼin, abʼan saʼ xkʼabʼaʼ naq ra qachʼool inkʼaʼ sa naqekʼa qibʼ ut moko kawo ta re xbʼaanunkil chixjunil».

Abʼan, choʼq re wiibʼ oxibʼ li kristiʼaan li chʼaʼajkilal nachalk moqon. Xbʼaan naq tento teʼxbʼaanu wiibʼ oxibʼ li naʼlebʼ li naxbʼaanu chaq li kamenaq. Aʼin kixkʼul li xTina. Aʼan naxye: «Linbʼeelom naxwenteni chaq li qajunkabʼal ut naril chixjunil li naʼokenk chirix li tumin. Abʼan, anaqwan laaʼin tento chik tinbʼaanunq re ut aʼin kixbʼaanu naq tnumtaaq linkʼaʼuxl. Joʼkan naq ninkʼoxla naq inkʼaʼ tinruuq xbʼaanunkil».

Chixjunil ebʼ li naʼlebʼ aʼin, naru naxbʼaanu naq tqakʼoxla naq inkʼaʼ tooruuq xqʼaxbʼal ru li xkamik junaq li qakomon. Ra tzʼaqal aʼin, abʼan xnawbʼal rubʼelaj li taakʼul, truuq aatenqʼankil re xqʼaxbʼal ru li rahil chʼoolej. Jultika naq moko chixjunilebʼ ta li kristiʼaan nekeʼxkʼul ebʼ li naʼlebʼ li tojeʼ xqil. Joʼkan ajwiʼ, li ak xeʼxkʼul li rahilal aʼin, naru nekeʼxtaw xkʼojobʼankil xchʼool rikʼin xnawbʼal naq ak re naq naqekʼa qibʼ chi joʼ weʼ.

Li tatruuq xkʼulbʼal. Li rahil chʼoolejil li nakaawekʼa anaqwan, timil timil tkotzq. Aʼin moko naraj ta xyeebʼal naq laayuʼam tsutqʼiiq joʼ chanru kiwank chaq malaj naq tsachq saʼ aachʼool li raaro aabʼaan. Abʼanan, timil timil tkotzq li xrahil laachʼool, abʼan maare wank sut tsutqʼiiq wiʼ chik naq taajultika li kamenaq malaj junaq li kutan li wank xwankil choʼq eere. Abʼan, saʼ xnumikebʼ li kutan li kristiʼaan li nekeʼrekʼa ribʼ chi joʼkan nekeʼruuk chik xkʼebʼal xchʼool chirix li kʼaynaqebʼ chaq xbʼaanunkil. Re xbʼaanunkil aʼin, aajel ru naq taakʼulubʼa li tenqʼ li naxkʼe aawe laajunkabʼal, ebʼ laawamiiw ut xbʼaanunkil chixjunil li naʼajmank re elk chiʼubʼej.

Joʼ najtil tbʼayq li xrahil linchʼool? Wankebʼ teʼrekʼa li rahil chʼoolej aʼin chiru wiibʼ malaj oxibʼ po. Junchʼol chik chiru jun malaj wiibʼ chihabʼ. Ut wiibʼ oxibʼ chik toj t-ajmanq naabʼal li hoonal re naq sa teʼrekʼa ribʼ. * Laj Alejandro naxye: «Xwekʼa wibʼ chi joʼkaʼin maare chiru oxibʼ chihabʼ».

Michʼinaak aachʼool. Yal aaqʼe chi xnumsinkil li junjunq chi kutan. Jultikoʼq aawe, naq li rahil chʼoolej moko twanq ta chi junelik. Joʼkan bʼiʼ, kʼaru tatruuq xbʼaanunkil re naq moko rahaq ta chik aachʼool?