«Naq kikamk li xSofía * xbʼaan jun li nimla yajel, ak 39 chihabʼ qasumlajik. Ebʼ li wamiiw xineʼxtenqʼa ut xinsikʼ junaq li naʼlebʼ re naq laatzʼ wu. Abʼan chiru jun chihabʼ kʼajoʼ kirahoʼk inchʼool. Rajlal najalaak chanru nawekʼa wibʼ. Usta ak oxibʼ chihabʼ xkamik li wixaqil wank sut chi inkʼaʼ nawoybʼeni nawekʼa naq inkʼaʼ ninruuk xqʼaxbʼal ru li xrahil inchʼool» (Kostas).

Ma ak xkamk junaq laakomon malaj laawamiiw? Wi joʼkan, maare xaawekʼa aawibʼ joʼ laj Kostas. Naabʼal li kristiʼaan nekeʼrahoʼk xchʼool naq nakamk li xsumʼaatin, junaq li xkomon malaj ramiiw. Ebʼ li wankebʼ xnawom chirix aʼin nekeʼxye naq joʼkaʼin nakʼulmank. Jun li hu li naʼaatinak chirix li rahil chʼoolej naxye naq «naabʼalebʼ li kristiʼaan nekeʼrahoʼk saʼ xchʼool xbʼaan naq nekeʼxkʼoxla naq inkʼaʼ chik teʼril ru li kristiʼaan li xkamk». Junaq li ra xchʼool xbʼaan naq xkamk junaq li xkomon naru naxkʼoxla aʼin: «Joʼ najtil twekʼa wibʼ chi joʼkaʼin? Ma tsahoʼq inchʼool saʼ junaq kutan? Bʼar tinruuq xtawbʼal xkʼojobʼankil inchʼool?».

Saʼ li hu aʼin Ajsi aawu! tatruuq xtawbʼal xsumenkil ebʼ li patzʼom aʼin. Saʼ li jun chik tzolom taataw wiibʼ oxibʼ li chʼaʼajkilal li nakʼulmank naq nakamk junaq li raaro qabʼaan. Ut saʼebʼ li junchʼol chik chi tzolom taataw ebʼ li naʼlebʼ li truuq aatenqʼankil re xqʼaxbʼal ru li xrahil aachʼool.

Naqoybʼeni naq li hu aʼin tatxtenqʼa ut tixkʼojobʼ aachʼool wi xkamk junaq li raaro aabʼaan.