LI TENQʼ CHOʼQ REHEBʼ LI RAHEBʼ XCHʼOOL

Li tenqʼ choʼq rehebʼ li rahebʼ saʼ xchʼool

XKʼEBʼAL CHI EKʼANK RIKʼIN

TOJEʼ XTZʼILMANK RIX LI RAHILAL LI NEKEʼXKʼUL LI XEʼKAMK XKOMON MALAJ RAMIIW. Joʼ ak xqil saʼebʼ li tzolom aʼin, li naʼlebʼ li nekeʼxkʼe li wankebʼ xnawom naxchap ribʼ rikʼin li Santil Hu. Aʼin naxkʼut naq li naxye li Santil Hu toj wank rusilal. Abʼan, li Santil Hu moko kaʼaj tawiʼ naxkʼe li chaabʼil naʼlebʼ. Chisaʼ wank ajwiʼ li esil li inkʼaʼ naru naqataw yalaq bʼar ut li esil aʼin naxkʼojobʼ xchʼool ebʼ li rahebʼ saʼ xchʼool.

Naqanaw naq ebʼ li qakamenaq moko yookebʼ ta chi rahobʼtesiik.

Saʼ Eclesiastés 9:5 naxye naq ebʼ li kamenaq «maakʼaʼ nekeʼxnaw» ut maakʼaʼ chik nekeʼxkʼoxla (Salmo 146:4). Joʼkan naq li Santil Hu naxjuntaqʼeeta li kamk rikʼin li wark (Juan 11:11).
Naxkʼojobʼ qachʼool xnawbʼal naq li Yos nokooxra.

Li Santil Hu naxye: «Li Qaawaʼ [“Jehobʼa”, * TNM] naxkʼaakʼalehebʼ li tiikebʼ ru xyuʼam, ut narabʼihebʼ naq nekeʼxyaabʼa li xkʼabʼaʼ» (Salmo 34:16). Naq nokootijok chiru li Yos aʼin naxkʼojobʼ wiʼ chik qachʼool chiru aatinak rikʼin junaq li kristiʼaan. Ut aʼin naxbʼaanu naq chʼolchʼooq ru li naqakʼoxla. Aʼin naru nokooxtenqʼa re naq toowanq saʼ amiiwil rikʼin laj Yobʼtesinel qe, li naroksi li xmetzʼew re xkʼojobʼankil qachʼool.
Li yeechiʼom re li kutan chalk re.

Naabʼal sut li Santil Hu naʼaatinak chirix naq ebʼ li kamenaq teʼwakliiq wiʼ chik chi yoʼyo. Jun eetalil, naq naʼaatinak chirix chanruhaq li yuʼam saʼ Ruuchichʼochʼ naxye naq li Yos «tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal» (Apocalipsis 21:3, 4). Ma nakaakʼoxla chanruhaq?

Naabʼalebʼ li nekeʼxpaabʼ li Jehobʼa nekeʼkʼojobʼaak xchʼool xnawbʼal naq teʼril wiʼ chik ruhebʼ li xkamenaq. Jun eetalil, li xʼAnn, li kikamk xbʼeelom naq ak numenaq 65 chihabʼ xsumlajikebʼ, naxye: «Naxkʼojobʼ inchʼool xnawbʼal naq ebʼ li kamenaq moko yookebʼ ta chi rahobʼtesiik ut naq li Yos tixwaklesihebʼ wiʼ chik chi yoʼyo. Ninjultika aʼin naq ninkʼoxla rix linbʼeelom ut aʼin nikinxtenqʼa re xqʼaxbʼal ru xrahil inchʼool».

Li xTina, li xooʼaatinak wiʼ chaq naxye: «Chalen naq kikamk laj Timo, nawekʼa li xtenqʼ li Yos. Saʼ li hoonal aʼin xwekʼa naq kʼajoʼ nikinxtenqʼa li Jehobʼa. Ninpaabʼ naq li Santil Hu naxye naq teʼwakliiq wiʼ chik chi yoʼyo ebʼ li kamenaq ut aʼin nikinxtenqʼa toj reetal naq twil wiʼ chik ru laj Timo».

Chi miyon ebʼ li kristiʼaan nekeʼrekʼa ribʼ joʼ li xʼAnn ut li xTina. Wi nachʼaʼajkoʼk chaawu xpaabʼankil li naxye li Santil Hu naqawaklesi aachʼool re xtawbʼal xkomon li naʼlebʼ chirix aʼin ut ebʼ li yeechiʼom. Taakʼe reetal naq li naxye li Santil Hu naxtenqʼa ebʼ li xeʼkamk xkomon malaj ramiiw. Taakʼe reetal naq kaʼajwiʼ li Santil Hu naxtenqʼa ebʼ li xeʼkamk xkomon malaj ramiiw.