4 Ma kooxyobʼtesi li Yos re xkʼulbʼal li rahilal?
Kʼaʼut wank xwankil xnawbʼal li xsumenkil?
Xbʼaan naq aʼin tooxtenqʼa chi xkʼebʼal reetal chanru naqil li yuʼam.
Kʼoxla aʼin
Ma wank xyaalal naq li Yos kixyiibʼ chi chʼinaʼus li Ruuchichʼochʼ ut kixbʼaanu naq tnumtaaq li rahilal saʼ qabʼeen?
Wankebʼ li qas qiitzʼin li moko ebʼ aj paabʼanel ta nekeʼroksi li rahilal re xyeebʼal kʼaru aj e naq kooxyobʼtesi li Yos malaj re xyeebʼal kʼaru aj e naq wank li Yos. Nekeʼxkʼoxla naq li rahilal naxkʼutbʼesi jun rehebʼ li oxibʼ chi naʼlebʼ: 1) naq li Yos inkʼaʼ naru risinkil, 2) naq inkʼaʼ naraj xbʼaanunkil malaj 3) naq maakʼaʼ jun Yos saʼ qabʼeen.
Abʼan, ma wank jun chik xyaalal?
RE XNAWBʼAL XKOMON
Sikʼ jw.org ut il li bʼideo Chanru naqanaw naq yaal chixjunil li wank saʼ li Santil Hu?
Li naxye li Santil Hu
Li Yos inkʼaʼ kooxyobʼtesi re xkʼulbʼal li rahilal
Aʼan naraj naq tqataw xsahil li qayuʼam.
«Li kʼaru us tixbʼaanu li winq, aʼan naq tsahoʼq saʼ xchʼool ut tixbʼaanu li us [...]. Ut ninnaw ajwiʼ naq yal qamaatan xbʼaan li Dios naq nokoowaʼak ut nokooʼukʼaʼk ut naqayal xsahil li kʼaru naqakʼanjela» (ECLESIASTÉS 3:12, 13, Wy. AKʼ TZʼIIBʼ).
Naq li Yos kixyobʼtesi laj Adán ut li xʼEva tzʼaqal re ru chixjunil
Li Yos inkʼaʼ kiraj naq ebʼ aʼan ut ebʼ li ralal xkʼajol teʼxkʼul li rahilal.
«Li Yos kirosobʼtesihebʼ ut kixye rehebʼ: “Chiwanq eeralal eekʼajol, chexkʼihanq, chenujobʼresi li ruuchichʼochʼ ut chereechanihaq[”]» (GÉNESIS 1:28).
Li xbʼeen winq ut li xbʼeen ixq keʼxsikʼ xqʼetbʼal ribʼ chiru li Yos
Naq keʼxqʼet ribʼ kichalk naabʼal li rahilal saʼ xbʼeenebʼ ut saʼ xbʼeen li ralal xkʼajol.
«Xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam xbʼaan naq chixjunilebʼ keʼmaakobʼk» (ROMANOS 5:12). *
Li Yos inkʼaʼ kooxyobʼtesi re naq tqabʼeresi qibʼ qajunes
Joʼ chanru naq inkʼaʼ kooxyobʼtesi re wank rubʼel haʼ, inkʼaʼ ajwiʼ kooxyobʼtesi re xjolominkil qibʼ qajunes.
«Li winq moko aʼan ta yaal re saʼ xbʼeen li xyuʼam, chi moko saʼ ruqʼ wank li xbʼeenik» (JEREMÍAS 10:23).
Li Yos inkʼaʼ naraj naq tqakʼul li rahilal
Naxkʼe qanaʼlebʼ re naq inkʼaʼ tqakʼe qibʼ saʼ naabʼal li chʼaʼajkilal.
«Jwal us raj naq xapaabʼ linchaqʼrabʼ! Li xsahil aachʼool qʼaxal yo raj chi kʼiik joʼ junaq nimaʼ» (ISAÍAS 48:18).
^ párr. 17 Li Santil Hu naroksi li aatin maak re aatinak chirix li maaʼusil naʼlebʼ ut re aatinak chirix li maak li xqechani chiqajunilo joʼ winq.
Maare twulaq ajwiʼ chaawu
LAJ KʼAAKʼALEHOM
Kʼaru naxkʼoxla li Yos chirix li rahilal li wank saʼ ruuchichʼochʼ?
Ebʼ li raqal aʼin tatxtenqʼa re rilbʼal kʼaru naxkʼoxla li Yos chirix li rahilal.
