Nekeʼxpaabʼ naq naqakʼul li rahilal xbʼaan naq wank xqabʼaanu saʼ li yuʼam aʼin malaj saʼ li qanajter yuʼam. Nekeʼxye naq, jun li poyanam naxkanabʼ xkʼulbʼal li rahilal naq naxtaw li moksha, malaj, naq naxkanabʼ yoʼlaak ut kamk saʼ reqaj ribʼ. Aʼut re xtawbʼal aʼin, tento tixkanabʼ xkʼoxlankil li yook chi kʼulmank saʼ xsutam malaj saʼ ruuchichʼochʼ.

Nekeʼxkʼoxla naq naqakʼul li rahilal re xtojbʼal rix li qamaak ut re xyalbʼal rix li qapaabʼal. Laj Sayyid Syeed, li naxjolomi li Sociedad Islámica de América del Norte, naxye naq li rahilal naxjultika chiqu naq «junelik tqabʼanyoxi re li Yos chixjunil li osobʼtesink li naxkʼe qe ut tento tqatenqʼahebʼ li wankebʼ saʼ rajbʼal ru».

Nekeʼxkʼoxla naq naqakʼul li rahilal saʼ xkʼabʼaʼ li naqabʼaanu chiqajunqal. Wankebʼ ajwiʼ laj judiiy nekeʼxye naq twanq li wakliik wiʼ chik chi yoʼyo ut moqon chik, teʼusilaaq li xeʼxkʼul li rahilal chi maakʼaʼebʼ xmaak. Abʼanan, jun siirebʼ chik aj judiiy li nekeʼkʼabʼaʼiik místico malaj cabalístico nekeʼxkʼut naq jun sut malaj naabʼal sut nayoʼlaak junaq li poyanam naq nakamk aʼ yaal ma chi kristiʼaanil malaj chi xulil ut aʼin natenqʼank re, re naq yooq chi elk li xmaak.

Nekeʼxpaabʼ naq ebʼ li poyanam nekeʼyoʼlaak naabʼal sut naq nekeʼkamk ut nekeʼxkʼul li rahilal saʼ li junjunq chi yuʼam. Inkʼaʼ chik nekeʼrahobʼtesiik naq nekeʼxkanabʼ xrahinkil, xbʼaanunkil ut rekʼankil li moko us ta. Nekeʼxye naq jun li poyanam li wank xnaʼlebʼ, nanaʼlebʼak chiʼus ut saq ru xkʼaʼuxl naru naxtaw li nirvana, malaj, xhoonalil naq inkʼaʼ chik narekʼa li rahilal.

Nekeʼxkʼoxla naq li xxeʼil li rahilal nachalk saʼ xkʼabʼaʼ «li xpaltilebʼ li poyanam». Nekeʼxye naq naru nakotzk li xrahilal junaq li poyanam wi tiik ru xyuʼam. Abʼanan, nekeʼxkʼoxla naq naabʼalebʼ nekeʼxkʼul li rahilal saʼ xkʼabʼaʼ ebʼ li kʼiila musiqʼej li qʼaxal kawebʼ ribʼ chiru li winq. Naq joʼkan nekeʼxkʼul, ebʼ li poyanam yal nekeʼxkʼulubʼa aj chik li naxye li xchahimalebʼ.

Nekeʼxye naq li rahilal nachalk saʼ xmaak li tuulak. Wankebʼ li qas qiitzʼin nekeʼxkʼoxla naq ebʼ laj tuul naru nekeʼxkʼam chaq li sahilal malaj li rahilal, ut li xkʼanjel laj tuul naru xbʼanbʼal rikʼin li najteril yeehom bʼaanuhom. Joʼkan bʼiʼ, naq nekeʼyajerk ebʼ li poyanam aʼin, nekeʼxik rikʼin laj ilonel re naq, rikʼin li xbʼan ut li najteril yeehom bʼaanuhom, tixtoq li xkʼanjel laj tuul.

Ebʼ laj paabʼanel nekeʼxpaabʼ naq li rahilal naxchap ribʼ rikʼin li xmaak laj Adán ut li xʼEva, joʼ naxchʼolobʼ li hu Génesis. Abʼanan, naabʼalebʼ li paabʼal nekeʼxtiq ru aʼin rikʼin li xkʼaʼuxebʼ. Jun eetalil, wankebʼ laj katoolk nekeʼxkʼoxla naq teʼruuq xyeechiʼinkil li xrahilal re li Yos re naq trosobʼtesi li xʼikleesebʼ malaj re naq tixkol junaq li qas qiitzʼin.