Kʼe aawibʼ saʼ xnaʼaj li jun chik
Li chʼaʼajkilal
Wi junes xjalanil ebʼ li junchʼol naqil, maare tooʼoq xkʼoxlankil naq li jalanil aʼin, aʼan li xpaltilebʼ. Ut tooʼoq ajwiʼ xkʼoxlankil naq kubʼenaqebʼ xwankil chiqu. Wi joʼkan raj tooʼoq chi kʼoxlak, tchʼaʼajkoʼq chiqu xkʼebʼal qibʼ saʼ xnaʼajebʼ li junchʼol malaj rekʼankil li nekeʼrekʼa. Aʼin jun rehebʼ li eetalil chirix li nimla chʼaʼajkilal li naxkʼabʼaʼi tzʼeqtaanank.
Li naʼlebʼ li naxkʼe li Santil Hu
«Chisahoʼq saʼ eechʼool rikʼinebʼ li sahebʼ saʼ xchʼool, chexyaabʼaq rikʼinebʼ li yookebʼ chi yaabʼak» (ROMANOS 12:15).
Kʼaru naraj xyeebʼal? Li naʼlebʼ li naxkʼe li Santil Hu naxkʼut naq aajel ru naq tqakʼe qibʼ saʼ xnaʼaj li jun chik. Ut re xbʼaanunkil tento tqekʼa li narekʼa.
Chanru natenqʼank xkʼebʼal qibʼ saʼ xnaʼaj li jun chik
Naq naqekʼa li nekeʼrekʼa li junchʼol, naqakʼe reetal naq juntaqʼeeto rikʼinebʼ. Naqakʼe reetal naq nekeʼrekʼa ribʼ joʼ naqekʼa qibʼ laaʼo ut nekeʼnaʼlebʼak joʼ laaʼo. Xkʼebʼal qibʼ saʼ xnaʼajebʼ li junchʼol nokooxtenqʼa chi xtawbʼal ru naq, maakʼaʼ naxye bʼar chalenaqo, junkabʼalo rikʼin chixjunilebʼ. Wi qʼaxal naqakʼe qachʼool chi rilbʼal li xjuntaqʼeetalil li qanaʼlebʼ rikʼinebʼ, qʼaxal tchʼaʼajkoʼq chiqu xwechʼbʼalebʼ rix.
Xkʼebʼal qibʼ saʼ xnaʼajebʼ li junchʼol tooxtenqʼa chi roxloqʼinkilebʼ. Li xʼAnne-Marie, re Senegal, inkʼaʼ saʼ naril jun siir li poyanam li kubʼsinbʼilebʼ xwankil. Aʼan naxseeraqʼi qe kʼaru kitenqʼank re chi xkʼebʼal ribʼ saʼ xnaʼajebʼ li junchʼol: «Naq xwil joʼnimal li rahilal nekeʼxkʼul, xinʼok xkʼoxlankil chan raj ru twekʼa wibʼ wi laaʼin raj wankin saʼ xnaʼajebʼ. Ut xinʼok xkʼebʼal reetal naq moko nim ta inwankil chiruhebʼ ut moko ak xinbʼaanu ta junaq li naʼlebʼ li tixnima inwankil chiruhebʼ». Joʼkan bʼiʼ, wi naqakʼe qachʼool chi xtawbʼal ru li xchʼaʼajkilal li qas qiitzʼin, tqatawebʼ ru li junchʼol ut inkʼaʼ tooʼaatinaq chirixebʼ xjolom.
Li tatruuq xbʼaanunkil
Maawil ebʼ li xjalanil, sikʼ bʼan kʼaru aajuntaqʼeetalil rikʼin junsiiraq li poyanam li inkʼaʼ naxkʼul aakikʼel. Jun eetalil, chanru nakaaye naq nekeʼrekʼa ribʼ?
Xkʼebʼal qibʼ saʼ xnaʼajebʼ li junchʼol nokooxtenqʼa chi rilbʼal naq junkabʼalo rikʼin chixjunilebʼ.
Naq nekeʼwaʼak joʼ junkabʼal.
Naq nekeʼraqeʼk chi kʼanjelak chiru jun kutan.
Naq nekeʼxjunaji ribʼ rikʼinebʼ li ramiiw.
Naq nekeʼrabʼi li bʼich li qʼaxal nawulak chiruhebʼ.
Anaqwan yal xkʼebʼal aawibʼ saʼ xnaʼaj. Bʼaanu aawe li patzʼom:
Kʼaru raj tinbʼaanu wi junaq li poyanam tixbʼaanu naq twekʼa naq maakʼaʼ ninʼok wiʼ?
Chanru twekʼa wibʼ wi ebʼ li junchʼol teʼaatinaq chirix injolom chi inkʼaʼ nekeʼxnaw wu?
Wi laaʼin raj jun rehebʼ li jun siir chi poyanam, chan raj ru twulaq chiwu naq tineʼril?
Maare twulaq ajwiʼ chaawu
LAJ KʼAAKʼALEHOM
Ma naxtoqʼobʼa qu li Yos?
Li Santil Hu naxye naq li Yos chʼolchʼo chiru li naqakʼul, li naqakʼoxla, li naqekʼa ut naxkʼe ribʼ saʼ qanaʼaj.
AJSI AAWU!
Chaabʼilobʼresi laayuʼam: Laajunkabʼal ut ebʼ laawamiiw
Re xkʼambʼal qibʼ saʼ usilal rikʼinebʼ li junchʼol, tento t-alaaq saʼ qachʼool kʼehok ut inkʼaʼ kaʼajwiʼ kʼuluk.
