Kʼulubʼa li naxnaw xbʼaanunkil li jun chik
Li chʼaʼajkilal
Li qʼetqʼetil naru nakʼamok saʼ li tzʼeqtaanank. Li qʼetqʼet naxtaqsi chiʼus xwankil. Narekʼa naq nim xwankil chiruhebʼ li junchʼol ut naxkubʼsi xwankil li jalanebʼ chiru. Yalaq ani naru natʼaneʼk saʼ li yiibʼru aj naʼlebʼ aʼin. Li hu Encyclopædia Britannica naxye: «Li xkʼihalil ebʼ li teep nekeʼxkʼoxla naq li xwanjikebʼ, li xtzekemqebʼ, li xtiqibʼankilebʼ, li xbʼaanuhomebʼ, li xpaabʼalebʼ, li xnaʼlebʼebʼ, ut wank chik xkomon., nim xwankil chiruhebʼ li junchʼol chi teep». Kʼaru tqabʼaanu re naq inkʼaʼ tootʼaneʼq saʼ li yiibʼru aj naʼlebʼ aʼin?
Li naʼlebʼ li naxkʼe li Santil Hu
«Kubʼenaqaq bʼan eewankil, aʼ leekomon bʼan ninqebʼ xwankil cheeru naq cheekʼoxla» (FILIPENSES 2:3, LI ACʼ CHAQʼRAB, SOCIEDAD BIBLICA EN GUATEMALA. AKʼ TZʼIIBʼ).
Kʼaru naraj xyeebʼal? Re naq tooruuq xqʼaxbʼal li qʼetqʼetil aajel ru naq tqakubʼsi qawankil.Wi kubʼenaq qawankil, tqakʼulubʼa naq ebʼ li junchʼol seebʼebʼ xchʼool chi xbʼaanunkil ebʼ li kʼanjel li inkʼaʼ nokooruuk xbʼaanunkil. Maakʼaʼ junaq li teep li qʼaxal us tixbʼaanu chixjunil.
Qilaq li kixkʼul laj Stefan. Kikʼiik saʼ jun li nebʼaʼil tenamit ut kiruuk xqʼaxbʼal li tzʼeqtaanank li narekʼa chirixebʼ li poyanam li nekeʼchalk saʼebʼ li tenamit li moko chanchan ta li xtenamit. Naxye: «Ninkʼoxla naq, re xqʼaxbʼal li tzʼeqtaanank, aajel ru xkʼoxlankil naq ebʼ li junchʼol nimebʼ xwankil chiqu. Laaʼin inkʼaʼ ninnaw chixjunil ut junelik nintzol we rikʼinebʼ li junchʼol».
Li tatruuq xbʼaanunkil
Maamuq ut kʼulubʼa naq laaʼat ajwiʼ wank aapaltil. Kʼulubʼa naq ebʼ li junchʼol nekeʼxnaw xbʼaanunkil li inkʼaʼ nakatruuk laaʼat. Ut maakʼoxla naq chixjunilebʼ li qas qiitzʼin re jun li chʼuut juntaqʼeetebʼ.
Maawechʼ rix junaq li poyanam re jun li chʼuut, bʼaanu bʼan aawe li patzʼom aʼin:
Kʼulubʼa naq ebʼ li junchʼol nekeʼxnaw xbʼaanunkil li inkʼaʼ nakatruuk laaʼat.
-
Ma relik chi yaal naq nimla maak li inkʼaʼ nawulak chiwu chirix li poyanam aʼin, malaj yal inkʼaʼ kʼaynaqin chi rilbʼal aʼan?
-
Ma tixtaw ajwiʼ inpaltil li poyanam aʼin?
-
Kʼaru naxnaw xbʼaanunkil aʼan li inkʼaʼ ninruuk laaʼin?
Wi nakaasume ebʼ li patzʼom chi maakʼaʼ taamuq, tatruuq xqʼaxbʼal li tzʼeqtaanank ut tatruuq rilbʼal li xchaabʼilal li jun chik.
Maare twulaq ajwiʼ chaawu
EBʼ LI PATZʼOM CHIRIX LI SANTIL HU
Ma us malaj inkʼaʼ us sumlaak rikʼin li jalan xtenamit?
Kʼaru naxye li Santil Hu chirix li jalanebʼ xtenamit ut li sumlaak?
