«Chekuyaq eeribʼ cheribʼil eeribʼ ut, wi junaq wank kʼaru tixjit wiʼ li jun chik, chekʼam eeribʼ saʼ usilal» (COLOSENSES 3:13).

Saʼ xkʼabʼaʼ naq chiqajunilo nokoopaltoʼk, maare xqatochʼ xchʼool junaq li kristiʼaan malaj aʼanebʼ xeʼxtochʼ qachʼool. Joʼkan naq naʼajmank naq tqakuyebʼ xmaak ebʼ li junchʼol ut teʼxkuy ajwiʼ qamaak. Naq nokookuyuk maak chi anchal qachʼool, inkʼaʼ chik xikʼ naqil li kristiʼaan. Inkʼaʼ tqaqʼajsi «raaxiikʼ rikʼin raaxiikʼ» chi moko tqajultika re li xpaltil (Romanos 12:17). Abʼan, wi kʼajoʼ xrahobʼtesi qachʼool ut rajlal naqajultika, li tooruuq xbʼaanunkil aʼan aatinak rikʼin li kristiʼaan saʼ junesal ut saʼ tuulanil. Li qajom aʼan xtuqubʼankil ru li chʼaʼajkilal saʼ tuulanil ut maawaʼ xnimobʼresinkil ru (Romanos 12:18).

«Chekubʼsiiq bʼan eewankil; li junjunq tixkʼoxla naq ebʼ li xkomon qʼaxal ninqebʼ chik xwankil chiru» (FILIPENSES 2:3).

Ebʼ li qas qiitzʼin teʼwulaq chiru wank qikʼin wi naqakubʼsi qawankil ut naqoxloqʼihebʼ. Chʼolchʼo chiruhebʼ naq chaabʼil toonaʼlebʼaq rikʼinebʼ ut naq maajunwa raj tqaj xbʼaanunkil junaq li naʼlebʼ li tixtochʼ xchʼoolebʼ. Abʼan, wi naqakʼoxla naq laaʼo nim qawankil chiruhebʼ li junchʼol ut junelik naqaj naq teʼxbʼaanu  li naqaye, inkʼaʼ chik twanq tuqtuukilal, junes choqink chik. Aʼin tixbʼaanu naq ebʼ li qas qiitzʼin, inkʼaʼ sa teʼrekʼa ribʼ qikʼin ut inkʼaʼ chik teʼraj wank choʼq qamiiw.

«Li Yos juntaqʼeet narilebʼ chixjunil ut sa naxkʼul chixjunilebʼ li nekeʼpaabʼank re ut nekeʼxbʼaanu li tiikilal, aʼ yaal kʼaʼ chi tenamitul yoʼlajenaqebʼ wiʼ» (HECHOS 10:34, 35).

Li Yos inkʼaʼ naxsikʼebʼ ru ebʼ li kristiʼaan saʼ xkʼabʼaʼ li xtenamitebʼ, li raatinobʼaalebʼ, li xwanjikebʼ malaj ebʼ li xbʼonol. «Rikʼin jun chi winq kixyobʼtesi chixjunilebʼ li tenamit» (Hechos 17:26). Aʼin naraj xyeebʼal naq chiqajunilo qiitzʼin qibʼ chiqibʼil qibʼ. Naq naqoxloqʼihebʼ li junchʼol ut naqaatinahebʼ saʼ tuulanil, naqasahobʼresi xchʼoolebʼ, nasahoʼk qachʼool ut naqasahobʼresi ajwiʼ xchʼool laj Yobʼtesinel qe.

«Chexwanq saʼ tuulanil» (COLOSENSES 3:12, Wy).

Naq tuulano ut naq moko saʼ junpaat ta nokoojosqʼoʼk, ebʼ li junchʼol sa nekeʼrekʼa ribʼ qikʼin ut nekeʼxye qe li nekeʼxkʼoxla, joʼ ajwiʼ naru nokooʼeʼxqʼus xbʼaan naq nekeʼxnaw naq inkʼaʼ toopoʼq. Wi nokoosumenk saʼ tuulanil naq junaq li kristiʼaan napoʼk qikʼin, aʼin tooxtenqʼa re naq inkʼaʼ tqanimobʼresi ru li chʼaʼajkilal. Proverbios 15:1 naxye: «Li nasumenk rikʼin qʼunil aatin, naxkotz li josqʼil; aʼut li nasumenk saʼ josqʼil, naxnimobʼresi li chʼaʼajkilal».

«Qʼaxal nim li sahil chʼoolejil wank saʼ li kʼehok chiru li wank saʼ li kʼuluk» (HECHOS 20:35).

Naabʼalebʼ li kristiʼaan kaʼajwiʼ nekeʼxsikʼ li us choʼq rehebʼ ut xtamresinkil li xjunkabʼlal. Abʼan, wi chi anchal qachʼool nokoosihink junelik sahaq saʼ qachʼool (Lucas 6:38). Li nekeʼsihink junelik sahebʼ saʼ xchʼool xbʼaan naq nekeʼxra ebʼ li qas qiitzʼin chiru li xbʼihomalebʼ. Li rahok aʼin naʼekʼasink rehebʼ chi bʼanyoxink ut chi xkʼutbʼesinkil naq oxloqʼ chiruhebʼ li nekeʼxbʼaanu ebʼ li junchʼol choʼq rehebʼ (Colosenses 3:15). Kʼoxla aʼin: «Ma nawulak chiwu wank saʼ xyanqebʼ li inkʼaʼ nekeʼsihok chi moko nekeʼbʼanyoxink, malaj rikʼinebʼ li nekeʼsihok chi anchalebʼ xchʼool ut nekeʼbʼanyoxink?». Aʼin naraj xyeebʼal: naq tqilebʼ li junchʼol joʼ chanru naqaj naq tooʼeʼril (Mateo 7:12).