Ma li Yos kiyobʼtesink re li choxa, li Ruuchichʼochʼ ut li yuʼam malaj yal kichalk chi joʼkan? Ebʼ li aatin li xeʼxye ebʼ li winq li xooʼaatinak wiʼ saʼ xtiklajik, moko naxchap ta ribʼ rikʼin li naxye li Santil Hu. Wankebʼ nekeʼxpaabʼ li nekeʼxye ebʼ li winq ut wankebʼ chik nekeʼxpaabʼ li naxye li Santil Hu. Joʼkan naq naabʼalebʼ li kristiʼaan nekeʼxkol rix li nekeʼxpaabʼ saʼebʼ li hu li rajlal nakʼayimank ut saʼ tele. Joʼkan peʼ naq naabʼalebʼ inkʼaʼ chik nekeʼxnaw kʼaru xpaabʼankil.

Maare ebʼ laj kʼutunel xeʼxkʼut chaawu naq li choxa, li Ruuchichʼochʼ ut li yuʼam, yal kichalk chi joʼkan ut naq maakʼaʼ jun laj Yobʼtesinel. Abʼan, ma xeʼxkʼut chaawu naq maakʼaʼ laj Yobʼtesinel? Maare xaawabʼi naq ebʼ laj kʼamolbʼe saʼ li paabʼal xeʼxye naq wank jun laj Yobʼtesinel. Abʼan, ma xeʼxkʼut chaawu naq yaal naq wank laj Yobʼtesinel malaj yal xeʼxye aawe naq tento taapaabʼ?

Maare ak naabʼal sut xaakʼoxla rix li naʼlebʼ aʼin ut nakaakʼoxla naq chʼaʼaj xpaabʼankil naq wank laj Yobʼtesinel. Maare xaakʼoxla ajwiʼ, ma aajel ru xnawbʼal xsumenkil.

Saʼ li hu aʼin, taataw wiibʼ oxibʼ li eetalil li ak xtenqʼa naabʼal li kristiʼaan chi xpaabʼankil naq wank jun laj Yobʼtesinel. Joʼkan ajwiʼ, taakʼe reetal kʼaʼut wank xwankil xnawbʼal chanru kitiklaak li yuʼam.