Jun laawamiiw li nakatxbʼalaqʼi

Qayehaq naq wanq jun «laawamiiw» li xaanaw ru saʼ laasaajilal. Nakatxtenqʼa re naq tatnaʼlebʼaq chiʼus ut nakatxtenqʼa ajwiʼ re naq tatwanq choʼq ramiiw ebʼ li ramiiw. Junelik nakasikʼ re xkotzbʼal laakʼaʼuxl ut qʼaxal wiʼ chik nakasikʼ li xtenqʼ naq wank naabʼal laachʼaʼajkilal.

Abʼan saʼ xnumikebʼ li kutan kixkʼe reetal naq moko chaabʼil ta xnaʼlebʼ. Aʼan naxmin ru chi rochbʼeninkil yalaq bʼar naxik, usta aʼin naxbʼaanu naq moko sa ta tkʼuleʼq. Maare tatxtenqʼa abʼan kixkʼe saʼ chʼaʼajkilal laajunxaqalil. Ut moko kaʼaj tawiʼ aʼan, kirelqʼa naabʼal laatumin.

Laaʼat nakaawaj xkanabʼankil wank choʼq ramiiw, abʼan aʼan inkʼaʼ nakatxkanabʼ. Tooruuq raj xyeebʼal naq, aʼan chanchan chik laj echal aawe. Ut anaqwan qʼaxal nakaawaj raj naq maajunwa raj xaanaw ru.

AʼIN tzʼaqal li nekeʼxkʼul naabʼalebʼ li kristiʼaan rikʼin li mayibʼk. Qilaq li kixkʼul li xʼEarline, aʼan jun li ixq li ak 50 chihabʼ rokik chi mayibʼk, aʼan naxye: «Sa nawekʼa wibʼ naq wank wikʼin junaq li may chiru wank rikʼin junaq li kristiʼaan, nawil joʼ jun li wamiiw ut wank sut naq kaʼajwiʼ aʼan li wank wikʼin». Abʼan saʼ xnumikebʼ li kutan kixkʼe reetal naq li may moko aʼan ta jun tzʼaqal amiiw ut xiwxiw ru. Saʼ xtiklajik li tzolom aʼin naxkʼut li kixkʼul li xʼEarline, abʼan wank jun li xjalanil. Naq kixtzol naq li Yos inkʼaʼ nawulak chiru li mayibʼk xbʼaan naq aʼin naxtzʼajni ru li junxaqalil, kixtzʼeqtaana li mayibʼk (2 Corintios 7:1).

Joʼkan ajwiʼ kinaʼlebʼak laj Frank xbʼaan naq naraj xsahobʼresinkil xchʼool li Yos. Wiibʼ oxibʼ kutan chirix naq ak kixket jun li may, yalaq bʼar kiʼok xsikʼbʼal ebʼ li rit li may. Aʼan naxye: «Aʼin kixjal innaʼlebʼ, rilbʼal chanru yookin xbʼekbʼal saʼ chʼochʼ ebʼ li rit li may kixkʼe inyibʼ. Maajunwa chik xinmayibʼk».

Kʼaʼut jwal chʼaʼaj xkanabʼankil mayibʼk? Li nekeʼxtzʼil rix aʼin keʼxtaw oxibʼ li naʼlebʼ: 1) Li nachalk saʼ li may jwal chʼaʼaj xkanabʼankil joʼ li bʼan li nakanobʼresink u. 2) Li nekeʼrutzʼ li nicotina, kaʼajwiʼ nabʼayk wuqubʼ kʼajkʼasal ajwiʼ re naq twulaq saʼ li rulul. 3) Li may naʼokenk saʼ xyuʼam junaq li kristiʼaan joʼ li waʼak, li ukʼak, li seeraqʼik, naxkʼos li xkʼaʼuxl ut wank chik xkomon.

Usta joʼkan, joʼ xqil rikʼin li xʼEarline ut laj Frank, naru tat-elq rubʼel xwankil li mayibʼk. Wi taawaj xkanabʼankil li mayibʼk, ebʼ li junchʼol chik chi tzolom truuq aatenqʼankil re xjalbʼal laayuʼam.