Sikʼ aatenqʼ

«Naq junaq poyanam wank xjunes, moko chʼaʼaj ta numtaak saʼ xbʼeen. Abʼanan wi wiibʼebʼ, naru teʼxkuy xsumenkil saʼ li yalok» (Eclesiastés 4:12, SBG).

NAQ wank ani natenqʼank qe, naru naqaqʼax ru li chʼaʼajkilal. Joʼkan bʼiʼ, re xkanabʼankil mayibʼk, aajel ru taapatzʼ aatenqʼ re laajunkabʼal ut ebʼ laawamiiw.

Naru taapatzʼ aatenqʼ re junaq li kristiʼaan li kixkanabʼ mayibʼk, xbʼaan naq aʼan tixtaw aawu ut truuq aatenqʼankil. Laj Torben, jun laj paabʼanel li wank Dinamarca naxye: «Xkʼulbʼal li xtenqʼ ebʼ li junchʼol jwal loqʼ choʼq we». Laj Abraham li wank India naxye: «Li xrahom linjunkabʼal ut ebʼ li wechpaabʼanel xinxtenqʼa chi xkanabʼankil li mayibʼk». Abʼan wank sut moko tzʼaqal ta rikʼin li xtenqʼ ebʼ li qajunkabʼal ut ebʼ li qamiiw.

Laj Bhagwandas naxye: «Xinmayibʼk chiru 27 chihabʼ, abʼan naq xintzol li naxye li Santil Hu chirixebʼ li kʼaʼaq re ru li naxtzʼajni li junxaqalil, xintzʼeqtaana li mayibʼk. Xinyal inqʼe re naq timil timil tinkanabʼ mayibʼk. Xinkanabʼ rochbʼeninkilebʼ li wamiiw. Xinsikʼ intenqʼ rikʼin jun laj bʼanonel. Abʼan chixjunil aʼin moko kikʼanjelak ta. Toj naq saʼ jun li qʼoqyink xinte linchʼool chiru li Jehobʼa Yos ut xintzʼaama re naq tinxtenqʼa chi xkanabʼankil li mayibʼk. Chi joʼkaʼin, xinkanabʼ mayibʼk!».

Aajel ajwiʼ ru naq taakawresi aawibʼ chiruhebʼ li chʼaʼajkilal li naru taakʼul naq yookat xkanabʼankil li mayibʼk. Saʼ li jun chik tzolom tqil wiibʼ oxibʼ rehebʼ aʼin.

[Kaaxukuut]

MA TENTO TWOKSI EBʼ LI BʼAN RE NAQ TINKANABʼ MAYIBʼK?

Ebʼ li bʼan re xkanabʼankil mayibʼk, joʼebʼ li parche re nicotina, naʼoksimank xbʼaan naabʼalebʼ li kristiʼaan ut qʼaxal nakʼayimank. Naq toj maajiʼ nakat-ok roksinkil ebʼ li bʼan, kʼoxla aʼin.

Kʼaru rusilal wank? Ebʼ li kristiʼaan li nekeʼxye naq us roksinkil li bʼan nekeʼxye naq tatxtenqʼa re naq inkʼaʼ tkʼutunq naq yajat naq yookat xkanabʼankil li mayibʼk, abʼan moko chixjunilebʼ ta li kristiʼaan nekeʼxkʼulubʼa naq li bʼan aʼin natenqʼank.

Kʼaru chʼaʼajkilal naxkʼam chaq? Wiibʼ oxibʼ li bʼan naru tixbʼaanu naq taawaj xaʼawak, tchʼinanq laachʼool malaj taawaj xkamsinkil aawibʼ. Tento naq chʼolchʼooq chaawu naq roksinkil li bʼan re xkʼebʼal reqaj li nicotina juntaqʼeet ajwiʼ rikʼin roksinkil li bʼan li nakanobʼresink u ut juntaqʼeet ajwiʼ li chʼaʼajkilal li naxkʼam chaq choʼq re laajunxaqalil. Joʼkan bʼiʼ, li kristiʼaan li naroksi ebʼ li bʼan aʼin, yook xkʼaytesinkil ribʼ roksinkil li nicotina choʼq re li xjunxaqalil.

Kʼaru natenqʼank? Naq xeʼxpatzʼ rehebʼ li xeʼxkanabʼ mayibʼk, li 88% xeʼxye naq xeʼxkanabʼ chi inkʼaʼ xeʼroksi li bʼan.