Aatinaqo bʼayaq chaawix.

Xinyoʼlaak Estados Unidos saʼ li chihabʼ 1979. Naq wank oxibʼ chihabʼ we xeʼxkanabʼ ribʼ linnaʼ linyuwaʼ. Linnaʼ xinxkʼiresi joʼ jun aj Judiiy ut xinxtaqla saʼ li tzolebʼaal rehebʼ laj Judiiy, li nawbʼil joʼ yeshivás. Naq wank wuqubʼ chihabʼ we xookoho Israel, li tzolebʼaal bʼarwiʼ nintzolok wank kibutz joʼ nawbʼil ru li naʼajej aʼan. Saʼ xnumik jun chihabʼ xookoho México.

Usta maakʼaʼ li naʼajej re loqʼonink choʼq rehebʼ laj Judiiy rajlal sábado ninloch malaj ninlech linkanteel ut ninyaabʼasi li Santil Hu rehebʼ laj Judiiy ut nintijok rikʼin li xtenqʼ li sidur, li xhuhil li tij. Nawulak chiwu xyeebʼal rehebʼ li wechtzolom naq linpaabʼal aʼan li xbʼeen paabʼal. Maajunwa inyaabʼasihom li Akʼ Chaqʼrabʼ, li naʼaatinak chirix li xkʼutum ut li xkʼanjel li Jesukriist. Linnaʼ ak xyehom we naq inkʼaʼ twil xbʼaan naq naxkʼoxla naq teʼxpoʼ inkʼaʼuxl.

Kʼaʼut xat-ok xyaabʼasinkil li Akʼ Chaqʼrabʼ?

Naq wank 17 chihabʼ we xkohin wiʼ chik Estados Unidos re xchoybʼal lintzolbʼal. Jun li wamiiw kixye naq aʼan aj paabʼanel ut kixye we naq wi maakʼaʼ li Jesús saʼ linyuʼam maakʼaʼ aj e linyuʼam.

—Xinye re, ebʼ li kristiʼaan li nekeʼxpaabʼ li Jesús yal bʼalaqʼinbʼilebʼ.

—Aʼan kixye we, ma aayaabʼasihom junsutaq li Akʼ Chaqʼrabʼ?

—Xinye re, inkʼaʼ.

—Ut kixye we, joʼkan bʼiʼ, chan put ru naq nakat-aatinak chi joʼkan? Moko us ta aatinak wi moko nakaanaw ta li yookat xyeebʼal, aʼan xnaʼlebʼebʼ li toont.

Ra xnaq li raatin xbʼaan naq joʼkan ajwiʼ ninkʼoxla laaʼin. Xmaak inxutaan, xinkʼulubʼa li Santil Hu ut xinkʼam saʼ wochoch re xyaabʼasinkil li Akʼ Chaqʼrabʼ.

Ma xwulak chaawu li xaayaabʼasi?

Sachso xinkanaak naq xinkʼe reetal naq li Akʼ Chaqʼrabʼ tzʼiibʼanbʼil xbʼaanebʼ laj Judiiy. Naq yookin rilbʼal xsaʼ xinkʼe reetal naq li Jesús narahok ut naxkubʼsi ribʼ, naraj xtenqʼankilebʼ li kristiʼaan maawaʼ taqlank saʼ xbʼeenebʼ. Xkohin xsikʼbʼal ebʼ li hu li naʼaatinak chirix abʼan maajun rehebʼ li hu aʼin kixkʼut chiwu naq aʼan li Mesiiy. Wankebʼ li hu nekeʼxye naq aʼan li Yos abʼanan li naʼlebʼ aʼin maakʼaʼ xyaalal choʼq we. Xinʼok xkʼoxlankil: «Ma naraatina xjunes ribʼ li Jesús naq natijok?». Ut li Jesús kikamk abʼan li Santil Hu naxye chirix li Yos laaʼat, inkʼaʼ nakatkamk. *

Kʼaru xaabʼaanu re xtawbʼal xsumenkil?

Li yaal moko naxjalpaqi ta ribʼ ut laaʼin xinye naq tintaw li yaal. Tinyaabʼaq naq xintijok chiru li Yos chi anchal inchʼool ut aʼin xbʼeen sut naq inkʼaʼ xwoksi linsidur. Tojeʼaq xinraqeʼk chi tijok naq wiibʼ ebʼ laj testiiw re li Jehobʼa wankebʼ chiru li okebʼaal. Xooʼaatinak ut xeʼxkanabʼ we jun rehebʼ li xtasal hu. Li tasal hu ut li xooʼaatinak wiʼ xkʼut chiwu naq li nekeʼxpaabʼ chalenaq saʼ li Santil Hu. Jun eetalil, ebʼ laj Testiiw nekeʼxpaabʼ naq li Jesús «aʼan li Ralal li Yos» * ut «li xTiklajik chixjunil li xyoobʼtesihom li Yos» * ut maawaʼ jun rehebʼ li oxibʼ ru chi Yos.

Moqon xkohin wiʼ chik México ut aran xintzol li propesiiy chirix li Mesiiy rikʼinebʼ laj Testiiw. Wank naabʼal li propesiiy! Toj nawiibʼank ru linchʼool. Xinʼok xkʼoxlankil: «Ma kaʼajwiʼ rikʼin li Jesús keʼtzʼaqlok li propesiiy? Ut wi yal kixbʼaanu ribʼ naq aʼan li Mesiiy re xbʼalaqʼinkilebʼ li kristiʼaan?».

Kʼaru kiqʼunbʼesink re laachʼool?

Ebʼ laj Testiiw keʼxkʼut chiwu ebʼ li propesiiy li maajun li kristiʼaan li yal naxyoobʼ naq aʼan li Mesiiy kiruuk raj xbʼaanunkil. Jun eetalil, numenaq tana 700 chihabʼ naq laj Miqueas kixye naq li Mesiiy tyoʼlaaq Belén. * Ani tawiʼ truuq xyeebʼal bʼar tyoʼlaaq? Laj Isaías kixye naq li Mesiiy tkamsiiq joʼ jun aj maak ut kixye ajwiʼ naq tmuqeʼq saʼ xyanq ebʼ li bʼihom. * Chixjunil aʼin kitzʼaqlok ru rikʼin li Jesús.

Li kitenqʼank we re naq tchʼolaaq chiwu aʼin, aʼan rilbʼal anihebʼ li xxeʼtoon li Jesús. Li Santil Hu naxye naq li Mesiiy aʼanaq jun rehebʼ li ralal xkʼajol li awabʼej David. * Ebʼ laj Judiiy nekeʼxtzʼiibʼa chi tustu ru chixjunil aʼin joʼkan naq, wi li Jesús inkʼaʼ raj chalenaq saʼ li xjunkabʼal laj David ebʼ li xikʼ nekeʼilok re keʼxkʼe raj chi naweʼk aʼin. Abʼan inkʼaʼ xeʼruuk xmuqbʼal aʼin xbʼaan naq ebʼ li kristiʼaan nekeʼxye re «Ralal laj David». *

Treinta y siete chihabʼ chirix li xkamik li Jesús, saʼ li chihabʼ 70 ebʼ laj Roma keʼxjukʼ li tenamit Jerusalén ut keʼsach li hu bʼarwiʼ tzʼiibʼanbʼil li xjunkabʼal li Jesús. Joʼkan naq, re naq chʼolchʼooq tkanaaq saʼ kʼaru junkabʼal kichalk li Mesiiy tento raj kiyoʼlaak naq toj maajiʼ nasach li tenamit.

Kʼaru xaabʼaanu naq xaanaw chixjunil aʼin?

Saʼ Deuteronomio 18:18, 19, SBG, li Yos kixye naq tixwaklesi saʼ Israel jun chik li propeet joʼ laj Moisés ut kixye: «Yalaq ani inkʼaʼ trabʼi li kʼaru tixye li propeet aʼan saʼ inkʼabʼaʼ, laaʼin tinraqoq aatin saʼ xbʼeen aʼan». Naq xintzol chixjunil li Santil Hu kichʼolaak chiwu naq li Jesús re Nazaret aʼan li propeet li kixye li Jehobʼa.