Seeraqʼi qe chanru chaq laakachʼinal?

Xinyoʼlaak Italia saʼ li chihabʼ 1943. Linjunkabʼal ut laaʼin xookʼiik saʼ jun li kʼalebʼaal ut linyuwaʼ aj awinel ut aj peechʼ. Linnaʼ linyuwaʼ xooʼeʼxkʼiresi joʼ aj katoolk.

Kʼaʼut xaawaj wank joʼ aj kʼamolbʼe saʼ li iklees?

Saʼ linkachʼinal nawulak chiwu xik saʼ li iklees re rabʼinkil li naxye laj kʼamolbʼe, nawulak chiwu li xyaabʼ xkux ut chixjunil li nekeʼxbʼaanu saʼ li iklees. Saʼ li hoonal aʼan xinye naq nawaj wank joʼ aj kʼamolbʼe saʼ li iklees. Naq wank 13 chihabʼ we linnaʼ xinxkʼam saʼ jun li tzolebʼaal bʼarwiʼ nekeʼxkawresi li nekeʼraj wank joʼ ak kʼamolbʼe saʼ li iklees katoolk.

Ma xaatzol li Santil Hu naq yookat chaq chi tzolok?

Bʼayaq ajwiʼ, naq wank 15 chihabʼ we jun laj tzolonel kixkʼe we jun li hu li naʼaatinak chirix li xyuʼam li Jesús naq kiwank saʼ Ruuchichʼochʼ ut naabʼal sut xinyaabʼasi. Naq wank 18 chihabʼ we xkohin Roma re tzolok saʼebʼ li nimla tzolebʼaal li naxjolomi li papa. Aran xintzol latín, griego, historia, filosofía, psicología ut teología. Usta naqatzol wiibʼ oxibʼ li raqal ut naqabʼi li miix rajlal domiing inkʼaʼ naqatzol li Santil Hu.

Naq xatjolomink, ma xatkʼutuk ajwiʼ?

Linkʼanjel aʼan jolomink abʼan xinkʼutuk ajwiʼ chirix li decretos del Concilio Vaticano II.

Kʼaʼut naq xwiibʼank aachʼool chirix li iklees?

Wank oxibʼ li naʼlebʼ. Li xbʼeen aʼan naq li iklees natzʼaqonk saʼ xyanqebʼ li awabʼej, li xkabʼ naxkʼulubʼa xyibʼru aj naʼlebʼ ebʼ aj kʼamolbʼe ut ebʼ li junchʼol aj katoolk ut rox li xkʼutum li iklees inkʼaʼ natawmank ru. Jun eetalil, chanru jun li Yos li narahok tixrahobʼtesi ebʼ li kristiʼaan saʼ li xbʼalbʼa? Ut ma naraj tawiʼ naq tqoksi jun li rosaar re xyeebʼal naabʼal sut jun li tij? *

Kʼaru xaabʼaanu?

Tinyaabʼaq naq xintzʼaama re li Jehobʼa naq tinxtenqʼa. Xinloqʼ jun li Santil Hu Biblia de Jerusalén li kiʼelk saʼ italiano ut xinʼok rilbʼal xsaʼ. Jun domiing naq xinraqeʼk xkʼebʼal li miix xeʼwulak wiibʼ li winq bʼarwiʼ wankin ut xeʼxye naq aʼanebʼ aj testiiw re li Jehobʼa ut xooʼok chi aatinak chirix li Santil Hu. Xnumeʼk tana jun hoor naq xooʼaatinak chirix li Santil Hu ut chirix li tzʼaqal paabʼal.

Kʼaru xaakʼoxla chirixebʼ laj Testiiw?

Xsach inchʼool chi rilbʼal naq chʼolchʼo chiruhebʼ li nekeʼxye ut naq nekeʼxnaw roksinkil jun Xsantil Hu rehebʼ laj katoolk. Moqon laj Mario jun laj Testiiw kiʼok wulaʼaninkil. Maakʼaʼ naxye ma yook li habʼ malaj inkʼaʼ nawulak rajlal sábado 9 re eqʼla.

Kʼaru nekeʼxkʼoxla ebʼ laawech aj kʼamolbʼe naq nakateʼrulaʼani?

Xinbʼoqebʼ chi tzolok abʼan maakʼaʼ nekeʼraj re. Abʼan kʼajoʼ xwulak chiwu. Yookin xtzolbʼal naabʼal li chaabʼil naʼlebʼ. Jun rehebʼ aʼan, kʼaʼut naq li Yos maajiʼ narisi li rahilal ut li maaʼusilal?, jun li naʼlebʼ li nikinxchʼaʼajki chaq.

Ma xeʼxye aawe naq taakanabʼ xtzolbʼal li Santil Hu li nekeʼjolomink aawe?

Saʼ li chihabʼ 1975 naabʼal sut xinkoho Roma re xchʼolobʼankil chiruhebʼ li yookin xtzolbʼal. Li nekeʼjolomink we xeʼxyal xjalbʼal inkʼaʼuxl abʼan maajun rehebʼ xeʼroksi li Santil Hu. Saʼ li 9 re enero 1976 xintaqla jun li esilhu aran Roma re xyeebʼal rehebʼ naq inkʼaʼ chik tintzʼaqonq rikʼinebʼ. Wiibʼ kutan chirix aʼan xinkanabʼ li naʼajej bʼarwiʼ wankin ut xinkoho xbʼeen sut saʼ jun li chʼutam rehebʼ laj Testiiw aʼan peʼ jun li nimla chʼutam. Jalan chiru li kʼaynaqin chi rilbʼal. Chixjunilebʼ wankebʼ Xsantil Hu ut nekeʼxsikʼ li raqal li naxye li yook xkʼebʼal li seeraqʼ.

Kʼaru xeʼxye laajunkabʼal?

Wankebʼ xeʼjosqʼoʼk. Abʼan xinnaw naq jun rehebʼ li wiitzʼin yook xtzolbʼal li Santil Hu rikʼinebʼ laj testiiw re li Jehobʼa aran Lombardía, Italia. Xinkoho rilbʼal ut ebʼ laj Testiiw aran xineʼxtenqʼa re xtawbʼal inkʼanjel ut li wochoch. Saʼ li chihabʼ ajwiʼ aʼan xinʼok joʼ aj testiiw re li Jehobʼa.

Ma inkʼaʼ narahok aachʼool rikʼin li xaakanabʼ chaq?

Inkʼaʼ! Wankin chik saʼ aamiiwil rikʼin li Jehobʼa xbʼaan naq xintzol saʼ li Santil Hu chanru nanaʼlebʼak maawaʼ rikʼin li xnaʼlebʼebʼ li winq ut xbʼaanuhomebʼ laj katoolk. Anaqwan naq ninʼaatinak rikʼinebʼ li kristiʼaan chʼolchʼo chiwu naq ninye li yaal.