LI NEKEʼXYE LI KRISTIʼAAN.

Naabʼalebʼ nekeʼxkʼoxla naq maakʼaʼ reekʼ xbʼuulinkil rix li tumin wi nabʼaanumank joʼ naxye li chaqʼrabʼ. Ebʼ li awabʼej nekeʼroksi li xtuminal li loteriiy re xtenqʼankil li xtenamit.

LI NAXYE LI SANTIL HU.

Li Santil Hu moko naroksi ta li aatin «bʼuulink». Abʼan naxkʼe li naʼlebʼ re xnawbʼal chanru naril li Yos aʼin.

Li xyaalal li bʼuulink tumin aʼan xchapbʼal choʼq aawe li xeʼxsach li junchʼol ut aʼin moko aʼan ta li kixkʼut li Jesús naq kixye: «Chekolaq eeribʼ chiru chixjunil li atawank» (Lucas 12:15, Li Santil Hu, Sociedad Bíblica de Guatemala, SBG). Li xyaalalil, ebʼ li kristiʼaan nekeʼbʼatzʼunk xbʼaan naq nekeʼxrahi ru li tumin. Saʼ li naʼaj bʼarwiʼ nekeʼxbʼuuli li tumin nekeʼxye joʼkʼihal li tumin li naru tweechani abʼan moko nekeʼxye ta naq naru tattzʼeqoq. Saʼ xkʼabʼaʼ naq ebʼ li kristiʼaan nekeʼraj bʼihomoʼk nekeʼxbʼuuli rix naabʼal li tumin saʼ li naʼaj re bʼatzʼunk tumin. Xbʼuulinkil rix li tumin naxbʼaanu naq junaq li kristiʼaan tixrahi ru xtawbʼal saʼ junpaat li tumin.

Li bʼuulink rix tumin yiibʼanbʼil re naq ebʼ li kristiʼaan kaʼajwiʼ teʼxkʼoxla ribʼ xjunes, abʼan li Santil Hu naxye: «Maaʼani chixsikʼ li kʼaru us choʼq re xjunes, aʼaq bʼan li us choʼq re li ras riitzʼin chixsikʼ» (1 Corintios 10:24, SBG). Jun rehebʼ li lajeebʼ chi chaqʼrabʼ naxye: «Maakʼaʼ kʼaʼ chik re ru re leeras eeriitzʼin teera ru» (Éxodo 20:17, Li Santil Hu, Wycliffe Bible Translators, Wy. Akʼ tzʼiibʼ). Li naraj elk chiʼubʼej naroybʼeni naq ebʼ li junchʼol teʼtzʼeqoq re naq tixkʼam choʼq re li tumin.

Li Santil Hu naxye ajwiʼ naq inkʼaʼ tqakʼe xwankil li suʼeert re naq tqataw qabʼihomal. Saʼ li najter Israel wankebʼ li inkʼaʼ keʼxpaabʼ li Yos ut keʼok xpaabʼankil «laj Gad» li xyosil li suʼeert. Chanru kiril li Yos aʼin? Aʼan kixye: «Xebʼaanu bʼan li inkʼaʼ nawulak chiwu, aʼ chik li nachiqʼok injosqʼil xesikʼ xbʼaanunkil» (Isaías 65:​11, 12, SBG).

Wiibʼ oxibʼ li awabʼej nekeʼroksi li tumin li nachalk saʼ li bʼuulink re xtenqʼankil li tenamit chirix li tzolok malaj jalan chik li naʼlebʼ. Abʼan maakʼaʼ naxye chanru nekeʼroksi, maakʼaʼ najalok re chanru xeʼxtaw: li tumin aʼin nachalk rikʼinebʼ li kaʼajwiʼ nekeʼxkʼoxla ribʼ ut inkʼaʼ nekeʼraj kʼanjelak re xtawbʼal li tumin.

«Maakʼaʼ kʼaʼ chik re ru re leeras eeriitzʼin teera ru» (Éxodo 20:17, Wy. Akʼ tzʼiibʼ).

LI NAXYE LI SANTIL HU.

Li Santil Hu naxye naq «li nekeʼraj bʼihomoʼk, nekeʼxkʼ e ribʼ chi aaleek ut teʼtʼaneʼq saʼ li raʼal, saʼ kʼiila paay chi kaqalik qʼaxal yibʼebʼ ru ut maakʼaʼ naʼok wiʼ: ebʼ aʼan nekeʼkʼamok rehebʼ li winq saʼ li sachlebʼaal ut saʼ li lajk-osoʼk» (1 Timoteo 6:9, SBG). Li xxeʼ li bʼuulink aʼan li atawank. Joʼkan naq li Santil Hu naxkʼe li atawank saʼ xyanq ebʼ li naʼlebʼ li tento tqakʼe weent re naq inkʼaʼ tootʼaneʼq chisaʼ (Efesios 5:3).

Li bʼuulink naxbʼaanu naq taataw li tumin saʼ junpaat joʼkan naq narekʼasi laachʼool re «xrahinkil ru li tumin». Li Santil Hu naxye naq xrahinkil ru li tumin aʼan «xxeʼ chixjunil li maaʼusilal». Xrahinkil ru li bʼihomal aʼan chik li nataqlank saʼ xyuʼam junaq li kristiʼaan. Aʼin naxbʼaanu naq tnumtaaq li xkʼaʼuxl ut tixkʼe saʼ chʼaʼajkilal li xpaabʼal. Li Santil Hu naxye naq li xeʼtʼaneʼk saʼ li raʼal aʼin «xiikil li rahilal xeʼtawasiik wiʼ» (1 Timoteo 6:10, SBG).

Li naʼatawank junelik naraj xtzʼaqobʼ li xbʼihomal ut moko sa ta chik xchʼool. Saʼ Eclesiastés 5:10, SBG, naxye: «Ani naxra li tumin, inkʼaʼ nakʼojlaak xchʼool rikʼin aʼan. Ut li wank naabʼal xbʼihomal, toj naraj naabʼal xtzʼaqobʼ».

Chi miyon ebʼ li kristiʼaan li xeʼwulak chiru bʼuulink inkʼaʼ chik xeʼruuk xkanabʼankil. Kaʼajwiʼ saʼ Estados Unidos wankebʼ chi miyon li kristiʼaan li xeʼkʼayk chi bʼuulink.

Saʼ Proverbios 20:21 naxye naq ebʼ li kristiʼaan li nekeʼatawank naru nekeʼbʼihomoʼk abʼan inkʼaʼ teʼxtaw li rosobʼtesihom li Yos. Li nakʼayk chi bʼuulink naru naxchʼik ribʼ saʼ chʼaʼajkilal, naru naxkʼe ribʼ saʼ kʼas, naxsach li xjunkabʼal, li xkʼanjel malaj ebʼ li ramiiw. Xyuʼaminkil li xnaʼlebʼ li Santil Hu chirix li bʼuulink tooxkol chiru li rahilal aʼin.

«Li nekeʼraj bʼihomoʼk, nekeʼxkʼe ribʼ chi aaleek ut teʼtʼaneʼq saʼ li raʼal, saʼ kʼiila paay chi kaqalik qʼaxal yibʼebʼ ru ut maakʼaʼ naʼok wiʼ: ebʼ aʼan nekeʼkʼamok rehebʼ li winq saʼ li sachlebʼaal ut saʼ li lajk-osoʼk» (1 Timoteo 6:9, SBG).