Li chaabʼil esil chirix li Xʼawabʼejilal li Yos yook chi puktesimank saʼ chixjunil li ruuchichʼochʼ joʼ kixye chaq li Jesús (Mateo 24:14). Li hu Daniel naxye naq li Awabʼejilal aʼin chalenaq rikʼin li Yos. Saʼ li tasal 2, naxkʼe jun li propesiiy chirix li xwanjikebʼ jalan jalanq li awabʼejilal chalen li awabʼejilal re li tenamit Babilonia toj ebʼ li awabʼej saʼebʼ li qakutan ut saʼ li raqal 44 naxye li tkʼulmanq moqon:

«Li xYos li choxa tixwaklesi chaq jun awabʼejihom li maajun wa taajukʼmanq, chi moko taakanaaq rubʼel xwankil jalan chik tenamit. Tixjukʼi ut tixputzʼihebʼ li awabʼejihom junchʼol, ut aʼan wanq xwankil chi junelik».

Li propesiiy aʼin ut junchʼol chik li propesiiy nekeʼxye naq li Xʼawabʼejilal li Yos t-oq choʼq reqaj li xʼawabʼejilal li winq ut aʼin tixkʼam chaq tuqtuukilal saʼ Ruuchichʼochʼ. Chanruhaq li wanjik rubʼel li Awabʼejilal aʼin? Qilaq junjunq rehebʼ li yeechiʼom li ttzʼaqloq ru chi seebʼ.

• MAAKʼAʼAQ CHIK LI YALOK U

  Salmo 46:10. Li Yos «xchʼanabʼank re li yalok toj saʼ xmaril li ruuchichʼochʼ, xtoqi li xnaʼ simaj ut xjach li jutzʼ cheʼ; aʼan xkʼehok xxamlel li ramlebʼ chʼiichʼ».

  Kʼoxla chanruhaq li yuʼam wi t-oksimanq raj li tumin ut li nawom re xtenqʼankilebʼ li kristiʼaan ut maawaʼ re xyiibʼankil ebʼ li kʼanjelobʼaal choʼq re li yalok u. Li yeechiʼom aʼin, ttzʼaqloq ru rubʼel li Xʼawabʼejilal li Yos.

• MAAKʼAʼAQ CHIK LI YAJEL

  Isaías 33:24. «Maajun chik saʼ qayanq tixye: “Yajin”».

  Kʼoxla chanruhaq li yuʼam saʼ Ruuchichʼochʼ naq maakʼaʼaq chik ebʼ li yajel. Inkʼaʼ chik t-ajmanq ebʼ li bʼanlebʼaal ut ebʼ li bʼan. Xbʼaan naq chixjunilebʼ kawaqebʼ li xjunxaqalil.

• MAAKʼAʼAQ CHIK WEʼEJ

  Salmo 72:16. «Numtajenaqaq li awimq saʼ ruuchichʼochʼ, heetanqebʼ saʼ xbʼeenebʼ li loqʼlaj tzuul».

  Twanq naabʼal li tzekemq choʼq re chixjunilebʼ ut tjekʼimanq chiʼus. Maaʼani chik tixnumsi li weʼej ut tyajerq xbʼaan naq inkʼaʼ nawaʼak chiʼus.

• MAAKʼAʼAQ CHIK LI RAHILAL UT LI KAMK

  Apocalipsis 21:4. Li Yos «tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal, xbʼaan naq li najter ruuchichʼochʼ ak xnumeʼk».

   Tzʼaqalaq re ru li xyuʼamebʼ li kristiʼaan naq teʼwanq saʼ li chʼinaʼusil naʼajej arin saʼ Ruuchichʼochʼ. Aʼin tzʼaqal li naxyeechiʼi qe li Qayos Jehobʼa.

Peʼyaal naq chʼaʼaj xpaabʼankil aʼin? Usta wankebʼ nekeʼwulak chiru xnawbʼal chirix li yuʼam li naxyeechiʼi li Santil Hu naabʼal rehebʼ nekeʼchʼaʼajkoʼk chiru xtawbʼal ru kʼaru naraj xyeebʼal li junelik yuʼam. Kʼaʼut? Xbʼaan naq maajun qe wank qayuʼam chi junelik.

Chiru naabʼal chihabʼ, chiqajunilo wanko rubʼel xwankil li maak ut li kamk. Joʼkan naq naabʼalebʼ nekeʼxkʼoxla naq ak re naq naqakʼul li rahilal ut li chʼaʼajkilal. Abʼan, moko aʼin ta kiraj li Yos choʼq rehebʼ li kristiʼaan.

Re naq tqakʼojobʼ qachʼool rikʼin li xyeechiʼom, li Yos kixye aʼin: «Inkʼaʼ taasutqʼiiq chaq wikʼin chi maakʼaʼ tixkʼam chaq, tento bʼan naq xbʼenwa tixbʼaanu li wajom ut tixpaabʼ li kʼaru xintaqla wiʼ» (Isaías 55:11).

Li Santil Hu naxye naq «li Yos inkʼaʼ natikʼtiʼik» (Tito 1:2). Joʼkan naq, aajel ru xkʼoxlankil rix ebʼ li patzʼom aʼin: «Ma relik chi yaal tooruuq chi wank saʼ jun li chʼinaʼusil naʼajej arin saʼ Ruuchichʼochʼ? Kʼaru tento tqabʼaanu re naq tqataw rusilal li xyeechiʼom li Yos?». Re xtawbʼal xsumenkil ebʼ li patzʼom aʼin, il li jun chik tzolom.