Li toqʼobʼank u naraj xyeebʼal rekʼankil ut xkʼebʼal aawibʼ saʼ xnaʼaj li kristiʼaan li yook xkʼulbʼal rahilal. Laj bʼanonel Rick Hanson kixye naq «ak re naq wank li toqʼobʼank u qikʼin».

KʼOXLA AʼIN: Kʼaʼut naq nokooruuk toqʼobʼank u ut ebʼ li xul inkʼaʼ? Li Santil Hu naxye naq yobʼtesinbʼilo joʼ xjalam u li Yos (Génesis 1:26). Aʼin naraj xyeebʼal naq nokooruuk chi naʼlebʼak joʼ aʼan ut xkʼutbʼesinkil li xchaabʼil naʼlebʼ. Joʼkan bʼiʼ, naq naqakʼutbʼesi li toqʼobʼank u yooko xkʼutbʼesinkil li xchaabʼil naʼlebʼ li Jehobʼa (Proverbios 14:31).

Li Yos naxtoqʼobʼa qu ut xikʼ naril naq naqakʼul junaq li rahilal. Naq ebʼ laj Israel xeʼwank joʼ moos saʼ Egipto ut xeʼwank saʼ li chaqichʼochʼ chiru 40 chihabʼ, li Santil Hu naxye: «Kiyotʼeʼk xchʼool li Qaawaʼ xbʼaan li rahilal li yookebʼ chi xkʼulbʼal ebʼ laj Israel» (Isaías 63:9, Wy). Kʼehomaq reetal naq li Yos moko kaʼaj tawiʼ kiril li rahilal li yook xnumsinkil li xtenamit, kirekʼa bʼan li xrahilalebʼ. Aʼan naxye: «Ak ninnaw li xrahilalebʼ» (Éxodo 3:7). Li Yos naxye ajwiʼ: «Ani taarahobʼtesinq eere, tinxrahobʼtesi ajwiʼ laaʼin» (Zacarías 2:8). Kʼajoʼ nayotʼeʼk li raanm naq nokooʼeʼxrahobʼtesi.

Li Santil Hu naxye naq usta naqekʼa naq moko qakʼulubʼ ta naq li Yos truxtaana qu, aʼan «nim xwankil chiru li qachʼool ut naxnaw chixjunil» (1 Juan 3:19, 20). Li Yos naxnaw qu chi tzʼaqal. Naxnaw li naqakʼul, li naqakʼoxla, li naqekʼa ut naxkʼe ribʼ saʼ qanaʼaj.

Li Santil Hu naxye:

• «Chi joʼkan, wi taayaabʼa linkʼabʼaʼ, laaʼin tatinsume; wi tinaabʼoq, tinye aawe: “Weʼkin!”» (ISAÍAS 58:9).

• «Laaʼin wank saʼ inchʼool kʼaru tinbʼaanu choʼq eere: twaj texwanq saʼ tuqtuukilal ut inkʼaʼ saʼ rahilal, re naq toxeetaw xsahil eechʼool chi junelik. Laaʼin, li Qaawaʼ, ninyehok re aʼin. Tojaʼ naq teepatzʼ linkʼabʼaʼ, tulextijoq chiwu, ut laaʼin texwabʼi» (JEREMÍAS 29:11, 12).

• «Chakʼul li xyaʼal wu saʼ laakuk. Ma inkʼaʼ tabʼiʼ tzʼiibʼanbʼil chixjunil saʼ laahu?» (SALMO 56:9).

Ma tooruuq xqʼaxbʼal ru ebʼ li qachʼaʼajkilal rikʼin xnawbʼal naq li Yos naxtaw ru li naqekʼa? Qilaq li kixkʼul li xMaría.

«Xwekʼa naq jwal kaw linyuʼam ut naq maakʼaʼ naʼok wiʼ naq xwil naq linyum li wank 18 chihabʼ re, chiru wiibʼ chihabʼ kixyal xqʼe chiru li kanser, abʼanan moqon kikamk. Xinpoʼ rikʼin li Jehobʼa xbʼaan naq maakʼaʼ kixbʼaanu re xkolbʼal linyum.

»Xwekʼa naq li Jehobʼa moko nikinxra ta. Waqibʼ chihabʼ chirix aʼin, xinye re jun li wamiiw li wank saʼ linchʼuut li nawekʼa. Naq ak kixkʼe xchʼool chi wabʼinkil chiru naabʼal hoor kixjultika chiwu jun li raqal li kʼajoʼ kixtochʼ inchʼool. Li raqal aʼan 1 Juan 3:19, 20 bʼarwiʼ naxye: “Li Yos nim xwankil chiru li qachʼool ut naxnaw chixjunil”. Ut chirix chik aʼan kixchʼolobʼ chiwu naq li Jehobʼa naxtaw ru li naqakʼul.

»Usta joʼkan, xchʼaʼajkoʼk chiwu xqʼaxbʼal ru li nawekʼa. Moqon xinyaabʼasi Salmo 94:19 bʼarwiʼ naxye: “Naq numtajenaq namayok saʼ inchʼool, laaʼat nakakʼojobʼ ut nakasahobʼresi li waanm”. Aʼin tzʼaqal li nawaj rabʼinkil. Joʼkan naq xinruuk xyeebʼal re li Jehobʼa li xrahil linchʼool, xbʼaan naq chʼolchʼo chik chiwu naq nikinxrabʼi ut naxtaw ru li nawekʼa. Aʼin kixtuqubʼ ru linchʼool».

Kʼajoʼ naxkʼojobʼ qachʼool xnawbʼal naq li Yos naxtaw ru li naqekʼa ut naxkʼe ribʼ saʼ qanaʼaj! Abʼan, kʼaʼut naq wank naabʼal li rahilal? Ma yook xbʼaanunkil naq tqatoj rix li qamaak? Ma tixsach li rahilal saʼ junaq kutan? Taataw xsumenkil ebʼ li patzʼom aʼin saʼ li jun chik tzolom.