Wi li Yos moko wank ta re, ani put wank re? Kʼaʼut naq naabʼalebʼ li kristiʼaan yookebʼ chi kamk xbʼaan li tzʼokajik ut wankebʼ saʼ nebʼaʼil? Kʼaʼut naq wank naabʼal li yalok u, yajel ut rahilal? Li Santil Hu naxye oxibʼ xyaalal kʼaʼut naqakʼul li rahilal:

1. Li pixilal, li chiqʼilal ut li xikʼ ilok. «Winq kʼeebʼilebʼ xwankil chi xrahobʼtesinkil ebʼ li ras riitzʼin» (Eclesiastés 8:9). Naqakʼul li rahilal xbʼaan naq ebʼ li kristiʼaan ebʼ aj pix.

2. Naq naqakʼul li rahilal naq inkʼaʼ naqoybʼeni. Li Santil Hu naxye naq ebʼ li kristiʼaan nekeʼxkʼul li rahilal «xbʼaan naq xtaw xhonal xkʼulbʼal li chʼaʼajkilal choʼq rehebʼ. Joʼwiʼ anchal, inkʼaʼ naqanaw joʼqʼe tqakʼul junaq chʼaʼajkilal» (Eclesiastés 9:11, 12). Aʼin naraj xyeebʼal naq wank sut naqakʼul li rahilal xbʼaan naq wanko saʼ li hoonal malaj saʼ li naʼaj bʼarwiʼ maajunwa naqakʼoxla, inkʼaʼ naqabʼaanu weent malaj xoopaltoʼk.

3. Li maaʼus yook chi jolomink re li ruuchichʼochʼ. Li Santil Hu naxye chi chʼolchʼo ru ani wank re naq naqakʼul li rahilal naq naxye: «Chixjunil li ruuchichʼochʼ wank rubʼel xwankil li maaʼus» (1 Juan 5:19). «Li maaʼus» aʼan laj Tza. Saʼ xtiklajik aʼan jun chaabʼil ánjel, abʼan «inkʼaʼ kixkuy wank saʼ li yaal» (Juan 8:44). Junchʼol chik ebʼ li ánjel keʼokenk chirix laj Tza re naq teʼxbʼaanu li nekeʼrataw ut chi joʼkan keʼok joʼ li maaʼus aj musiqʼej (Génesis 6:1-5). Chalen naq laj Tza ut ebʼ li xmaaʼus aj musiqʼej keʼxqʼet ribʼ chiru li Jehobʼa, keʼok chi taqlank saʼ xbʼeen li ruuchichʼochʼ ut anaqwan kutan saqenk nakʼutunk li xbʼaanuhomebʼ. Joʼkan naq laj Tza kʼajoʼ xjosqʼil ut aʼan «nabʼalaqʼink re chixjunil li ruuchichʼochʼ» joʼkan naq li Santil Hu naxye: «Ra chaalel saʼ eebʼeen laaʼex li ruuchichʼochʼ ut palaw» (Apocalipsis 12:9, 12). Laj Tza yibʼru xnaʼlebʼ, nabʼalaqʼink ut nawulak chiru xrahobʼtesinkil ebʼ li kristiʼaan. Aʼan wank re naq naqakʼul li rahilal, maawaʼ li Yos.

KʼOXLA AʼIN: Kaʼajwiʼ jun li yibʼru aj kristiʼaan tixbʼaanu naq ebʼ li junchʼol teʼxkʼul li rahilal. Abʼan li Santil Hu naxye naq «li Yos aʼan rahok» (1 Juan 4:8). Joʼkan naq, naru naqaye naq li tzʼaqal Yos inkʼaʼ naxbʼaanu li maaʼusilal malaj naxkʼam chaq li rahilal (Job 34:10).

Maare nakaakʼoxla, joqʼe tsacheʼq ru laj Tza ut li xmaaʼusilal? Joʼ ak xqil, li Yos xikʼ naril li maaʼusilal ut narahoʼk xchʼool naq naqakʼul junaq li rahilal. Joʼkan naq li Raatin naxye naq naru naqaye re li xkʼaʼuxl wi qachʼool xbʼaan naq naxkʼe xchʼool chiqix (1 Pedro 5:7). Saʼ li jun chik tzolom tqil naq li Yos nokooxra ut naq wank xwankil re risinkil li rahilal ut li xikʼ ilok. a