Li Yos kixyobʼtesi li xjunxaqalil li kristiʼaan re naq tkʼiraaq xjunes. Naq junaq li kristiʼaan naxyokʼ ribʼ malaj naʼok saʼ xtibʼel junaq li kʼaʼaq re ru «timil timil li xtibʼel naxbʼaanu naq tkʼiraaq li xtochʼolal, aʼ yaal ma nim malaj kachʼin» (Johns Hopkins Medicine). Li qajunxaqalil saʼ junpaat naxbʼaanu naq inkʼaʼ chik t-elq li kikʼ, naxkʼirtasi ut naxbʼaanu naq tixchap ribʼ wiʼ chik li qatibʼel.

KʼOXLA AʼIN: Wi laj Yobʼtesinel kixbʼaanu naq li qajunxaqalil xjunes tixkʼirtasi ribʼ, ma inkʼaʼ tawiʼ wank xwankil re qatenqʼankil re naq inkʼaʼ chik rahaq saʼ qachʼool? Jun rehebʼ li kitzʼiibʼank re li Salmo, chʼolchʼo chiru naq li Yos «xkʼirtasihebʼ li toqʼobʼebʼ ru ut xbʼan chixjunilebʼ li xtiqʼilalebʼ» (Salmo 147:3). Abʼanan, wi narahoʼk aachʼool xbʼaan jun li naʼlebʼ li xaakʼul chaq junxil malaj tojeʼ xaanumsi, ma chʼolchʼo chaawu naq li Yos tatxtenqʼa re naq sa taawekʼa aawibʼ anaqwan ut saʼebʼ li kutan chalk re?

Li Yos naxye: «Matxiwak, xbʼaan naq wankin aawikʼin; matkʼoxlak xbʼaan naq laaʼin laaYos. Laaʼin ninkawubʼresink ut nintenqʼank aawe» (Isaías 41:10). Xnawbʼal naq li Jehobʼa nokooxra, naxkʼe qe li tuqtuukilal ut li metzʼew re naq tooruuq xqʼaxbʼal ru ebʼ li chʼaʼajkilal. Li apóstol Pablo kixye naq li tuqtuukilal aʼin, aʼan «li tuqtuukil usilal li nachalk rikʼin li Yos ut naxqʼax ru chixjunil li naʼlebʼ». Kixye ajwiʼ: «Chixjunil ninkuy xnumsinkil saʼ xkʼabʼaʼ Li nakʼehok xkawubʼ inchʼool» (Filipenses 4:4-7, 9, 13).

Li Santil Hu naxkawresi li qapaabʼal rikʼin li naxye naq tixbʼaanu li Yos chi seebʼ. Jun eetalil, Apocalipsis 21:4, 5 (li natawmank saʼ li jun chik perel) naxye kʼaru tixbʼaanu li Yos ut kʼaʼut tooruuq xkʼojobʼankil li qachʼool rikʼin.

• «Tixchaqihobʼresi chixjunil li xyaʼalebʼ ru». Li Jehobʼa tixsach chixjunil li rahilal ut li naxbʼaanu naq inkʼaʼ sa tqekʼa qibʼ, usta nim malaj kachʼin li chʼaʼajkilal.

• Naq «kʼojkʼo saʼ li kʼojaribʼaal» li nimajwal Awabʼej troksi li xmetzʼew ut li xwankilal re risinkil li rahilal ut re qatenqʼankil naq t-ajmanq chiqu.

• Li Jehobʼa naxye naq ebʼ li xyeechiʼom «tzʼaqal yaal ut us xpaabʼankil». Aʼin naraj xyeebʼal, naq li Jehobʼa naroksi li xkʼabʼaʼ ut li naxbʼaanu re xkʼutbʼesinkil naq yaal li naxye.

«[“]Tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal, xbʼaan naq li najter ruuchichʼochʼ ak xnumeʼk”. Tojaʼ naq li kʼojkʼo saʼ xbʼeen li nimajwal kʼojaribʼaal kixye: “Kʼe reetal, laaʼin tinʼakʼobʼresi chixjunil”. Kixye ajwiʼ: “Tzʼiibʼa, xbʼaan naq ebʼ li aatin aʼin tzʼaqal yaal ut paabʼajel”» (Apocalipsis 21:4, 5).

Li yobʼtesihom ut li Santil Hu nokooxtenqʼa re xnawbʼal ru li qachoxahil Yuwaʼ. Li yobʼtesihom naxkʼut chiqu naq nokooruuk wank choʼq ramiiw li Yos. Li Santil Hu naxye qe aʼin: «Jilonqex chi xkʼatq li Yos, ut aʼan taajiloq chekʼatq» (Santiago 4:8). Ut Hechos 17:27 naxye: «Moko najt ta wank qikʼin chiqajunjunqal».

Wi nakaakʼe aachʼool chi xnawbʼal ru li Yos, taakʼe reetal naq aʼan naxkʼe xchʼool chaawix (1 Pedro 5:7). Kʼaru rusilal taataw wi nakaakʼojobʼ aachʼool rikʼin li Jehobʼa?

Qilaq li kixkʼul laj Toru li wank Japón. Usta li xnaʼ kixkʼut chiru li naxye li Santil Hu, aʼan kiʼokenk saʼ li chʼuut Yakuza, li nakʼabʼaʼiik ajwiʼ mafia japonesa. Aʼan naxye: «Ninkʼoxla naq li Yos xikʼ nikinril ut naq nakamk junaq linkomon malaj li wamiiw nawekʼa naq li Yos yook xbʼaanunkil naq tintoj rix linmaak». Laj Toru naxye naq aʼin kixbʼaanu naq «tixpoʼ xnaʼlebʼ ut naq trahobʼtesinq». Kixye ajwiʼ naq «kiraj kamk naq toj saaj chaq ut naq tnaweʼq ru xbʼaan naq xkamsi jun li kristiʼaan li nim xwankil chiru aʼan».

 Abʼanan, naq laj Toru ut li xHannah, li rixaqil, keʼok xtzolbʼal li Santil Hu, laj Toru kixjal li xyuʼam ut li xwanjik. Li xHannah naxye: «Xwil chanru linbʼeelom kixjal xnaʼlebʼ». Laj Toru naxye: «Chʼolchʼo chiwu naq wank jun li Yos ut naxkʼe xchʼool chiqix. Li Yos inkʼaʼ naraj naq maaʼani tkamq ut chi anchal xchʼool naxkuyebʼ xmaak li nekeʼxjal xnaʼlebʼ. Tooruuq xyeebʼal re li inkʼaʼ raj tqaye re junaq li kristiʼaan ut li inkʼaʼ teʼxtaw ru. Li Jehobʼa chi seebʼ tixsach chixjunil ebʼ li chʼaʼajkilal ut li rahilal. Joʼkan ajwiʼ, saʼebʼ li qakutan nokooxtenqʼa rikʼin li yooko xnumsinkil. Naxkʼe xchʼool chiqix ut nokooxtenqʼa naq ra qachʼool» (Salmo 136:23).

Joʼ xkʼulmank rikʼin laj Toru, xnawbʼal naq li Yos chi seebʼ tixsach chixjunil li rahilal naxkʼe qoybʼenihom ut naxbʼaanu naq chaabʼilaq li qayuʼam anaqwan. Joʼkan utan, usta numtajenaq li rahilal saʼ ruuchichʼochʼ, tatruuq xtawbʼal rusilal li xrahom li Yos.