«At Qaawaʼ, joʼ najtil chik japjoʼq we chi xpatzʼbʼal intenqʼankil aawe chi inkʼaʼ nikinaawabʼi? Toj joʼqʼe yooqin chi jitok xbʼaan li raaxiikʼ chi inkʼaʼ tatchalq chi qakolbʼal?» (Habacuc 1:2, 3). Joʼkaʼin kixye laj Habacuc, jun laj kʼanjel chiru li Yos. Ma kixye ebʼ li aatin aʼin xbʼaan naq inkʼaʼ naxkʼojobʼ xchʼool rikʼin li Yos? Inkʼaʼ, moko joʼkan ta. Li Yos kixye re naq ak xaqabʼanbʼil jun li kutan bʼarwiʼ tixsach chixjunil li rahilal (Habacuc 2:2, 3).

Naq naqakʼul junaq li rahilal malaj ebʼ li qamiiw ut ebʼ li qakomon nekeʼrahobʼtesiik, tooruuq raj xyeebʼal naq li Yos maakʼaʼ naxbʼaanu re qatenqʼankil. Abʼanan li Santil Hu naxye: «Li Qaawaʼ inkʼaʼ nabʼayk chi xkʼeebʼal li bʼarwan kixyeechiʼi. Wankebʼ nekeʼkʼoxlank re naq yo chi bʼayk, abʼan moko yaal ta. Nim xkuyum li Yos eerikʼin; inkʼaʼ naraj naq taasachq junaq, naraj bʼan naq chixjunilebʼ teʼyotʼeʼq xchʼool ut teʼxjal xkʼaʼuxl» (2 Pedro 3:9).

Li Yos chi seebʼ tixbʼaanu aʼin. Li Jesús kixye naq naabʼal ebʼ li kristiʼaan teʼril li jalan jalanq chi naʼlebʼ li tixkʼutbʼesi naq wanko saʼ «rosoʼjik li ruuchichʼochʼ» (Mateo 24:3-42). Saʼebʼ li qakutan yook chi tzʼaqlok ru li propesiiy aʼin, li naxkʼutbʼesi naq li Yos chi seebʼ t-okenq chi xsachbʼal ru ebʼ li xnaʼlebʼ li winq. a

Abʼan, ma truuq li Yos xsachbʼal chixjunil li rahilal? Naq li Jesús kiwank saʼ Ruuchichʼochʼ kixkʼutbʼesi naq li Yos wank xwankil re xsachbʼal chixjunil li rahilal li nekeʼxkʼul ebʼ li kristiʼaan. Qilaq wiibʼ oxibʼ li eetalil.

Ebʼ li rahilal. Saʼ jun kutan, naq li Jesús ut ebʼ li xtzolom yookebʼ chi xik saʼ xbʼeen li palaw re Galilea, kichalk jun li kawil iqʼ li kixbʼaanu naq jayeʼq xeʼkoho rubʼel haʼ. Li Jesús kixkʼutbʼesi naq aʼan ut li Xyuwaʼ wankebʼ xwankil re xxaqabʼankil li rahilal aʼan (Colosenses 1:15, 16). Aʼan kixye: «Matchoqink! Chʼanaqat! Kichʼanaak li iqʼ ut kichalk jun nimla tuqtuukilal» (Marcos 4:35-39).

Ebʼ li yajel. Naabʼalebʼ li kristiʼaan nekeʼxnaw naq li Jesús naru chi xkʼirtasinkil ebʼ li mutzʼ, ebʼ li yeq roq joʼ ajwiʼ li wankebʼ xʼepilepsia, li saqlep rixebʼ ut jalan chik li yajel. Li Santil Hu naxye naq li Jesús «kixkʼirtasi chixjunilebʼ li yaj» (Mateo 4:23, 24; 8:16; 11:2-5).

Li weʼej. Li Jesús kiroksi li wankil li kikʼeheʼk re xbʼaan li Xyuwaʼ re xtamresinkil li tzekemq ut re naq chi mil ebʼ li kristiʼaan teʼwaʼaq (Mateo 14:14-21; 15:32-38).

Li kamk. Naq li Jesús kiwank saʼ Ruuchichʼochʼ kixwaklesi wiʼ chik chi yoʼyo oxibʼ li kristiʼaan ut jun rehebʼ ak kaahibʼ kutan chik xkamik. Aʼin naxkʼutbʼesi chi tzʼaqal re ru naq li Jehobʼa wank xwankil chi xwaklesinkil wiʼ chik chi yoʼyo ebʼ li kamenaq (Marcos 5:35-42; Lucas 7:11-16; Juan 11:3-44).